Read tula Nangi̱n Fandubi̱m 17 Bible Online

Nangi̱n Fandubi̱m 17 - tula bible

Nangi̱n Fandubi̱m 17

¹M Bulus we yayu chi a bunti̱ Amfibolis n ti Afoloniya, a fwadu a Tasalonika finu ki̱ni kan muraku ni̱bu Yafudame.

²Yinangu n ki̱n a meki̱madi kwadangu, m Bulus a ma wandi yitta we kan muraki̱nu, ki̱tukadu n ti chi we difi̱kare ni̱bu Yafudam we ya̱m bi̱mwali̱m Kwamamu.

³Ki̱fwa chimi̱nu yinang ya̱mu wemi̱nangu, ki̱yung ti̱nu ko m Masiya ki̱kumang a nwe riye, yinu ki̱kumang a kun we furu. M Bulus a chakakku ko, “N Yesu wu mi̱n fwa chimi̱ne, n nang Masiya.”

⁴Yinu bi̱kam ni̱bu Yafudamu n ti ni̱bu Yelenamu bi̱bu ya̱m Kwamamu a twai chimu a ke bi̱yili̱m ya̱mu m Bulus n ti Silas n ti bi̱kam bi̱duum nati̱bu nabwen a bungan ware n ti chimu ke chi sii ti̱n chi.

⁵Aya ni̱bu Yafudamu a fwiren, a ya babba bwesi̱m ki̱fi̱bti̱m bi̱bu ki̱swedu a kwa̱mari̱m. Yo bi̱ki̱mu a murane, a suki̱tu ni̱tu ni̱bitu ki̱ni kulangkulange we bi̱nu. N chi a wul we lo Yasone wu m Bulus n ti Sila a si̱ki̱mi̱ne ke chi be ni̱bu mi̱ne ki̱ni chi a tibe ni̱be.

⁶Yo n chi a ri we, a ki̱la tau Yason n ti bi̱kamu kebu ni̱bu bunti̱ki̱m a yikan kakku kwa̱l kabaki̱nang ki̱ni keme chi ko, “Ni̱bu bi̱bu nang bi̱bu ki̱luku ti̱ti̱nimu, n chi a bete fi.

⁷Nang wu n Yason a yiu chi we loko. N chi ki̱ki yilang Kaisar, ki̱yidu ko wuka Mai we, di̱n ki̱nu n Yesu.”

⁸Yo ni̱bu bi̱ni̱mu n ti kwa̱l kabaki̱nu a nwe bi̱be, ti̱kuran chitu a muten.

⁹N chi a marbu Yason n ti ni̱bu bunti̱ki̱mu, a yo chi a fe ka̱mbi̱r yinu a mar chi.

¹⁰Ki̱ni kum, kebu ni̱bu bunti̱ki̱mu a yo Bulus n ti Silas ko a yika Biriya. Yo n chi a lam bwako a le kan muraki̱n ni̱bu Yafudamu.

¹¹Yade bi̱bu ni̱bu ki̱ni bwanu yinang Tasalonika, a yiu ya̱m chimi kani yurau. N chi ki̱ta̱l ya̱m Kwamamu ni̱bu a mwali̱mu diti ki̱da̱ng. Ki̱baddu ka yindu ka ya̱m Bulusi̱mu bi̱yili̱me.

¹²We Biriya ni̱bu nabwen a ke bi̱yili̱mu. A lanti̱ bi̱duumu nati̱bu Yelena n ti bi̱kam kwartabu Yelena nabwen.

¹³Aya yoko ni̱bu Yafudam bi̱bu a Tasalonikamu a nwe ko m Bulus ki̱ma di̱mwar ya̱m Kwamanu a Biriya, n chi a ya we bwako a ya kuku muli̱nu we bwako ti̱n.

¹⁴Bi̱nabi̱na kebu ni̱bu bunti̱ki̱mu a yo Bulus a yika ki̱ti̱ki̱ laang kasi ki̱ku n Silas n ti Timoti a dubu bi̱nangu.

¹⁵Ni̱bu bunti̱ki̱mu a bungan n ti Bulusi̱mu, a su a yika Atina ki̱ni Bulus. Yo yaka ki̱lade, m Bulus a tume chi we di̱Timotiye n ti Silas ko a be bwa di̱ki̱ne daatu.

¹⁶Yo m Bulus ki̱yam Timoti n ti Silas we Atina, ni̱r ki̱nu a kaiyan yinangu a ku bi̱ni kwang ka ti̱yobiye.

¹⁷Diti ki̱da̱ng n ki̱n ki̱tukadu we kan muraki̱ ni̱bu Yafudamu n ti bi̱kamu ni̱bu Yelenam bi̱bu ki̱sii Kwamamu. Kanang wuwule diye ki̱tukadu n ti bi̱bu n ki̱n ki̱yadu a kwa̱ma̱ru.

¹⁸N ki̱n ki̱tukadu ti̱n n ti Abikuriya n ti ni̱bu Sitokiyam bi̱bu ki̱ni yingku yinangi̱mu. Bi̱kamu a yi ko, “N ki̱n naba didi̱kuni̱ne wu, ki̱fwa chimi̱nu ko wule?” Bi̱kamu a yi ko, “Yinang nii wu ki̱ma di̱mwar ti̱yobi ki̱fi̱bti a newe bwa̱ka̱nitu.” N chi a fwa ying di̱ne m Bulus ki̱ma di̱mwar Yesunu n ti kunki̱ kwa̱miyang.

¹⁹N chi a yikani ki̱ni Bulus a kun Arasan nang fi kwa̱l kabaki̱n a bi̱n we mi̱ne. N chi a bi̱u ki̱n ko, “We mwang kedu, mwang fwa ni̱mi̱n ya̱m bi̱fwim bi̱bu mun miyadi̱ma?

²⁰Di̱ne nang nwengbu ya̱m bi̱bu we ki̱teli niyu. Ni̱n baddu nang swaan ya̱m bi̱bu yinang.”

²¹Ni̱bu Atinami kwang n ti rungko ki̱ swedu we ti̱m chime, a ke ka nwe ya̱m bi̱fwim ke chi fwa ya̱mu we dur ki̱nu yinang.

²²Yinu m Bulus a kun a titiye we muraku chiyangu a kun di̱yori̱n a yi chi ko, ni̱bu Atinam! N swaan, n ti̱n ni̱bu bi̱bu ki̱bau ya̱m Kwamamu yinang kasi no wuwule ki̱swi.

²³Di̱ne yo mang bwa̱l we nelo, n ku kwali̱n chi̱nu ti̱sidi̱nu, n kuti̱ di̱kan kweer di̱du a niku ki̱tuuman ki̱ni di̱mwal di̱du, “Di̱ne Kwama wu niyang yimbe.” Ki̱kumang Kwama wu ti̱siidu niyang yimbe, nang wu mi̱n mwa chi̱ne.

²⁴N Kwama wu a yo ti̱ti̱nitu n ti chi we mureti kwange, n Tewuduwe diye n ti ti̱mi kwange, a swebu we fantiyu ni̱bu a ma fa̱la̱ngiyu.

²⁵Ti̱nti̱ne a babu ni ka maka ki̱nu, a bati̱bu ti̱kan chi, di̱ne n ki̱n ki̱ni ti̱kuri n ti Fi̱ki̱mi kwang.

²⁶We nii wiin n ki̱n a yo, kuuti yiyu a ti̱ti̱niyi kwang a chire we. N ki̱n ki̱yo ki̱dangu n ti fantiyu ka nang wuwule kuuwe ka sweendiyu.

²⁷“N Kwama a ma ying ko ke ni̱bu a bau ki̱n, ka we twaya ki̱ku ni̱bu ka ya ki̱ne kasi ki̱ku n ki̱n a newe kutan n ti ka wuwule chirengu.

²⁸N ki̱n nang wu ki̱yo ti̱kuri chi̱retu ki̱twa̱du, ni ma bwiyu ki̱ni ti̱kuri.” Yinangu bi̱kamu ni̱bu tenim chim a fwangu, bi̱yili̱m n chi̱ni ti̱n a ki̱kuwang kang.

²⁹Yinu yo we yiko, a dakabu ni yidu ko Kwama chire, ni̱bu a ma fa̱la̱ng ki̱ni si̱nariya ka asurfa n ti kali yiyiliye.

³⁰Yo ferediye, n Kwama a mwatabu ni̱bu mi̱nbu we ki̱leti kawure ki̱madu a kwalan swaangku chi̱nge. Aya ki̱ka̱ngu, n ki̱n ki̱yal ni̱bu ka bwa̱le ko a wo ki̱ti̱m.

³¹Di̱ne n ki̱n a yo di wu beka mwata ti̱ti̱nitu mi̱nde. N Kwama a yung ni̱bu ko ti̱tu ka fwedu yo a kuku ki̱n we fure.

³²Yo n chi a nwe ya̱m kunku kwa̱miyange, bi̱kamu a nuranurane, aya bi̱kamu ko chi nweti̱ ya̱m bi̱bu ki̱da.

³³We ki̱dang kangu, m Bulus a chir we fi a murake.

³⁴A kuteng ki̱ku, bi̱kamu a nabu Bulus, a ke bi̱yili̱mu. N Diyonisiyu, bwe kwa̱l kabaki̱ne wuka naye wu di̱n ki̱nu n Damari n ti bi̱kam a nabu Bulus.