Read tula Nangi̱n Fandubi̱m 15 Bible Online

Nangi̱n Fandubi̱m 15 - tula bible

Nangi̱n Fandubi̱m 15

¹Yo m Bulus n ti Barnaba we Antakiya, bi̱kam kebu a be a Yafudiya be ki̱miya ni̱bu mi̱nu ko, “Ka ta biibu laaru yinangu yilang Musangu a fwange, a ne ta ya yuki̱ku.”

²Ti̱tu a yo Bulus n ti Barnaba a le tukaku we ya̱m bi̱bu. A kuteng ki̱ku, n chi a tum Bulus n ti Barnaba n ti bi̱kam ni̱bu bunti̱ki̱m, ko a ya Wurchalima bwanu a fandubu n ti seli̱bu ya̱m Kwamame, a twaya we ya̱m bi̱bu n ti chi.

³A kuteng ki̱ku ni̱bu bunti̱ki̱mu a yomi̱ne chiyangu, n chi a tau Finikiya n ti Samariya ki̱fwa ni̱bumi̱mu yinangu yikayu kuuti a ke bi̱yili̱mangu. Ti̱tu a yo ni̱bu bunti̱ki̱mu a ma ti̱mi̱lan.

⁴Yo n chi a lam Wurchalima, ni̱bu bunti̱ki̱mu n ti fandubu n ti seli̱bu kani̱mu a yiu chi kani yurau. Yinu n chi a fwa chimi̱n yinangu Kwama a maka chi we nangi̱n chitangu.

⁵Yinu bi̱kam ni̱bu bunti̱ki̱m bi̱bu a ki̱swi kwa̱l ni̱bu Farisamu a kun a ti a fwa ko, “Ni̱bu bi̱bu a wo ki̱ti̱m, n chi n ke ni̱bu Yisrelamu, a mwintuwe ka bii laaru yinu ka bunti̱ yilang Musangu.”

⁶Fandubu n ti seli̱bu a muran ka ta̱l ya̱m bi̱bu.

⁷A kuteng ki̱ku n chi a da̱u ki̱swi ki̱tukadu we muraki̱ chiyangu. M Biti̱r a kun a yi chi ko, “Kebi̱mi̱m, ti̱yim n Kwama a suti feredi we tibe chi̱n ko ke ni̱bu a yikayu kuuti a nwe ya̱m bi̱li̱mu a ke bi̱yili̱mu.

⁸N Kwama wu a yim ni̱tu ni̱bite, a yung ki̱yiu bi̱bu n ke ni̱bu Yisrelamu yoko a ni chi Fi̱ki̱m bi̱bi wauwadi̱me, yinangu n ki̱n a ni chiniyangu.

⁹N ki̱n a yungbu lakaku we tibe chire n ti bi̱bu n ke ni̱bu Yisrelamu, di̱ne ni̱tu chitu a nuran we keku bi̱yili̱mang chiyangu.

¹⁰Di̱ne yiko, a mayire ti̱swe Kwama ti̱yo miyari̱mu mi̱n ki̱daddake, chi a ne dwal da̱kke, ka nang chikiye, yili̱n ti̱tu a bwa tukebi̱ chirem n ti chinitu.

¹¹Aya ni̱n ke bi̱yili̱mu, n chi̱ni kwang ni swi a wa̱re wiin, wu nang wa̱re li̱me Tewuduwe n Yesuwe.”

¹²Ni̱bu a murani̱mu a le si̱ng ki̱nwe ya̱mu m Barnaba n ti Bulus ki̱fwa chimi̱ni̱mu we chi ka̱ta̱kitu n ti chi ya̱r yiitu n Kwama a ma chimi̱n we kuuti n ke ni̱bu Yisrelamu.

¹³Yo n chi a riye, n Yakubu a yi chi ko, “Kebu mi̱m ti̱ nwei.

¹⁴N Simun a fwa chimi̱n yinangu n Kwama a mwe ki̱yung yikayu kuuti mi̱n mi̱laku we yo a da̱u ni̱bu n ke ni̱bu Yisrelamu a kau bi̱ki̱me.”

¹⁵Bi̱bu fal a wuran bwi ki̱ni ya̱m fa̱ku a mwal ko,

¹⁶“A kuteng ki̱ku mang ki̱lawedu be mang muti̱ lon Dauda a yare we. Kasi ki̱ku a wurenangu, mang muti̱nuwe Mang kukuti̱nu we.

¹⁷N Tewuduwe a yi ko nang wa̱re yikayu kuuti ka ban mi̱ne, n chi ka kau bi̱suti̱ri̱m mi̱m.

¹⁸N Kwama a fwa ying, n ki̱n wu a yung ni̱bu ya̱m bi̱bu ferediye.”

¹⁹“M mi̱n n ku a da yiko, a dakabu ni fuma bi̱bu n ke kuu ni̱bu Yafudamu bi̱bu ki̱ke bi̱yili̱mu a di̱Kwamamu.

²⁰Chi mang ku ni maditu, ni tum chimi̱nu ko a chadu chabtu ti̱yobitu we n ti yaritu, n ti naiyu ni̱bu ki̱sakkwiru sabeyu n ti ki̱tuum.

²¹Nangki̱n we feredi ka nang di̱di̱le bi̱ne ni̱bu yungki̱mu we n ti yilang Musangu, ni̱bu ki̱kidu we kambi Kwamatu difi̱kare ni̱bu Yafudamu.”

²²Yinu fandubu n ti seli̱bu n ti ni̱bu bunti̱ki̱mi kwang, a sutu bi̱kam ni̱bu a tum a Antakiya, n chi n ti Bulus n ti Barnabas ke a be fwa chimi̱n chi we muretu. Seli̱bu ni̱bu bunti̱ki̱mu a swabi̱mu n Yafuda (wu ni̱bu ki̱yalu ko Barsaba) n ti Sila.

²³N chi a tum fandubu n ti seli̱bu ki̱ni lwangi̱n ya̱m bi̱bi̱nu we Ki̱likiya n ti yikai kuuti: N ni̱na kebu chim fandubu ni̱bu bunti̱ki̱m. Ni̱n mwal chimi̱nu n ti̱n bi̱bu n ke ni̱bu Yafudamu a Antakiyamu n ti ti̱m Suriyamu n ti Kilikiyamu, ni̱n sii chinedu nabwen!

²⁴Ni̱n nwe bi̱kam ni̱bu we tibe ni̱n ki̱kwau chi̱nu ki̱ni ya̱m bi̱kusi̱m ki̱miya chimi̱n bi̱kam ya̱m bi̱bu nang yimbu bwana chirmi̱nem.

²⁵Nang chi a yo nang ku a da nang sutu ni̱bu nang tum chimi̱nu n ti fati̱bu nanganmu, m bi̱u Barnaba n ti Bulus,

²⁶n chi bi̱bu a ni dutu chitu di̱ne di̱n Tewuduwe Yesu Masiya.

²⁷Di̱ne yiko ni̱n tum chimi̱ne Yafuda n ti Silas. N chi chifwan ka fwa chimi̱n ya̱m ni̱mu yinangu we mi̱nangu.

²⁸“A le yiko we Fi̱ki̱m, n ni̱n ni̱n da̱ng a le ni̱mi̱n ti̱n ta swaan ya̱mu ke a kau chimi̱nuwe ki̱ni tureng,

²⁹kanang chikiye, niku ki̱tuum a di̱yorangu n ti chakku ki̱tuumangu, n ti wuku nam wu ni̱bu a sakkwirusabbe n ti yaritu. Ka ti̱ soo yichiyu we ti̱te, ti̱ma chitu a daantu yinange. N du chi̱n li̱mang.”

³⁰N chi a kun a yika Antakiya, a ya mur ni̱bu, a ni lwangi̱n di̱du.

³¹Yo ni̱bu a ki lwangi̱n di̱de, a nwe ta̱ma̱ng di̱ne lwangi̱n di̱du a su chimi̱n runi.

³²N Yafuda n ti Sila, di̱ne n chi fa̱kubu Kwamame, a ngau kebi̱bu mi̱n ki̱kure ki̱ni ya̱miyu a kum chimi̱n ti̱n ni̱tti̱tu.

³³A kuteng ki̱ku n chi a ma wanditi we bwako, yinu a sikan n ti kebu ni̱bu bunti̱ki̱mu a du chi a ki̱la bwa ni̱bu a tumi̱ne chiye.

³⁴[Aya n Sila a ke ka swedu we bwako.]

³⁵M Bulus n ti Barnaba a swe we Antakiya ki̱maka ni̱bu bi̱bu ki̱yungdi̱mu n ti bi̱bu a fwa ya̱m bi̱li̱m Tewuduwemu.

³⁶A kuteng wanditiyangu, m Bulus a yal Barnaba ko chi yika siram a bi̱nti̱tu no n chi a ma mi̱ne di̱mwar di̱kwa̱l ya̱m bi̱li̱m Tewuduwe fereditu, ke chi ku yinangu n chi ki̱madangu.

³⁷Aya m Barnaba a no ke ka yikadu n ti Yowana wu n chi ki̱yalu ko m Markuse.

³⁸Aya m Bulus a ko di̱ne m Markus a du chi we Famfiliya a ko a yikabu ware n ti chi.

³⁹Tukaku chiyangu a ma dukan a mwintuwe n chi a yaran. M Barnaba a yal Markus a le kwa̱mbi̱re mwe a yika Saiyifuru.

⁴⁰Aya m Bulus a sutu Sila, a bunga ware a kutengu kebu ni̱bu bunti̱ki̱mu a yo chimi̱n delaku we di̱n Tewuduwenu.

⁴¹N chi a bunti̱ Suriya n ti Ki̱likiya, ki̱kum ni̱bu bunti̱ki̱mu mi̱n ni̱tti̱tu.