Read tula Nangi̱n Fandubi̱m 3 Bible Online

Nangi̱n Fandubi̱m 3 - tula bible

Nangi̱n Fandubi̱m 3

¹Wuka di m Biti̱r n ti Yowana a ya Kan Kwamanu a ki̱swi twa̱ba̱ku buniyange, yo ki̱swi a yitta wu kukonge.

²We kwa̱r di̱du n chi ki̱yalu ko, “A Lelenu” Wuka nii we wu ni̱bu a bi̱u ki̱kube, be ki̱swedu we kwa̱ru. Kanang wuwule diye ni̱bu ki̱da̱a̱du beki̱yodu we kwa̱ru ko ke a ka̱la chitu we ni̱bu a be Kan Kwamani̱mu.

³Yo n ki̱n a ku Biti̱r n ti Yowana ki̱dangu a ya ka le Kan Kwamane, a bi̱u chi ka̱mbi̱r.

⁴M Biti̱r n ti Yowana a swati̱ kabuwe ki̱da̱ngdi ri̱i̱ng yinu a yi ki̱kube ko, “Da̱ng ni̱ne!”

⁵Ti̱kuran ki̱kubetu a ki̱la bwa a di̱chiye ko kano yaka ni ki̱n ti̱kan chi.

⁶Aya m Biti̱r a yi ki̱n ko, “Bwa ka̱mbi̱re m mi̱n n newe ki̱n. Aya chi mi̱ni ki̱ne mang ni̱nu. We di̱n Yesu Masiya naba Nasa̱rete kun! Ya yayu.”

⁷M Biti̱r a tau ki̱n we fa̱la̱ng ki̱yilangu, a maka ki̱n a kukku. Bi̱nabi̱na nani nii wu we n ti kwabsi̱ri kitu a kwiratuwe.

⁸N ki̱n a kunni ngi̱ri̱t, a tii tas, a mwe ki̱ya yayu ki̱ bungadu n ti chi, a le Kan Kwamanu ki̱ni ti̱rirantu ki̱dela Kwama n ti ni̱bu.

⁹Ni̱bi kwang a ku ki̱n ki̱ya yayu ki̱dela Kwama.

¹⁰N chi a swaan ki̱n ko n nang ni a no ki̱swedu ki̱ka̱la chi a kwa̱ru a lelenu. Chi a fwetu, a ya̱r chi yii yinang yinang.

¹¹Yinangu ni̱bu a ku nii wu a no ki̱ka̱la̱ chiye a tau Biti̱r n ti Yowana a titiyengu, ni̱bu a kiyani ngi̱ti̱bu be ka da̱ng chi ya̱r yiitu a fwe a ki̱di̱ng Solomonangu.

¹²Yo m Biti̱r a ku ni̱be, a yi chi ko, ni̱bu Yisrelamu, a mayire ki̱ya̱r chi̱n yiiye? A mayire ti̱da̱ngdu yinangu na mangi dukan ni̱ne? Ti̱da̱ngdu ti kano di̱ne ni̱n bunti̱n ya̱m Kwamame nang chi a yo nii wu a benga.

¹³N Kwama wu Yibrayime, n ti wu Yichaku n ti wu Yakubu we n ti Kwama tukebu chi̱reme, a ri̱ka bwe nanga ko n Yesu. Nang wu ta kwa̱l ki̱n ta koti̱ ki̱n we kakku Kwabna Bi̱latusange kasi ki̱ku m Bi̱latu a funti̱bwi ko ka marangu.

¹⁴Tiko wu wauwade n ti wuyile ti̱yi ko a mar chimi̱n naba kakku durange.

¹⁵Ti̱chiu ni wu nang mweku ti̱kuriyangi siine. Aya n Kwama a kuki̱ ki̱n we bi̱bwari̱mu. N ni̱n, ni̱n ku ki̱ni nuini.

¹⁶Di̱ne keku bi̱yili̱mangu we di̱n Yesunu, a ni nii wu dukan di̱du bwe a yaan beki̱nu. Chi ta ku ta yim a fwe di̱ne keku bi̱yili̱mang we di̱n Yesunu. Keku bi̱yili̱mang a di̱n Yesunangu a yo burangu a be we nui chiyu.

¹⁷Kebu mi̱m, n yim ti̱ma ti̱tu, a kwalan swaanke, yinangu tikaketi chiyu a mangu.

¹⁸Aya n Kwama a ri chitu a fwa a yii fa̱kubu ti kwang ko, “M Masiya ka nwe riye.”

¹⁹Di̱ne yiko, ti̱wo ki̱ti̱m, yinu ti̱bunti̱ Kwama ke a nura chi̱n we ki̱letiyu, ka ni chi̱n ni̱r di̱fwin.

²⁰Yinu ka tume Masiya, wu n Tewuduwe a sutu chimi̱ne n Yesu.

²¹A mwintuwe n Ki̱n ka swedu a dii ka lami̱nti̱ ki̱swi n Kwama ka marti̱ chitu we kwang ka kau ti̱fwiye, yinangu n ki̱n a fwa fa̱kubu bi̱bi wauwadi̱mu mi̱n ferediyangu.

²²Di̱ne m Musa a fwa ko, “N Kwama Tewuduwe ka tum chimi̱n wukane fa̱ku yinang mi̱n we kebu chimu, ti̱nwe kasi no bi̱bi̱le ya̱m bi̱bu ka fwa chimi̱ni̱mu.”

²³Ka kadi yiko, wu a neka nwe ya̱m fa̱ku wume, ni̱bu ka chaku ni wu we tibe kal ki̱ne, ka dudu a twiyang.

²⁴Ki̱kumang, yinangu a mwe we di̱faku Samwilangu a lanta fa̱kubu ki̱ka̱ngi̱mu, n kawure a fwa ya̱m we di̱kalan di̱du.

²⁵N ti̱n nang bwesi̱m fakubi̱m. N ti̱n ti̱leti̱ bwa̱ki̱ku Kwama a ma n ti tukebi̱ chimangu. N Ki̱n a yi Yibrayim ko, “Ti̱ti̱nitu ka ya delaku a fa̱la̱ng bukebu mumu.

²⁶Ki̱dangu Kwama a kuki̱ bwe kongu, a tum ni̱bu Yisrelam mi̱n. Ka dela chi̱nu di̱ne ka yo chi̱nu ta ki̱la we wa̱re dere, ta du ki̱leti chiyu.”