Read tula Nangi̱n Fandubi̱m 16 Bible Online

Nangi̱n Fandubi̱m 16 - tula bible

Nangi̱n Fandubi̱m 16

¹M Bulus a ya Darbe n ti Listi̱ra. We Listi̱ra wuka naba miyare we di̱n ki̱nu n Timoti. N ki̱n bwe wuka na Yafudiya wu ki̱bunti̱ Kwama. N te ki̱n naba Yelena.

²Kebi̱bu a Listi̱ra n ti Yikoniyamu ki̱wer Timoti we nangi̱n kitu.

³Di̱ne m Bulus ki̱baddu ka yikadu n ti Timotiye, a bi ki̱mi̱n laaru di̱ne ni̱bu Yafudam a ki̱twalang kange a yim ko n te Timotiye naba Yelena.

⁴We ki̱dangu n chi a chir ki̱bunti̱ bi̱nti̱tu, ki̱fwa ni̱bu mi̱nu chi seli̱bu n ti fandubu we Wurchalima a fwa ya̱m chabti̱mu n ti bi̱bu a yarimu, ke n chi a madu ti̱kali we ki̱ni yilangu.

⁵Di̱ne yiko, ni̱bu bunti̱ki̱mu ki̱sudu ki̱la mi̱n fiko ki̱ni keku bi̱yili̱mangu.

⁶A kuteng ki̱ku m Bulus n ti Sila a kana bi̱ntu Firichiya n ti Ka̱latiya di̱ne Fi̱ki̱m Kwamamu a dang chi fwaku ya̱m Kwamamu we Asiyange.

⁷Yo n chi a lam ki̱dire wu a ti̱m Misiyame, n chi a funti̱bwi ka bunti̱ Bitiniya, aya Fi̱ki̱m Yesumu a dubu chi ko a ya.

⁸Di̱ne yiko, n chi a bunti̱ ki̱ti̱ku Misiya, a suu bwa Toruwa.

⁹Ki̱ni kum m Bulus a ma dwakam bi̱yili̱m, we dwakamu, n ki̱n a ku naba Makadoniya a titiye ki̱wana ki̱nu ko, “Be Makidoniya, be maka ni̱n.”

¹⁰A kuteng ki̱ku m Bulus a ku dwakam bi̱yili̱mangu, nang kaibu ki̱swi, ni̱n kun ni̱n yika Makidoniya. Di̱ne ni̱n swaan ko n Kwama a yal ni̱n ko ya ni̱n ma di̱mwar ya̱m bi̱li̱mi̱nu we bwako.

¹¹Yinu ni̱n kun we Toruwa ni̱n le kwa̱mbi̱re mwe ni̱n yika Samurtakiya. Yo ti̱mu a kwiyane, ni̱n yika Niyafoli.

¹²We bwako, ni̱n kun ni̱n yika Filibi wu a wume mati̱n Roma, n nang bi̱n di̱dunu we ti̱m Makidoniyamu. Ni̱n ma wanditi we bwako.

¹³We difi̱kare Yafudame ni̱n chir we kwa̱r bi̱ni̱nu, ni̱n yika ki̱ti̱ku laang fi ni̱n kamadu nang yaan ni̱bu Yafudam ki̱twa̱ba̱ mi̱n buniye, ni̱n swe we fiko ni̱n fwa ya̱mu n ti nati̱bu a muran we fikomu.

¹⁴N Lidiya we bi̱bu a sii ki̱tele yinang ki̱nwe ni̱ni̱mu, n ki̱n fwa̱n Tiyati̱ra, ki̱feku kuli̱n di̱di bungbungi̱n di̱du a ma ka̱mbi̱ri̱n. N Tewuduwe a wudu ni̱r ki̱nu, n ki̱n a si ki̱tele we ya̱m Kwamamu m Bulus ki̱fwadi̱mu.

¹⁵A kuteng ki̱ku ni̱bu a ma ki̱mi̱n batisma n ti ni̱bu lokomu, n ki̱n a wana ni̱n ko, “Ka ta ke bi̱yili̱mu we Tewuduwe, ti̱be Lomi ti̱ si̱ku we. A kutengu n ki̱n a da ni̱mi̱n ki̱ti̱mangu, ni̱n ke ki̱mi̱n.”

¹⁶Wuka di, yinangu nang chir ni̱n yika twa̱ba̱kungu, ni̱n tekan n ti di̱kan fwa̱n ka̱be di̱du ki̱ni ki̱fi̱bti di̱du ki̱ma buwang. Wu tewuduwe ko ki̱ya ka̱mbi̱r we nabwen we buwangu ki̱madangu.

¹⁷Fwa̱n di̱du a le ki̱bung ni̱mi̱n ti̱nu, n ni̱n n ti Bulus, ki̱fwa ya̱mu dukan ko, “Ni̱bu bi̱bu ni̱bu Kwama Tewuduwe, ki̱ma chimi̱n di̱mwar wa̱re wu a yuke.”

¹⁸Ditiyu nabwen ki̱fwa ya̱m bi̱bu, ti̱tu a kai Bulus mi̱n ni̱r, n ki̱n a sabran a yi fwa̱nu ki̱ni ki̱fi̱bti ko, “We di̱n Yesu Masiya, chir mi̱n we fwa̱nu. Bi̱nabi̱na ki̱fi̱btiyu a chirti̱n.”

¹⁹Yo Tewuduweko a kuu wa̱re yaku ka̱mbi̱re chingu a tale, n chi a tau Bulus n ti Sila, a yikan tikaketi ni̱bu kabaki̱mu mi̱ni ki̱n a bwa kwa̱ma̱re.

²⁰Yo n chi a lam fi a kwa̱l kabaki̱ne, a yi chi ko, “Ni̱bu Yafudam bi̱bu ki̱kai bi̱n chi̱renu.

²¹N chi ki̱miya datiyu a dakabu n chi̱ni ni yiddu ka ni bunti̱ne. Di̱ne n chi̱ni ni̱bu Roma.”

²²Ni̱bu a kiya chimi̱ntuwe ki̱ti̱bu, kwa̱l kabaki̱nu a ngi̱ra chimi̱n lukeyu, a suku chi a dubi twatwad, yinu a yi ni̱bu ko a twalani kwa̱ntang.

²³A kuteng ki̱ku ni̱bu a ni chi riyengu, a mar chi a di̱bi̱nti̱l, yinu a yi nii ki̱to lo di̱bi̱nti̱le ko a to yinang.

²⁴Nii ki̱to lo di̱bi̱nti̱le a yiu ya̱m bi̱bu kani yurau, a yikani ki̱n a kan di̱du a murenu, a kwau chi a di̱bi̱nti̱l kwali̱mi̱n.

²⁵Ki̱ni ki̱tangti̱lang kuma̱ng m Bulus n ti Silas ki̱twa̱ba̱ bunitu ki̱kabati̱ teni delaki Kwamamu, ti̱bi̱nti̱litu ki̱nwe chidu yinangu n chi ki̱kaba teniyangu.

²⁶Bi̱nabi̱na ti̱mu a mi̱kan ki̱ni dukan, lo ti̱bi̱nti̱liye a mi̱kan ki̱ni tame kwang. Kanang di̱di̱le kwa̱re a wuden, maki̱lanitu a fa̱li ti̱bi̱nti̱liniti kwang a kwiyan a twaka ti̱n.

²⁷Yinangu naba toke a kaban we duumangu a ku kwa̱ti̱tu a wudenangu, a chaku too ki̱baddu ka chi̱u dur ki̱nu, di̱ne we kamaki̱ kangu, ko kano ti̱bi̱nti̱litu a chir.

²⁸Aya m Bulus a ngau keru ki̱ni dukan ko, “Chiddu dur munu we, n ni̱n we ki̱ni kwang!”

²⁹Yinu nii ki̱to lo ti̱bi̱nti̱liye a bau ki̱rang, a wul we bwa di̱Bulus n ti Sila a ya yar we kakku chiyangu.

³⁰A chaku chi a fi̱lang yinu a bi̱u chi ko, “Tewuduwe, mang ma wureni ke n ya yuke?”

³¹N Chi a yi ki̱n ko, “Ke bi̱yili̱mu we di̱n Tewuduwe n Yesu, mwang ya yuku, mun n ti lomo kwang.”

³²We ki̱dang kangu, n chi a fwa ki̱mi̱n ya̱m Tewuduwe mu n ti bi̱bu we di̱bi̱nti̱li̱m kwang.

³³We ki̱swi wuko, nii ki̱to lo di̱bi̱nti̱liye a yikani ki̱ni chi a nura chimi̱n bumbitu, yinu n chi a ma ki̱mi̱n batisma, n ki̱n n ti loko kwang.

³⁴Nii ki̱to lo ti̱bi̱nti̱liye a be ki̱ni chi a loko, a ni chi chabti̱tu we fiko. N ki̱n n ti loko a ri ki̱ni ka ti̱mi̱lan di̱ne n chi a ke bi̱yili̱mu we di̱Kwama.

³⁵Yo ti̱mu a kwiyane, kwa̱l kabaki̱nu a tum chitu ko ni̱bu a yi ni ki̱to lo ti̱bi̱nti̱liye ko. “A mar ni̱bu bi̱bu.”

³⁶Nii ki̱to lo ti̱bi̱nti̱liye a yi Bulus ko, “Kwa̱l kabaki̱nu a tume chi, ko m mar chi̱n. Di̱ne yiko ti̱chir, ti̱ya li̱mang.”

³⁷Aya m Bulus a yi ko, “N chi a twala ni̱n a kakku ni̱bang, yoko n chi a tibu kabade, kasi ki̱ku n ni̱n ni̱bu Romame. N chi a mar ni̱n a di̱bi̱nti̱l. Yinu ki̱chaku ni̱nni daan. A ne nang chiru! N chi a be chifwan, a be chaku ni̱n.”

³⁸Ni̱bu nanganmu a ya fwa kwa̱l kabaki̱nu mi̱n ya̱m bi̱bu. Tayi a tau ni̱bu bi̱bu kangu a nwe ko ni̱bu bi̱bu ni̱bu Romamu.

³⁹Yinu n chi a be a ni Bulus n ti Sila bwanu. A kuteng ki̱ku n chi a yo ni̱bu bi̱bu, a wana chi a chir we bi̱nu.

⁴⁰Yo m Bulus n ti Sila a chire we di̱bi̱nti̱le, a yika bwa di̱Lidiya. A kutengu n chi a ku kebu ni̱bu bunti̱ki̱mangu, a ru chimi̱n ni̱tti̱tu, yinu a yikan.