Read tula Nangi̱n Fandubi̱m 2 Bible Online

Nangi̱n Fandubi̱m 2 - tula bible

Nangi̱n Fandubi̱m 2

¹Yo di Fentikos a lame, n chi ki̱ni kwang a muran a fiwiine.

²Bi̱nabi̱na di̱kan ker a chire a bwa diye yinang si̱ki̱n di̱dun a ri lo ki̱ni kwang, finu n chi ki̱sweende.

³Yinu n chi a ku ti̱kan chi yinang ben ki̱rangin a keran a sub we dur ka nang wuwule niye.

⁴N chi a rii ki̱ni Fi̱ki̱m Kwamamu, a mwe ki̱fwa ya̱miyu ki̱ni yikai yiini, yinangu Fi̱ki̱mu a ni kawure ki̱ti̱me ya̱mengu.

⁵Ki̱dang kangu bi̱kam ni̱bu Yafudam bi̱bu ki̱nwe tayi Kwamamu ki̱swedu we Wurchalima, kuu ni̱be bi̱bu a chire a kasi no a bi̱bi̱le ti̱m we ti̱ti̱niti̱mu.

⁶Ki̱tuu ni̱be a be di̱ne ker chi ka̱ta̱kin di̱du n chi a nwenu. N chi a be, a nwe ki̱fwa ya̱mu ki̱ni yiini bi̱ntu chi.

⁷Chitu a ya̱r chi yii, n chi ki̱fwadu ko, “Ni̱bu bi̱bu n ke ni̱bu a Ka̱lilima?”

⁸Yinu a ma yire ni nwedu, n kawure ki̱fwa ya̱mu ki̱ni yii chire?

⁹N chi̱ni ni̱bu Fartiyam n ti Madinam n ti Yelmam n ti ni̱bu Mesofotanam n ti Yafudam n ti Kafadokiyam, n ti Fontum n ti Asiyam,

¹⁰n ti Firichiyam n ti Famfiliyam n ti Masari̱m n ti bi̱bu a ki̱dire Sayiri̱m wu a ti̱m Libiyame n ti rungko a ti̱m Romamu.

¹¹Ni̱bu Yafudam n ti bi̱bu a wo ki̱ti̱m a kau Yafudame. Ki̱retan n ti ni̱bu Larabamu, ki̱nwe chi ya̱r yii ti̱tu a dukan Kwama n chi ki̱fwadu ki̱ni yiinitu.

¹²Chitu a ya̱r chi yii a kwala chi maki, n chi ki̱bi̱bedu ko, “Ti̱tu wureni?”

¹³Aya bi̱kamu a le ki̱fi miyari̱mu fiye ko, “Yim ki̱ma ni̱bu bi̱bu!”

¹⁴Yinu m Biti̱r a kun we ki̱tuu ni̱be a ti n ti miyari̱mi kub chiri wiini̱mu a fwa ya̱mu ki̱ni dukan ko, “Ni̱bu Yafudamu n ti bi̱bu ki̱swedu a Wurchalimamu, ti̱si ki̱teliyu, ti̱nwe chi mang fwa chimi̱nditu.

¹⁵Ni̱bu bi̱b u a nobu chi, yinangu ti̱kamadangu, ki̱swi a fi turkube, a ma si̱n.

¹⁶Aya ti̱tu nang chi fa̱ku Kwama n Yowel a fwaatu.”

¹⁷N Kwama a yi ko, we diti swan kuteyu, “Mang kure Fi̱ki̱m we ni̱bi kwang, Bi̱bari̱m chimu n ti bi̱wuti̱mu ka mwa ya̱m mi̱mu. Kal tayon chi̱nu ka ma dwakam bi̱bu a chire a di̱Kwamam. Yinu seli̱bu chimu ka ma fa̱kui a dwakam.”

¹⁸Ki̱kumang, kono nang diti yikiyu, “Mang fwale Fi̱ki̱m Kwamamu we ka̱bi bi̱bari̱mu n ti bi̱wuti̱mu. Ka ma fa̱kui we chi ka fweditu.”

¹⁹Mang yung chi ka̱ta̱kitu we twiye, n ti chi ya̱r yiitu we ti̱ti̱nitu, Kanang chikiye ki̱tuum n ti ki̱rang, ti ti̱dali̱ni ywa̱ni.

²⁰Yinu dii ka kadi ki̱li Swangu ka kadi wur yinang ki̱tuum, Ka lami̱nti̱ di ki̱lake Tewuduwe, di wuduwe Kwama.

²¹Yinu ka nang wuwule niye wu ka yalu we di̱n Tewuduwe ne, ka ya yuki̱ku.

²²Ni̱bu Yisrelamu ti̱ nwe, N Yesu naba Nasa̱ret ni wu n Kwama a yung chi̱n ko ki̱ke ki̱ne. N Kwama a yung ti̱tu a nabwe chi ya̱r yii n ti chi ka̱ta̱ki n ti di̱mwalu a yung a di̱Yesuwenu, kangu n ti̱ni ti̱fwan ta yimangu.

²³N Kwama a ni chi̱n nii wu a ki̱ke ko n ti yingku kang. Ti̱chiu ki̱n, a Fa̱li ni̱bu ki̱leti̱m.

²⁴Aya n Kwama a kuki̱ ki̱n we bwa, a yu ki̱n we kwaku tuwang ki̱ku a riyengu, di̱ne a ne wa̱re we bwa ka tau ki̱nu we furu.

²⁵Nangki̱n, n Dauda a fwa ya̱m we dur ki̱nu ko, “Mi̱n ku Tewuduwe kwadu we kakku mangu. Di̱ne n ki̱n we kang ki̱yilang mangu, a ne mang nwe tayi.”

²⁶Di̱ne yiko ni̱r mi̱nu ki̱ma ti̱mi̱lan, ben mi̱nu ki̱kaba teni ti̱mi̱lani, bwi miyu ka swedu ki̱ni yo ni̱re.

²⁷Nangki̱n, ne mwang duiyu we furu, ti̱nti̱ne ne mwang du nimo wu wauwade ka fwidu we furu.

²⁸Mun n yungi ki̱swa̱ti wa̱ri ti̱kuriyu, mwang riyu ki̱ni ti̱mi̱lan we kakku mwangu.

²⁹“Kebu mang fwa chimi̱n ya̱mi kwa̱rikwa̱ri we di̱tuke chire n Dauda. N ki̱n a bwa, ni̱bu a fur ki̱n, yinu fur ki̱nu n we n ti chi̱ni a lanta di.

³⁰Aya n ki̱n fa̱ku, yinu a yim ko n Kwama a fwa ki̱mi̱n ya̱m bwa̱ki̱mu ki̱ni di̱twa̱mbi̱r ko, ka yo wuka nii we ki̱kuwang kangu ka kau Masiya.

³¹Yinangu Dauda a swanangu, a fwa ya̱mu we kunku Masiyangu ko, a ne du ki̱nu we furu yinu bwi kiyu a ne fwidu we furu.

³²N Kwama a kukku Yesu we bi̱bwari̱mu, n chi̱ni kwang ka ni̱bu mwari̱m ki̱m we ti̱tu.

³³A ni ki̱n dwiyen we fa̱la̱ng ki̱yilang Kwamangu, yinu n ki̱n a yiu Fi̱ki̱m bi̱bi wauwadi̱mu we Te yinang ka bwa̱bangu. Ki̱ka̱ngu n ki̱n a kure fi̱ki̱mu a di̱ chire. Nang chi a be ki̱ni chi ti̱kuditu n ti ti̱tu ti̱nweditu.”

³⁴Di̱ne wu a yika diye n ke Dauda, aya n ki̱n a yi ko, N Kwama a yi Tewuduwe mi ko, “Swe a kang ki̱yilang mangu.”

³⁵Ka lami̱ti̱ yo ta fau fakwarbu chimu a nani chiye.

³⁶Di̱ne yiko, “Ni̱bu Yisrelamu ti̱yim ti n Yesu wu ta kukane, n Kwama a yo ki̱n Tewuduwe n ti Masiya.”

³⁷Kangu n chi a nwe bi̱bangu, ya̱mu a twai chi yinu n chi a bi̱u Biti̱r n ti bi̱kamu fandubu Yesumu ko, “Kebu, nang ma wureni?”

³⁸M Biti̱r a yi chi ko, “Ti̱wo ki̱ti̱m, n kawure a ma batisma a di̱n Yesu Masiya ke a ya duku ki̱letiyangu. Yinu ta ya ki̱li̱mang Fi̱ki̱m Kwamam.

³⁹Nangki̱n bwa̱ki̱ku ka Kwama di̱ne n chi̱n n ti bwesi̱m chimu n ti bi̱bu kutan n ti chini̱mu ka nang chikiye, bi̱bu n Tewuduwe a yal a di̱ki̱nemu.”

⁴⁰M Biti̱r a chakakku ki̱ni ya̱mu nabwen, ki̱ngau chimi̱n ki̱kure ko, “Ti̱yu dutu chi̱ntu we mwataki̱ku a dutu bi̱bwilamitu.”

⁴¹Ni̱bu a ke ya̱m Biti̱remu a ma batisma. We diko ni̱bu a sub a lam kuniriti ti̱ta.

⁴²N Chi a chakakku ki̱ni yungku fandubu, ki̱chau chitu a fiwiine ki̱ lweka ti̱nu a fiwiine we twa̱ba̱ku.

⁴³Tayi a tau ka nang wuwule niye, di̱ne n Kwama ki̱ma chi ka̱ta̱ki n ti di̱mwalu nabwen we fandubi̱bu.

⁴⁴Ni̱bu bunti̱ki̱mu a ke bi̱yili̱mi kwang a swe a fi wiine, ki̱kunkadu, ki̱kerati̱ chitu n chi a yaatu a fiwiine.

⁴⁵N chi a feku kuli chitu n ti kuli̱n chi̱nu, a ni ka nang wuwule niiye yinangu kawure ki̱bandangu.

⁴⁶Ka wuwule diye, n chi ki̱muradu we Kan Kwamana Wurchalimanu, ki̱dwa̱ka ki̱danniyu ki̱nikadu we loniyu, ki̱chadu ki̱noti̱nu ki̱ni furi mwen,

⁴⁷n ti delaki̱ Kwama. N chi ki̱ni wule we ni̱bi kwang. Kanang wuwule diye n Tewuduwe ki̱su chimi̱n ni̱bu ka suku bi̱bu ki̱wo ki̱ti̱mi̱mu.