Read tula Nangi̱n Fandubi̱m 28 Bible Online

Nangi̱n Fandubi̱m 28 - tula bible

Nangi̱n Fandubi̱m 28

¹A kutengu nang swiyangu, be ni̱n swaan ko di̱n bekune mwenu Malta.

²Ni̱bu bi̱n di̱ki̱nu a ma ni̱mi̱n ki̱li̱mangu nabwenabwen. N chi a yiu ni̱n ki̱ni fa̱li yurau, a mwa ni̱mi̱n ki̱rang di̱ne ki̱swiye mwe, ti̱mi ki̱ri̱m.

³M Bulus a kare tiniyu ki̱ki̱bu ki̱rangu. Wuka soo wu kwane a chire we tiniyu di̱ne ki̱rangi kwise, a dum Bulus a kwasatuwe fa̱la̱ngu.

⁴Yinangu ni̱bu bi̱ni̱mu a ku soo a yabi yangki̱li̱ng we fa̱la̱ng Bulusangu, a fwa we yichiyu ko, “Nii wu ki̱chi̱be dutu, kasi ki̱ku n ki̱n a swi we muli̱n laanangu, a mwintuwe ka bwadu di̱ne ki̱leti ni̱biyu we dur ki̱nu.”

⁵M Bulus a wasu fa̱la̱ng kangu, soo a swituwe ki̱rangu. N ki̱n a nwebu burang.

⁶N Chi ki̱kamadu ko fa̱la̱ngu ka muddu, m Bulus ka yaru we ti̱mu ka bwa ti̱nu. Aya yo n chi a da̱u ki̱twalang a ku chi a fwebe, n chi swanan ko n ki̱n wuka Kwama.

⁷We fiko kuu we, n wu tikake bekune mwe wuko, wu di̱n ki̱nu n Fubiliyuse. N ki̱n nang wu a yiu ni̱n, a ni ni̱n fi wu yile wu nang fi̱kan we diti yitta.

⁸N te Fubiliyuse n we fi a dami̱ne di̱ne ki̱kwam ki̱sweti̱ ki̱tuum. M Bulus a le a twa̱ba̱ ki̱mi̱n bunitu, ni wu a be we burangu.

⁹A kuteng ti̱tangu, ni̱bu a bubuwemu we bekune mwe a kiyawe ki̱ti̱bu ki̱be bwa a di̱Buluse ki̱ya beku.

¹⁰N chi a mi̱la ni̱n nabwen. Yo a lam nang kunu ki̱ni kwa̱mbi̱re mwe, a bau ni̱nmi̱ne chitu ni̱n badditi kwang.

¹¹A kuteng swarti ti̱tangu, ni̱n kun ki̱ni kwa̱mbi̱re mwe Aleksandiriya wu a ma sa̱na̱ngu we fiko, ti̱nti̱ne ni̱bu a mu ki̱mi̱n dutu ti̱yobi kwamati turau.

¹²Yo nang lam Si̱rakuse, ni̱n ma diti yitta we fiko.

¹³Ni̱n kun we fiko ni̱n yikan ni̱n fwadu a Rikiyum. A kuteng di wiinangu, ki̱fi̱be a chire a kir kulan, aya bafi̱nenangeko ni̱n fwadu a Futiyoli.

¹⁴We fiko ni̱n teka mi̱n n ti bi̱kam kebu ni̱bu bunti̱ki̱m. A wana ni̱n ko ni̱n ma ditiyi yidibiin n ti chi. Ki̱ni yiko, ni̱n lam Roma.

¹⁵Yinangu kebu ni̱bu bunti̱ki̱mu a Roma a nwe beki̱ nangu, n chi a chire beki̱yiu ni̱n a kwa̱ma̱r Afiyus n ti fi ni̱bu ki̱yalu ko lo fi̱kare wu a taban chi yitta. Yo m Bulus a ku chiye a wana Kwama, a sub a yati̱ dukanu.

¹⁶Yo nang le Roma, ni̱bu a du Bulus n ki̱kun n ti niwu ki̱to ki̱ne.

¹⁷A kuteng ditiyi yittangu, m Bulus a yal bi̱duumu ni̱bu Yafudamu. Yo a murane a yi chi ko, “Kebu mi̱m, kasi ki̱ku mang mabu ki̱le we ni̱bu chiremangu, ka ki̱le wu a da tukebu chi̱reme, a mwintuwe ni̱bu a tai we Wurchalima, a yi ni̱bu Romamu ko a kwai.

¹⁸Yo n chi a ya̱nti̱la ya̱m mi̱me, a ke ka mariyu, di̱ne n chi a yaibu ki̱ni wuka ki̱le wu a lwe ni̱bu ka chiye.

¹⁹Aya kuu ni̱bu Yafudamu a ko, a kammi ki̱ng mang su kakku ki̱ni ya̱mu a di̱ Kaisare kasi ki̱ku n ke ko mi̱n Mai keme ni̱bu chi̱reme.”

²⁰Nang chi a yo mang bau mang ku chi̱ne di̱ne ke n twayan n ti chi̱n yo chitu a kau di̱ne n ki̱n wu ni̱bu Yisrelamu ki̱yon ni̱ru we beki̱ kange ni̱bu a kwai ki̱ni maki̱lan.

²¹N chi a yi ki̱n ko, “Nang yabu di̱kan lwangi̱n di̱du a chire a yaa Yafudiya ki̱ni di̱n muni̱n, a neti̱ wuka ke chire we wu a be fi ki̱ni ya̱m mume we, ka ki̱ni bi̱kam ya̱m bi̱bu a li̱mbi̱me we dur mune.

²²Aya ni̱n baddu nang nwe ti̱kuran mwitu a yiimo, di̱ne chi nang yimitu nang wa̱re wufwiye wu n kawure ki̱fwa ya̱mu we dur ki̱ne.”

²³Yo n chi a do di ka tekandu n ti Buluse, n chi a be ngaban a fi n ki̱n a si̱ki̱ mi̱ne, n chi nabwenabwen. Kanga mwe mi̱ni sinangu, di li̱ti̱u n ki̱n ki̱ma chimi̱n di̱mwar yaa Kwamanu. Ki̱funti̱bwi ka wuwe chidu a bwa di̱Yesuwe, we miyaki̱ kangu ki̱bunti̱ yili̱n Musaitu n ti tatti̱ki̱dai fa̱kube.

²⁴Bi̱kamu a ke chitu n ki̱n a fwatu aya bi̱kamu a ko a kebu bi̱yili̱mu.

²⁵Bi̱ngai a ki̱la le tibe chi. N chi a yara ba̱li̱n ti turau. Yo n chi a tibu yarade, m Bulus a mar chimi̱n di̱kwa̱l yiini diin ko, Fi̱ki̱m Kwamamu a fwa bi̱yili̱m yo a fwa tukebu chi̱remu mi̱n a yii fa̱ku Yichaya ko,

²⁶“Ya fi a ni̱bu bi̱be n yii mwiko, ta nwe ya̱m mi̱mu, aya a ne ta swaanu ko bayim ta ni̱n dang chitu aya ne ta swiru.”

²⁷Di̱ne ni̱tu ni̱bu bi̱bitu a ma ki̱ngki̱ng. N chi a tal ki̱teli chiyu, a yi̱nge nuiyi chiyu. Ko ke chi kuduwe chi nwe ti̱nuwe, ka swaangke. Ka lami̱nti̱ yo n chi ka ki̱la fi a di̱mi̱ne mang be chidu.[15]

²⁸“Di̱ne yiko, a dakan ta swaanu ti n Kwama a tum ya̱m yukumu a lanti̱ yikayu kuuti. N chi ti̱n ka si ki̱tele.”

²⁹[Yo n ki̱n a fwa bi̱be, yinu ni̱bu Yafudamu a le ki̱tukadu ki̱ni dukan we tibe chi.]

³⁰M Bulus a swe we lo fi̱kare wu swa̱ti̱ti turau. Ki̱yiu ni̱bu ki̱be fi a di̱ki̱nemu kasi no m bi̱wure

³¹Yo kwer ni̱bu a dangbu ki̱n di̱mware, n ki̱n a chakakku ki̱ma di̱mwar yaa Kwamanu, ki̱miya ni̱bu mi̱n ya̱m Tewuduwe n Yesu Masiyamu a ne tayi we.