Read tula Nangi̱n Fandubi̱m 21 Bible Online

Nangi̱n Fandubi̱m 21 - tula bible

Nangi̱n Fandubi̱m 21

¹A kuteng ki̱ku nang yo mi̱ne Bulusangu, ni̱n tau wa̱re, ya ni̱n le Kwa̱mbi̱re mwe we nabwe la wu a Kose, bafi̱nenangeko ni̱n yika Rodiyasa, yinu ni̱n kun we fiko ni̱n yika Fatara.

²Kangu nang ya kwa̱mbi̱re mwe me wu ki̱yika Finikiya, ni̱n le ni̱n yika ti̱n.

³We yayu kangu ni̱n yikadangu, yo nang mwata Saiyifuru, ni̱n mar bi̱nu a kantakwelang ni̱n su ni̱n yika Suriya. Yinu ya ni̱n si̱ku a Taya fi kwa̱mbi̱re mwe ka si̱ki̱n kuli̱n ki̱ne.

⁴Kangu na ya fi ni̱bu bunti̱ki̱mu wemi̱nengu, ni̱n ma ditiyi yidibiin we fiko. We fiko Fi̱ki̱m Kwamamu a twai chi we ni̱tu chitu, yinu n chi a yi Bulus ko a yadu Wurchalima we.

⁵Aya yo ki̱swi nang yikande a lame, ni̱n kun ni̱n chakakku ki̱ni yayu. Ni̱bu bunti̱ki̱mu n ti bwesi̱m chimi kwang a yo ni̱ne a kuteng bi̱nang. Yinu ni̱n sung ni̱n twa̱ba̱ bunitu we ki̱ti̱ku laangu.

⁶Yo nang riye, ni̱n le kwa̱mbi̱re mwe n chi a ki̱lati̱ lo.

⁷A kuteng ki̱ku nang du Tayangu, ni̱n chakakku ki̱ni yayu we mwe ni̱n yika Tolemayi, ya ni̱n sikan n ti kebu ni̱bu bunti̱ki̱mu we fiko, ni̱n datuwe di wiin.

⁸Bafi̱nenange ko ni̱n yika Kaisariya ya ni̱n le lon Filibu wu ki̱ma di̱mware, n ki̱n wetuwe bi̱bi bi̱dibiimu ni̱bu a sutu di̱ne ke a nang kera chabti̱mu.

⁹Nii wu ki̱ni fwa̱niti ti̱dibiin ti̱tu ki̱ma fa̱kuitu.

¹⁰A kuteng ki̱ku nang ma diti we fikongu, wuka naba fa̱ku, di̱n ki̱nu n Aka̱bu, a be a Yafudiya.

¹¹Yo Aka̱bu a be fi a di̱ni̱ne, a yiu chi m Bulus ki̱muun tarre, a mu tar ki̱nu n ti nani kiyi ki̱n, yinu a yi ko, “Chi Fi̱ki̱m a fwa nang wu, bi̱duum ni̱bu Yafudamu ba Wurchalimamu ka kwau naba kuli̱n di̱de ying, ka da̱du ka ni kuu Roma.”

¹²Yo nang nwe ya̱m bi̱be, n ni̱n bi̱bu ni̱n ya yayu n ti ki̱ni̱mu, ni̱n wana ki̱n ko a yadu Wurchalima we.

¹³Aya m Bulus a yi chi ko, “Ti̱fwa wureni ye? A mayire ti̱chimi bwiye, n tu n do bwiyu, n ke di̱ne kana riye mang nwedu a Wurchalima aya kasi no mang bwadu, ka kwer mang bwadu a di̱n Tewuduwe Yesune a lami chi.”

¹⁴Yinangu nang swan ko m Bulus a ne sute ni̱rangu, ni̱n ma bwanu ni̱n yi ko, “Tewuduwe ma chi mwang ku a letu.”

¹⁵A tibu ke, ni̱n wo kuli̱nu, ni̱n yika Wurchalima.

¹⁶Bi̱kamu ni̱bu bunti̱ki̱m we Kaisariya a ya, a yo ni̱ne. N chi a ya, a yo ni̱n a lon Manasone. Nii wu naba Sayifuru. N ki̱n wetuwe bi̱kaki̱mu a ni̱bu bunti̱ki̱mi̱mu.

¹⁷Yo nang lam Wurchalima, kebi̱bu a yiu ni̱n fa̱liyi yurau.

¹⁸Bafi̱nenangeko m Bulus a yika bwa di̱Yakubu n ti ni̱n. Seli̱bu ni̱bu bunti̱ki̱mi kwang we fiko.

¹⁹A kuteng ki̱ku, m Bulus a sikan n ti ni̱bangu, n ki̱n a fwa chimi̱n kanang ti̱ti̱le chiye kwang ti̱tu n Kwama a ma yikayu kuuti mi̱n we nangangu m Bulus a mangu.

²⁰Kangu n chi a nwe ya̱m bi̱bangu, a ni Kwama dwiyentu yinu a yi Bulus ko, “Fate, ni̱bu kuniri ni̱bu Yafudamu a ke bi̱yili̱mu, n chi ki̱ni kwang ki̱ni ni̱ru ka bunti̱ yili̱n Musatu.”

²¹Ni̱bu bunti̱ki̱mu a fimu a ya ya̱mu ko m mun, mun miya ni̱bu Yafudamu a swe n ti bi̱bu n ke kuu ni̱bu Yafudame mi̱nu mwiko a ni yilang Musangu kuteng. N chi ko mun yi ni̱bu mwiko a bidu laaru we bwesi̱mu, a bunti̱nu yikayu daati Yafudamu we.

²²Yoye nang ma bi̱bu ya̱mi yire, yo n chi a nwe ya̱m beku mwange?

²³Di̱ne yiko, mwang ma chitu nang fwa mi̱nitu. Ni̱nni ki̱ni ni̱bi baana bi̱bu a bwa̱u we ni̱r chini̱mu.

²⁴Bungan n ti ni̱bu bi̱bu, ti̱ma yiye nurake ware kwang, yinu mwan fe chi a tabbitu ke dutu chitu a ya kwalku. Yinu ni̱bu ka kedu ko a ne bi̱yili̱m we ya̱m bi̱bu ni̱bu a fwa a dur muni̱mu. Aya n chi ka kedu ko mwang mabu ti̱kali ki̱ni yili̱n Musatu.

²⁵Aya ni̱bu yikayu kuuti bi̱bu a ke bi̱yili̱mu, ni̱n tu ni̱n mwal chimi̱n ko, a chadu chabtu di̱yoritu we, n ti yaritu, a wuti̱nu naiyu ni̱bu a bibubiyeyu we, n ti nam wubware.

²⁶Yinu m Bulus n ti ni̱bu bi̱bu a ma nuraki̱ku, yinu a le Kan Kwamanu a Wurchalimanu yaka fwa di nuraki̱ chiyangu ka ride. Di ni̱bu ka ma niku di̱ne kanang ti̱ti̱le chiye.

²⁷Yo ditiyi yidibiin a mwatan ka ride, bi̱kam ni̱bu Yafudam a Asiya a be ku Bulus we Kan Kwamanu N chi a suke ki̱tuu ni̱be ko a tau Bulus.

²⁸N chi a bwe kemi ko, “Kebi̱mi̱m ni̱bu Yisrelamu, ti̱be makaku! Nii wu ki̱ bwa̱lu kasi no bwa̱le ki̱fwa ya̱mu a li̱mbuli̱mem kiyi ni̱bu ko a bunti̱nu yili̱n chi̱retu we nang wu. Ki̱fwa ya̱mu we Kan Kwamanu a li̱mbu a bwin ni̱bu Yelena a wo, a le Kan Kwamani ki̱ni̱mu.”

²⁹N chi a fwa ying, di̱ne a no ku m Bulus ki̱bwa̱lu we bi̱nu n ti Tarofimu naba Afisa. Ti̱tu nang chi a yo n chi ki̱kamadu ko kano m Bulus a le Kan Kwamanu ware.

³⁰Bi̱nu a kayan, n chi a kunne ki̱ni kaiyan ni̱re a be tau Bulus, a chakku we kan Kwamanu a Wurchalimanu, a yingeti̱ kanu a kutengu n chi a chiri ki̱nangu.

³¹Kangu n chi we ki̱ma ki̱chitu wuwangu, ya̱mu a ya wuduwe ni̱bu kuni̱me ko bi̱n Wurchalima ki̱ma di̱kulan.

³²N ki̱n a yal ni̱bu kuni̱m ki̱mu n ti bi̱duum chimu, a ya we bwana di̱kulane. Yo ni̱bu ki̱baska chimu a ku wuduwe ni̱bu kuni̱mu n ti ni̱bu ki̱me, n chi a du ngakku Bulusangu.

³³Wuduwe a be tau Bulus a yo ni̱bu a kwabi maklan. N ki̱n a fwa ki̱tuu ni̱be mi̱n dukan ki̱nu n ti chi n ki̱n a matu.

³⁴Ki̱tuu ni̱be a ki̱la le tukaku, bi̱bu ko ying bi̱kamu ko ying. Ya̱mu a ne da we ni swan bi̱yili̱mu. N ki̱n a to yiko, a yi ni̱bu ko a yikan sabi̱r ki̱ni Bulus[9]

³⁵Yo n chi a lam ti̱di̱ngri lo diite, n chi a da̱u Bulus di̱ne kulangkulange ki̱lami̱ne fiko.

³⁶Ki̱tuu ni̱be ki̱ nabu chide we kutengu ki̱ni kemi ko, “Ti̱chiu.”

³⁷Yo ni̱bu kuni̱mu ya ki̱baddu ka yikadu ki̱ni Buluse, n ki̱n a yi wuduwe ko, “We mwang kedu mang fwa ya̱ma?” Wuduwe a yi ki̱n ko, “A mwang me yii ni̱bu Yelename.”

³⁸M mun n ke naba Masare wu a yo ni̱bu a ma kulangkulange we swa̱ti̱tu a sutu, wu a wo ni̱bu a bwarani̱mu kuliti taana a yikan nabwe di̱si̱langchangi̱na?

³⁹M Bulus a yi ki̱n ko, “M mi̱n naba Yafudiya, m be a Tarsus wu a ti̱m Ki̱likiyame, m mi̱n bwe bi̱n di̱du a ki̱siyangi̱ne. Mi̱n wananu, dui n fwa ni̱bu bi̱bu mi̱n ya̱m.”

⁴⁰Yo wuduwe a ni ki̱n da ko a fwa ya̱me, m Bulus a ti we ki̱di̱ngu, a kuku fa̱la̱ngu ko ni̱bu a lemi̱n, yo ni̱bu a le wudidiye, a fwa chimi̱n ya̱mu ki̱ni yii Yafuda.