Read tula Nangi̱n Fandubi̱m 20 Bible Online

Nangi̱n Fandubi̱m 20 - tula bible

Nangi̱n Fandubi̱m 20

¹A kuteng ki̱ku kusi̱ru a tiyangu, m Bulus a kum ni̱bu bunti̱ki̱mu mi̱n ni̱tu, yinu a du chi a yika Makidoniya.

²Yo n ki̱n a kana bi̱nti̱te, a kum chimi̱n ti̱n ni̱tti̱tu yinu a yika Yellas.

³N ki̱n a ma swarti ti̱ta we fiko. A kuteng ki̱ku n ki̱n a no ki̱baddu ka yika Suriya aya n ki̱n a be swaan ko ni̱bu Yafudamu a do ka chi̱u ki̱nu we kwa̱mbi̱re mwe. N ki̱n a to yiko, a sute ti̱kurantu a bunti̱ Makidoniya.

⁴N Sufata bwe Farus wu a Biriya n ti Aristakus n ti Sakundus, ni̱bu Tasalonika n ti Ka̱yus wu a Darbe, n ti Timoti a lanti̱ Tikiku n ti Tarofimu ni̱bu Asiyamu a ya yo ki̱ne.

⁵N chi a chakakku a yan ni̱n a Toruwa.

⁶Yo Yiye Yabake wu a ki̱danniye a suwe, ni̱n kun we filibi wu a Makidoniya ni̱n le kwa̱mbi̱re mwe ni̱n ya yayu diti yuunu yinu ni̱n ya chi a Toruwa. Ni̱n ma ditiyi yidibiin we Toruwa.

⁷We difi̱kare Yafudawayu, ni̱n muran ni̱n kera ki̱danniyu. Yinu m Bulus a fwa ni̱bu mi̱n ya̱mu di̱ne ki̱baddu ka yikadu ki̱ni si̱n. N ki̱n a fwa ya̱mu a lam ki̱tangti̱lang kuma̱ng.

⁸Fiti̱latiyu nabwen we kanu nang murami̱n a diinu.

⁹Wuka bwele we di̱n ki̱nu n Yutiku wu a swe a wunduwe, yo a yaki̱ nwe ya̱m Bulus a ribidati̱me, duum a da̱u ki̱n we fiko. N ki̱n a yare we wundu we kan di̱din di̱du a diinu ki̱ni ti̱kwa̱li swaniti ti̱tantu, a bwa ti̱n.

¹⁰Yo m Bulus a su ti̱me, a sung a da̱u ki̱n, a yi ni̱bu ko, “Ti̱kaiyu ni̱r we, n we ki̱ni ti̱kuritu.”

¹¹Yo m Bulus a ki̱lati̱ kan diinu we, a kera ki̱danniyu ni̱n chau. A chakakku ki̱ni ya̱mu a lami̱nti̱ yo ti̱mu a kwiyane yinu a yikan.

¹²Ki̱ni yiko, n chi a yikani ki̱ni bwele li̱mang. Ni̱tu ni̱bitu a ribetuwe.

¹³N ni̱n ni̱n chakakku ki̱ni yayu we kwa̱mbi̱re mwe ni̱n yika Asus bwanu yana da̱u mi̱ne Buluse. N ki̱n a do yiko di̱ne n ki̱n a ke ka ya yayu ki̱ni nang.

¹⁴Yo n ki̱n a be ya ni̱n we Asus we, ni̱n da̱u ki̱n we kwa̱mbi̱re mwe ni̱n yika Miti̱lene.

¹⁵Yinu fal ni̱n chakakku ki̱ni yayu we kwa̱mbi̱re mwe. Bafi̱nenangeko, ni̱n lam Kiyos. Wuka di ti̱n ni̱n lam Samon. Wukane ti̱n ni̱n lam Miletus.

¹⁶M Bulus a no kebu ka si̱ki̱du we Afisa di̱ne a babu ka kai ki̱swi we Asiya, n ki̱n ki̱wa̱rtadu ki̱baddu ka le Wurchalima kuteng yiye fentikose.

¹⁷We Miletus m Bulus a tum chitu we Afisa ko ni̱bu a yal ki̱mi̱ne seli̱bu ni̱bu bunti̱ki̱ bi̱duumu.

¹⁸Yo n chi a be, a yi chi ko, “N ti̱ni̱n ti̱fwan ti̱yim yinangu mang swe n ti chi̱nangu a mwetuwe di mang mwe mang le Asiya.

¹⁹Mi̱n si Tewuduwe ki̱ni bwanu we riye mi̱n nwede. M mu ni̱ru we swa̱ka̱ku ni̱bu Yafudamu a tau ki̱ma midangu.

²⁰Ki̱ni yiko mang yung chi̱n chi ka maka chi̱ne, mi̱n ma chimi̱n di̱mwaru n ti miyaki̱ki kwa̱rikwa̱ri, mi̱n bunti̱ loni loni.

²¹N ngau ni̱bu Yafudamu n ti Yelena mi̱n ki̱kure mi a wo ki̱ti̱m a ke bi̱yili̱mu we Kwama Tewuduwe n Yesuwe.”

²²Aya ki̱ka̱ngu mang ri ki̱ni fi̱ki̱me mi̱n yika Wurchalima, we bwako mang yimbu chi ka fweditu.

²³Yinangu mi̱n kana bi̱nti̱tangu, Fi̱ki̱m Kwamamu ki̱yungiyu we ni̱ru ko riye n ti leku di̱bi̱nti̱lang ki̱yaiyu.

²⁴Aya ti̱kuri mitu n ke chi ka no we mang wul banangu mang ri nangangu n Tewuduwe n Yesu a ni ko ke m ma di̱mwar ya̱m ki̱mu n ti li̱me Kwama.

²⁵Di̱ne n tu n yim n ti̱ni kwang a ne ta kui ti̱nu ki̱da, di̱ne yiko m bwa̱l we tibe chi̱n mi̱n ma chimi̱n di̱mwar yaa Kwamane.

²⁶Di̱ne yiko, mi̱n fwa chimi̱nu mi̱n n newe ki̱ni ki̱le we dur wuka niin.

²⁷N tu n fwa chimi̱n chi Kwama ki̱bade kwang.

²⁸Ti̱soo yichiyu, ti̱kur ki̱ni kwanti Kwamayu yiyu Fi̱ki̱m Kwamamu a du a fa̱li chi ko ti̱toyu. Ti̱chakakku ti̱nang to ni̱bu bunti̱ki̱ bi̱bu Kwama we ki̱tum ki̱mu a wuwe chi, n ki̱ni ki̱fwane.

²⁹N yim a kutengu mang yikadangu, yikai bawuti ni̱bu ti̱kwanim ka le tibe chi̱n, ka swe ti̱nu we kwanti Kwamayu.

³⁰Ko no nang bi̱kam chimu, ka kunnu ka ni̱n mwera ti̱kwanitu di̱ne ke chi butu ni̱bu bunti̱ki̱mu a ki̱la ba̱la̱ng chiyang.

³¹Di̱ne yiko, ti̱ma ki̱yolang, ti̱kur swa̱ti̱ti ti̱tta mang swe n ti chinitu. Yinangu mi̱n to chi̱nu mi̱n ngau chi̱n mi̱nti̱n ki̱kure kum n ti kukongu n ti riye mi̱n nwedu di̱ne chi̱ne.

³²Ki̱ka̱ngu n du chi̱n a fa̱la̱ng Kwamangu, li̱me ko a swe n ti chi̱n, nang chi ka mu chi̱nu, ka yodu ta ya kula n ti bi̱bi wauwadi̱me.

³³Mang kubebu ka̱mbi̱r ka kuli̱n niine.

³⁴N ti̱n n ti̱fwan ti̱yim m ma nangangu ki̱ni fa̱li mi ke n ya chi mi̱n badditu, m ma bi̱kamu mi̱nti̱ chi ki̱badditu.

³⁵We ti̱ti kwang mi̱n yung chi̱nu yinangu ta maka ti̱lusanitu ka ti̱ni bobu ti̱ma nangange. A dakan ta kur ya̱m Tewuduwe Yesu a fwa ko, “Ni ki̱ku a la yiki̱ku ki̱ni delaki̱ku.”

³⁶A kutengu a ri ya̱ma̱ngu, a sung a twa̱ba̱ bunitu n ti chi.

³⁷N Chi a ma furi ki̱linu nabwen. N kawure ki̱kwar Bulus ki̱sidu ko a ya li̱mang.

³⁸Furi ki̱lin chi̱nu di̱ne ya̱mu a fwa chimi̱n ko ka ma bwar chi teka ti̱nuwemu. N chi a bunti̱ Bulus a yo we kwa̱mbi̱re mwe.