Read tula Nangi̱n Fandubi̱m 23 Bible Online

Nangi̱n Fandubi̱m 23 - tula bible

Nangi̱n Fandubi̱m 23

¹M Bulus a da̱ng kwa̱l kabaki̱ni ri̱ng, yinu a yi chi ko, “Kebu mi̱m, mang kamabu chi, n yim m ma da wu yile we kakku Kwamangu.”

²We bi̱bu, wuduwe fansetiye wu di̱n ki̱nu n Ananiya a yi bi̱bu a ti we fikomu ko ti̱ngau ki̱n a yii.

³Yinu m Bulus a yi ki̱n ko, “M Mun nii wu kuse. N Kwama ka ngati̱ munu! N swe mwi mwang kaba midu yinangu yilanga fwangu, aya mun ki yilangu.”

⁴Aya bi̱bu a tiwe fiko mu a yi Bulus ko, “wuduwe fansetiye Kwama nang wu mun tuda?”

⁵Yinu m Bulus a yi chi ko, “Kebu mi̱m mang yimbu mi nang wuduwe fansetiye. Di̱ne a mwalmwale ko, ‘Tudu tikake ni̱be we.’ ”

⁶Yinangu m Bulus a swaan ko we fiko, bi̱kamu ni̱bu Sadukiya yinu bi̱kamu ni̱bu Farisiyam, a fwa ya̱mu ki̱ni dukan ko, “Kebu, m mi̱n naba Farisa ti̱n, bwe Farisiya. Ti̱da̱ng ni̱bu ki̱mwata mi ya̱m di̱ne mang yo ni̱ru we kunku kwa̱miyange.”

⁷Yo n ki̱n a fwa bi̱be, bi̱ngai a le tibe ni̱bu Farisame n ti ni̱bu Sadukiyamu, ti̱tu a yo muraku ni̱bangu a keran ti̱nti yurau.

⁸Ni̱bu Sadukiyamu ki̱yidu ko a ne kunku kwa̱miyangu we n ti Ni̱bu ti̱tumbi̱ri Kwamamu ka ki̱fi̱btiye, aya ni̱bu Farisamu a ke ki̱ni ya̱m bi̱bu ko we.

⁹Kusi̱ru a kau di̱dun. Bi̱kamu ni̱bu yungkim bi̱bu n chi ni̱bu Farisamu a kun a kwila ya̱m bi̱bu ki̱ni dukan ki̱yidu ko, “Nang kubu ki̱le nii we, ti̱yimi yire ka ki̱fi̱btiye ka ni̱bu ti̱tumbi̱ri Kwamam a fwa ki̱mi̱n ya̱me.”

¹⁰Tukaki̱ku a kabi ki̱ni dukan wu a yo wuduwe ni̱bu kuni̱me a nwe tayi ko kano ni̱bu ka ngi̱ra Bulusi yak. N ki̱n a yi ni̱bu ki̱mu ko, a ya, a chakku Bulus we tibe ni̱be ki̱ni dukan a yikan sabi̱r[11] ni̱bu kuni̱m.

¹¹Ki̱ni kum wuko, n Tewuduwe a ti a kwatuwe di̱ Buluse, a yi ki̱n ko, “Mu ni̱ri kwing, yinangu mwang ma di̱mwar mi̱nu we Wurchalimangu, mwang mati̱ni yiko we Roma.”

¹²Yo ti̱mu a kwiyane, ni̱bu Yafudamu a do ka chi̱u Bulus. N chi a twa̱n chitu ko a ne chi chadu, a ne chi nodu ka chi a chibu Buluse.

¹³Ni̱bu bi̱bu a do ka ma muli̱n di̱di̱mu n chi wani taana.

¹⁴N chi a ya fi a tikaketi fanseti ti tikake seli̱biyu a yi chi ko, “Ni̱n tu ni̱n twa̱n chi, a ne nang chadu, a ne nang no ti̱nu ka nang chibu Bulus nii we.

¹⁵Di̱ne yiko n ti̱n n ti kwa̱l kabaki̱nu ti̱yi wuduwe ni̱bu kuni̱me tiko a be chimi̱ne ki̱n yinangu ti̱badu ta ta̱lti̱ ya̱mu we ki̱dangu. Ni̱n tu ni̱n do bwiyu nang chiddu.”

¹⁶Yo bwe ke Bulus wuwiye a nwe ya̱m bi̱be, a yawe sabi̱r[12] ni̱bu kuni̱mu a ya fwa Bulus mi̱n.

¹⁷Yinu m Bulus a yal wuka wuduwe naba kune Roma a yi ki̱n ko, ti̱bunga bwa wuduwe n ti bwele wu. Yaka fwa ki̱mi̱n bi̱kam ya̱m.

¹⁸Wuko a ke a yikani ki̱ni bwele we wuduwe ni̱bu kuni̱me, yinu wuko a yi ko, “Naba di̱bi̱nti̱le wu m Bulus a yali ko m bemi̱ne ki̱ni bwele wu, n ki̱n ki̱ni chi ka fwa mi̱ne.”

¹⁹Wuduwe wu a tau fa̱la̱ng bwelengu, a yal ki̱n a ki̱ti̱ku a bi̱u ki̱n n ki̱kun ko, “Mwang fwa mi wureni?”

²⁰Bwele a yi ko, “Ni̱bu Yafudamu a kekan we bi̱nu ko n yikani ki̱ni Bulus a kakku kwa̱l kabaki̱nang fi̱nenang, kanodu ki̱baddu ka ta̱lti̱ ya̱mu ki̱da.

²¹Aya keduwe, di̱ne ni̱bu a la wani taana bi̱bu a lailaiye mu ki̱baddu ka chi̱u ki̱nu, n chi a tu a twa̱n chi ko a ne chi chadu ka chi node a mwintuwe chi chi̱u ki̱nangu.”

²²Yinu wuduwe a yi ki̱n ko, “Fwadu wuka nii mi̱nu we mwi n fwami ya̱m bi̱bu. Yinu a yo ki̱n a yikan.”

²³Yinu wuduwe a yal kwa̱bi ni̱bu ki̱rang Romami burau a yi chi ko, “Ti̱do bwi di̱ne ta kunnu ta yika Kaisariya yo ki̱swi kanodu a fi a turkube wu kume n ti ni̱bu ki̱rangmu kuuliti turau n ti ni̱bu ki̱rangmu ki̱ni kweretimu wan ti̱dibiin n ti ni̱bu kuni̱m yarti̱mu kuuliti turau.”

²⁴A yi ti̱n ko, “Ti̱bau kwere wu m Bulus ka fi̱le. Yati̱ yo ki̱ne li̱mang we di̱ Felise.”

²⁵Yinu wuduwe ni̱bu kuni̱me a mwal lwangi̱ni ying.

²⁶“M mi̱na Kalaudiya Lisiya, mi̱n mwal mi̱nu Kwabna Felis. Mi̱n siinu.

²⁷“Ni̱bu Yafudam a tau nii wu, n chi a mwata ya̱mu ka chi̱u ki̱nu. Yinu n fumbwi m mi̱n n ti ni̱bu ki̱rangmu ni̱n chaka ki̱n a fa̱li bwai di̱ne mang nwe ko n ki̱n naba Roma.

²⁸Yo mang kwer mi̱n baddu mang nwe ki̱le wu n ki̱n a mange, n tung ki̱n a kwa̱l muraki̱n chiin.

²⁹N ya chi ki̱turadu a ya̱m yilang chiyang, aya ki̱le n chi a yo ki̱mi̱ne a lambu wu a kwakku niyange ka wu a chikku kange.

³⁰Yinangu mang ya di̱mwaru ko ni̱bu a bwa̱u ya̱mu yaka ma ki̱mi̱n muli̱nangu, nang wu mang tum mi̱ne. Yinu n yi ni̱bu a Mai keme komu mi a fwa we kakku mwangu ki̱le n chi a ku a ma.”

³¹Di̱ne yiko, ni̱bu kuni̱mu a da̱u Bulus yinangu ni̱bu a yi chiyangu. N chi a yikan Atifatiri ki̱ni kum.

³²Bafi̱nenangeko n chi a du ni̱bu ki̱rangmu kweretimu ko a chakakku a yikani ki̱n, bi̱kamu a ki̱lawe sabi̱r[13] chi̱nu.

³³Kangu bi̱kamu ni̱bu ki̱rangmu a lam Kaisariyangu, n chi a ni Kwabna lwangi̱nu, a duti̱ Bulus we fiko.

³⁴Yo n Kwabna a ki lwangi̱n di̱de a bi̱u Bulus yaa wu n ki̱n a chir mi̱ne. Yinangu a nwe ko a chire a Ki̱likiyangu,

³⁵yinu a yi ko, “Mang kaba ya̱m mumu, ki̱dangu ni̱bu a mar kememu ka bedangu. Yinu n ki̱n a yi ni̱bu ko a yingen a sa̱ngka Yiriduse.”