Read tula Nangi̱n Fandubi̱m 27 Bible Online

Nangi̱n Fandubi̱m 27 - tula bible

Nangi̱n Fandubi̱m 27

¹Yo dokaku a ri nang yika Yitaliya, ni̱bu a du Bulus n ti bi̱kam ni̱bu ti̱bi̱nti̱li̱m a kang wuka wuduwe ni̱bu ki̱rangmu, wu di̱n ki̱nu n Yuliyus, n ki̱n wuka we ni̱bu ki̱rang kwa̱l Kaisari̱nu.

²Ni̱n kun yayu, ni̱n bunti̱ kwa̱mbi̱re mwe wu a ti̱m Adiramitiya, wu ki̱baddu ka bunti̱ beti̱ bi̱ni yiyu a ki̱ti̱ku Asiya. Wuka naba Tasalonika wu a ti̱m Makadoniya di̱n ki̱nu n Aristakus, n we n ti ni̱n.

³Bafi̱nenangeko ni̱n lam Sidon. N Yuliyus a maka Bulus, a du ki̱n a ya bwana fati̱bi̱ ki̱me ke n chi a maka ki̱n.

⁴Yo Nang kun ki̱ni kwa̱mbi̱re mwe, ki̱fi̱be mwe a yingle ni̱n. Di̱ne yiko ni̱n bunti̱ kuteng Saiyifuru ba̱la̱ngu ki̱fi̱be a ne dukan wengu.

⁵A kutengu nang yabu nabwe la ti̱m Ki̱likiya wu a wume Famfiliya, ni̱n yika Mira, wu a wume ti̱m Likiyame.

⁶We fiko wuduwe ni̱bu ki̱rang Romame a bau wuka kwa̱mbi̱re mwe Aleksandiriya wu ki̱yika ti̱m Yitaliyame, a yo ni̱n we.

⁷Ni̱n ma ditiyu nabwen yayu a ku ni̱mi̱nbu, ni̱n mwata Kinidus yi bawi. Di̱ne ki̱fi̱be mwe a du ni̱n be, ni̱n bunti̱ ki̱ti̱ku bale a ne mwe we, ka nang chikiye a kuteng bekune Kirite a kwati̱na Salomiye.

⁸Ni̱n bunti̱n ki̱ti̱ku laang, ni̱n su fiko bawi, yinu ni̱n lam wuka fi wu ni̱bu ki̱yalu ko yo ni̱re laike ki̱dwan n ti bi̱n Likiyanu.

⁹Yade nang kai ki̱swi we fiko nabwene, yayu a kabbi ki̱ni riye. We ki̱dang kangu ki̱swi a tu a su nabwen, ka nang chikiye di yiye yafudame wu a da̱uku dimwen ki̱letiye a su. Yinu m Bulus a ngau chimi̱n ki̱kure.

¹⁰N ki̱n a yi chi ko, “Ni̱bu, n ku yayu wu yaka bwiladu, yaka yo chitu nabwen ka twiyadu, chi ka twiyade n ke kana kwa̱mbi̱re mwe n ti kuli̱n, ti̱kuri chi̱retu n wetuwe.”

¹¹Aya n Yuliyus a kebu ki̱ni ya̱m Bulus, n ki̱n a ki̱la a ke ya̱m ni wu ki̱sii kwa̱mbi̱re mwe n ti wu kwa̱mbi̱re mwe n wu ki̱ne.

¹²Yade fi n chi ka fi̱kande a lebu we kwa̱mbi̱re mwe ka sa̱na̱ng wenge, duwe chi kwang a ke ko chi chakakku ki̱ni yayu, ka we chi lam Finikiya ke chi ma sa̱na̱ngu a bwako. Finikiya wuka fi wu kwa̱mbi̱ri mwei ki̱ tiindu a Kirite wu ki̱da̱ng ki̱twale n ti tibe ki̱twale n ti twa̱r wuli̱n.

¹³Yo ki̱fi̱be a mwe ki̱kunedu we twa̱r wuli̱ni bayim bayi̱me, ni̱bu a da̱u ko chitu ka swe bunge. N chi a wuwe ka̱mbi̱ru ki̱tau kwa̱mbi̱re mwenu, a bunti̱ bekune mwe wu a Kirite, ki̱dwan n ti ki̱ti̱ku laangu.

¹⁴A tibu ke di̱kan di̱bwilan ki̱fi̱ben a chire a bale tibe kir kulane n ti twa̱r a fwale suuu we bekune mwe.

¹⁵Yinangu ki̱fi̱be a tung kwa̱mbi̱re mwengu, a newe ki̱ni dukan ka mwatu ki̱fi̱benu we. Ni̱n du ki̱fi̱be ki̱ tung ni̱nu a ne chi nang maditu we.

¹⁶Yinangu nang bunti̱ kuteng wukane bekune mwengu, wu ni̱bu ki̱yalu ko Kauda, ki̱fi̱be a swe bunge we fiko, ni̱n wuwe be kwa̱mbi̱re mwe bawi ki̱dwan n ti kwa̱mbi̱re mwe wuduwe.

¹⁷A kuteng ki̱ku n chi a wuwe kwa̱mbi̱re mwe wuti̱re a yo we wuduwengu, n chi a do bwiyu a kwaba dwati̱tu a kana kwa̱mbi̱re mwe wuduwe ki̱n, ko ke a wuladuwe. Di̱ne n chi ki̱wulu ko kwa̱mbi̱re mwe ke a a ngaudu duru we yane Sirtise, n chi a si̱ku si̱kki̱ni ka̱mbi̱ri a no kukunu ko ke ki̱fi̱be a tung kwa̱mbi̱re mwe a ya yayu n ki̱fwane.

¹⁸Di̱ne muli̱n mwenu, ki̱yingle ni̱nu yinang, bafi̱nenangeko, n chi a mwe ki̱ wo kuli̱nu a kwa̱mbi̱re mwenu ki̱kuru a mwe.

¹⁹We wutare di, n chi a chaku di̱kanu kuli̱n ki̱ni fa̱li chi we kwa̱mbi̱re mwe a fwal a fi̱lang.

²⁰We yiko, ni̱n ma ditiyu nabwenabwen nang kubu di n ti ki̱switiyu. Di̱bwilan ki̱fi̱ben di̱du ki̱riti̱nu a ka di̱ni̱nne. Di̱ne riye, ni̱n da̱u ko nang twiyadu we mwe laa.

²¹Yade a da̱u ki̱swi n chi a chabu chiye, m Bulus a kun a ti we tibe chi a yi chi ko, ni̱bu, ka no ti̱nwe ya̱m mi̱mu mang yi mi ni kunu we bekune mwe Kirite, a no niyang nwebu riye wu.

²²Aya ki̱ka̱ngu mi̱n ngau chimi̱n ki̱kure ti̱mu ni̱ri kwing, a ne ni ka kwala ti̱kuri kite we tibe chi̱n aya ni medu ni kwala kwa̱mbi̱re mwe.

²³Nangki̱n, we kum wu, wuka naba di̱tumbi̱re wu m mi̱n a fa̱la̱ng kange, Kwama wu mi̱n ma ki̱mi̱n nangange, a timituwe.

²⁴A yi ko, “Nwedu tayi we Bulus, a mwintuwe mwang tidu we kakku Kaisarangu. Aya di̱ne mune, bi̱bu ti̱bungadu waremu ka swidu we a li̱me Kwama.

²⁵Di̱ne yiko, ti̱mu ni̱ru kwing ni̱bu, di̱ne n ke bi̱yili̱mu we Kwamami yinangu a fwamiyangu, ka fwedi yiko.

²⁶Aya a mwintuwe di̱bwilan ki̱fi̱benu ka twa̱ki̱ nidu ka yika mi̱n wuka yane bekune mwe.”

²⁷We kum wi kub chiri yaana, di̱bwilan ki̱fi̱benu ki̱fi̱ki̱ kwa̱mbi̱re mwe nabwe laa Meditereniyane, ki̱ni ki̱tangti̱lang kuma̱ng, ni̱bu ki̱sii kwa̱mbi̱re mwemu a da̱u ko kano ni̱n mwata ki̱dwan n ti ti̱mu.

²⁸N chi a swe swa̱n mwenu, aya a lam naniyu kuul ki̱ni wan turau. A kutengu nang chau kakki bayimangu, a sweti̱ ki̱da. A ya naniyu wan turkubu.

²⁹Di̱ne n chi ki̱wul tayu ko ke chi tekaduwe n ti wuka bekune mwe, n chi a kwi ka̱mbi̱ru ki̱ni turenginu n chi yaana a mar we kuteng kwa̱mbi̱re mwengu ko ke kwa̱mbi̱re mwe a kwanti̱duwe.

³⁰Aya ni̱bu ki̱sii kwa̱mbi̱re mwemu a swe tali̱mu ka wulu. N chi a si̱iku wuti̱re kwa̱mbi̱re mwe ko kano ni̱bu ka da̱ddu ko chi si̱ku ka̱mbi̱r di̱du ki̱ni turen we kwa̱mbi̱re mwe wuduwe.

³¹Yinu m Bulus a yi wuduwe naba kune Roma n ti ni̱bu ki̱rangmu ko, “Ka ni̱bu bi̱bu a swebu we mure kwa̱mbi̱re mwe, a ne da ta swide we.”

³²Yo n chi a nwe, ni̱bu ki̱rangmu a mwata ti̱dwatu kwa̱mbi̱re mwetu, a du kwa̱mbi̱re mwe a ya we mwe.

³³Yo ti̱mu a kwiyane, m Bulus a wana chi ko a chau chitu. A yi chi ko, “Wudiye kub chiri yaana, a kana kamaku di̱ne kabu yayuwe a ma bwar, ta chabu ti̱kan chi.

³⁴Di̱ne yiko, mi̱n wana chi̱nu ti̱chau chabti̱tu di̱ne li̱mang bwiyangu. Di̱ne n yim wuka chi̱n a ne kwala kasi no ki̱riyang kangi kiin we dur ki̱nu.”

³⁵Yo a fwa bi̱be, a da̱u ki̱danne, a twa̱ba̱bunitu a wana Kwama, yinu a wulan a nika chi.

³⁶N chi ki̱ni kwang a ya kungku ni̱rangu, n chi a chatti̱ chabti̱tu.

³⁷N ni̱n ki̱ni kwang we kwa̱mbi̱re mwe, kuuliti turau ki̱ni wan ti̱dibiin chiri burukuun.

³⁸Yo n chi a chau a lwe, n chi a kaar chaammu a fwala mwe. Ti̱tu a yo kwa̱mbi̱re mwe a ma wayang.

³⁹Yo ti̱mu a kwiyane, ni̱bu ki̱sii kwa̱mbi̱re mwemu a yimbu bwa chi a ngan dure. Aya n chi a swaan wuka fwiti̱ne ki̱swaiye n chi a bunte. Yinu n chi a funti̱bwi a sii kwa̱mbi̱re mwe ko chi yodu a yane ka we fwede.

⁴⁰N chi a mwata dwa̱ti̱tu a ka̱mbi̱r di̱du ki̱ni turenu, yinu a duwe mwe. We ki̱swi wuko n chi a kwi ki̱lwade we chi ki̱ tung kwa̱mbi̱re mwe. Yinu n chi a kuku ka̱mbi̱ru a kakku kwa̱mbi̱re mwenu yinangu ki̱fi̱be ka medu ka tungdi kakangu. N chi a yo dur kwa̱mbi̱re mwenu a bale mwe.

⁴¹Aya yo nang lam fi mwe ki̱ngabande, kwa̱mbi̱re mwe a ku yane, a yo dur kwa̱mbi̱re mwenu a le yane ki̱ri̱ng. We bale kutenge, kwa̱mbi̱re mwe a mwe ki̱ngi̱radu di̱ne di̱bwilan labi mwetu.

⁴²We fiko ni̱bu ki̱rangmu a kun ki̱baddu ka chi̱be ni̱bu ti̱bi̱nti̱limu, di̱ne ke wuka a wullu a swiduwe.

⁴³Aya naba kune wuduwe di̱ne a ke ka yu Buluse, a ko ti̱kuran ti̱tu. Yinu a ni da ko ka nang wuwule niye wu a me mwe, a chir a yu yikiyu a yika ki̱ti̱ku laangu.

⁴⁴Bi̱kamu a fi̱l bwi kwa̱mbi̱re mweyu, bi̱kamu a fi̱l ti̱wulani kwa̱mbi̱re mwetu. Nang tiyangu n chi a chir mi̱n we laa li̱mangu.