Read tula Nangi̱n Fandubi̱m 7 Bible Online

Nangi̱n Fandubi̱m 7 - tula bible

Nangi̱n Fandubi̱m 7

¹Tikake Fansetiye a bi̱u Yistifanu ko, “Ya̱mi yiyu ni̱bu a fwa a dur muniyu bi̱yili̱ma?”

²N ki̱n a ki̱nta chi ko, “Kebi̱mi̱m n ti tebi̱mi̱m ti̱nwei. Kwama wu ki̱ni dwiyene a yung dur ki̱nu we tuke chire n Yibrayim a Mesofotamiya yo a tibu yika Aran ne.

³N Kwama a yi ki̱n ko, kun we ti̱m chimu, ‘Du kebu mumu, yika ti̱mu mang yungi̱ni̱mu.’

⁴“Tuke chire a du ti̱m Kaldiyamu a yikan a ya swe a Aran. A kuteng ki̱ku n te ki̱n a bwangu, yinu n Kwama a yo ki̱n a be swe we ti̱mu bi̱bu n ti̱n we mi̱ni̱mu.

⁵N Kwama a nibu Yibrayim kula ti̱m bi̱be kasi a no be dungkwale yinang wana na. N Kwama a bwa̱u kana ya̱mu n ti ki̱n ko, ka yo ti̱mu ka kau bi̱ki̱m n ti bukebu ki̱kuti̱ribekom kasi ki̱ku n ki̱n a ne bwe we ki̱dang kangangu.

⁶“N Kwama a yi ki̱n ko, ‘Bukebu ki̱kuti̱ribemomu ka ma ka̱bi a bi̱kam ti̱m. Ni̱bu ti̱mi̱mu ka mar chi yinang ka̱bi, ka ni chi riye swa̱ti̱tu kuliti taana.

⁷Mang wela kuu ni̱bu bi̱bu Yisrela ki̱ma chimi̱n ka̱bimu. A kuteng ki̱ku, bukebu ki̱kuti̱ri̱me Yibrayime ka kunu ka sii ki̱nu we ti̱m bi̱bu.’

⁸Yinu n Kwama a ma bwa̱ki̱ ya̱mu n ti Yibrayim a biku laarang. Yo n Yibrayim a bi̱u Yichakuwe, a bi ki̱mi̱n laaru a di wu nari̱be. N Yichaku a bi̱u Yakubu, n Yakubu a bi̱u tukebu chi̱remi kub chiri burabi̱mu.

⁹“Tukebu chirem bi̱bu, yade ki̱nwe ki̱fwini Yusufuwe, n chi a feku ki̱n, ni̱bu a yikan Masar. Aya n Kwama we ki̱to ki̱nu.

¹⁰N Kwama a chaku ki̱n we riye. A yo ki̱n a kau naba yingke wu ki̱ni ki̱siyang ki̱duwang we kakku Mai Firauna wu a Masare, n Firauna a yo ki̱n a kau kwabna we Masaru n ti tikaketi ni̱bu a lokomu.

¹¹“Yinangu diti ki̱sudangu, chun a bulma ti̱m Masari̱mu n ti Kanana ki̱ni riye nabwen wu a yo tukebu chi̱remu a kwala chabte.

¹²Yo n Yakubu a nwe ko chabti̱tu we Masare, a tum tukebu chi̱remu we. N chi a no yaanbuwe.

¹³We yayu chi wu robe, n Yusufu a yung kebu ki̱mu dur ki̱nu, yinu a yungti̱ Firauna kebu ki̱mu.

¹⁴“A kuteng ki̱ku n Yusufu a tum chitu ko ki̱baddu ka ku teki̱n Yakubu we n ti kebu ki̱mu. N chi ki̱ni kwang wani ti̱dibin chiri bunu.

¹⁵N Yakubu a kun a yika Masaru, bwa n ki̱n a ya bwaan ti̱ne n ti tukebu chi̱remu.

¹⁶Ni̱bu a da̱a̱ kwa̱mi chiyu a be mi̱ne Chekem. A fur chi a fur di̱du n Yibrayim a ta̱ni ka̱mbi̱r a fa̱li bwesi̱m Amor we Chekem.

¹⁷“Kangu ki̱swi a mwatan wu bwa̱ki̱ Kwamangu n ti Yibrayim ka ridangu, ni̱bu a ki̱la a bwi a ri Masar yinang yinang.

¹⁸Yinu ni̱bu a sutu wuka Mai, wu a yimbu ka n Yusufu n wure we Masar a be a ma mati̱ntu.

¹⁹Mai wu a be sul kuu chire, a ni tukebu chi̱remu riye, ki̱yodu ni̱bu ki̱mar bwesi̱m ki̱lwim chimu a bwa ko ke a kaduwe.

²⁰“We ki̱dang kangu ni̱bu a bi̱u Musa, n kebu ki̱yili̱n bwe. N chi a bwa̱u a lon teki̱ne swarti ti̱tta.

²¹Kangu n chi a ya mare bwengu, fwa̱n Firaunanu a ya da̱u bwe, a do yinang bweko.

²²Ni̱bu yungku a Masari̱mu a yung Musami̱n chitu ni̱bu a yim a Masariti kwang. Ya̱m ki̱mu n ti nangi̱n kiti kwang ki̱ni dukan.

²³“Yo m Musa a lam swa̱ti̱tu wan taanange, a kur ko yaka siiye kebu ki̱mu ni̱bu Yisrelamu.

²⁴Yo n ki̱n a ku wuka naba masare ki̱ ni naba Yisrela riyenge, n ki̱n a ya maka keko a chitti̱ naba Masare.

²⁵M Musa a kaman ko kano ni̱bu ki̱mu ka swaanu ko n Kwama ki̱ma nangangu ki̱ni ki̱n di̱ne ke a yu chi, aya n chi a swaanbu.

²⁶Bafi̱nenangeko m Musa a ki̱la ku kana Yisrela ki̱kuladu n chi burau. Yo n ki̱n a be ka doka chide a yi ko, ‘A mayire n ti̱n kana kebu ti̱badu ta nwe dutu chi̱ntu mi̱n riye?’

²⁷“Aya wu a no ki̱ni wukane riyenge a tung Musa kursu a ki̱swi ko, ‘N wure a yo mun tikake n ti naba kabake we dutu ni̱ntu?’

²⁸Yoye mun baddu mwan chitti̱ mi̱nu yinangu mwang chi̱u naba Masare darenga?

²⁹“Yo m Musa a nwe ya̱m bi̱be, a wul ti̱n a yika ti̱m Midiyam, a ya ma rungkoitu we bwako, a bi̱tti̱ bwelemi burau we bwako.

³⁰“A kutengu swa̱ti̱tu wani taanangu, wuka naba di̱tumbi̱re a fwe Musa mi̱ntuwe be di̱lukene ki̱tau ki̱range ki̱dwang n ti kun Sinayin.

³¹Yo Musa a kuwe, chitu a ya̱r ki̱n yii. Yo n ki̱n a ya ki̱dwan, a nwe ker Tewuduwe ko,

³²‘Mi̱n nang Kwama tukebu mume, Kwama Yibrayim n ti Yichaku n ti Yakubu.’ Bwi we di̱Musa ki̱mi̱ka ka mi̱kaku a yabu dukan da̱ngki̱nu.

³³“Yinu n Tewuduwe a yi ki̱n ko, ‘Suku ki̱wami mwiyu, di̱ne finu mwan timi̱ne yi wauwadu.

³⁴N ku riye ni̱bu ki̱ni ni̱bu mi̱mu a Masare. N nwe wi chi, m be mang yu chidu. Di̱ne yiko, do bwiyu mang tunnu a Masar.’

³⁵“M Musa nang wu wiine, wu n chi a ko, a yi ko, ‘N wure a yo mun ko n kau ni̱mi̱n wusele n ti naba mwatake?’ N Kwama a tumme naba di̱tumbi̱re a fwa ki̱mi̱n ya̱mu ki̱ni ben ki̱ran a be di̱lukene ko ka kau tikake n ti wu ka yu chi̱ne.

³⁶N ki̱n nang wu a chake chi we Masaru di̱ne chi ka̱ta̱kitu n ki̱n a maatu n ti ti̱mwalantu nabwen a yung a Masar n ti nabwe Laa wu wure[1] ki̱ni rudde n ti di̱kiru swa̱ti̱tu wan taanatu.

³⁷“Wu nang Musa wu a fwa ni̱bu Yisrelamu mi̱n ko, ‘N Kwama ka tum chimi̱ne wuka fa̱ku we kebu chimu yinangu a tume mi̱nangu.’

³⁸N Ki̱n nang wu a mur ni̱bu Yisrelamu we di̱kiru n ti Naba di̱tumbi̱re wu a fwa ya̱m n ti ki̱n a Kun Sinayine. N ki̱n nang wu a yuwe di̱kwa̱l ti̱kurinu we di̱Kwama di̱ne ke a be ni chiniye.

³⁹“Aya tukebu chi̱remu a ko a bunti̱bu ki̱n, a koti̱ ya̱m ki̱mu, n chi a no ki̱badu ka ki̱la Masar.

⁴⁰N chi a yi Aruna ko, ‘Ma nimi̱n di̱yor di̱du ka twa̱ku ni̱ne. Di̱ne we ti̱kaman ni̱ntu, m Musa wu a chaku ni̱ne a Masare nang yimbu chitu a fweti ki̱nitu.’

⁴¹We ki̱swi wuko, n chi a mu di̱yor yinang tangka. Yinu a ma di̱yoru mi̱n niku ki̱tumang. N chi ki̱ma ki̱ni ti̱mi̱lan di̱ne nangang fa̱li chiyangu.

⁴²“Di̱ne yiko n Kwama a ni chi kuteng, a du chi ko a nang sii ki̱switiyu. Ti̱tu a wuran bwi ki̱ni chi fa̱kubu a mwal we tatti̱ki̱dai yika̱riyu ko, ‘N ti̱n ni̱bu Yisrelamu, ti̱bita mi̱mi̱n naiyu n ti niku ki̱tumangu, we swa̱ti̱tu wan taana a di̱kira?

⁴³A ta le ti̱ma di̱bwalu n ti di̱yor Moleki̱n, n ti ki̱swi di̱yor Rifan, di̱yor di̱du ta ma di̱ne ke ti̱nang sii ki̱nu. M mi̱n mang chaku chi̱nu ta ya ka̱bi a Babila.’

⁴⁴“Feredi tukebu chi̱remu a no ki̱ni di̱kur di̱du ki̱yungdu Kwama we n ti chi̱nu we di̱kiru. Di̱du nang di̱kuru n Kwama a yi Musa ko a ma tituwe yinangu n ki̱n a kuu mi̱nangu.

⁴⁵Tukebu chi̱remu a be chau kula ti̱kubi ti̱te, n chi a chakakku ki̱ni ti̱kubi ti̱tu we ki̱dang Chosuwangu a kutengu n chi a chau ki̱la ki̱ni yikayu kuuti n Kwama a kaka chi mi̱niyu. Ti̱kubi ti̱tu a kaiyabu a lami̱nti̱ ki̱dang Daudangu.

⁴⁶N Dauda a le ni̱r Kwamanu di̱ne n ki̱n a bau ti̱ni fi ka run di̱kur siiku Kwama tuke chire n Yakubu.

⁴⁷Aya n Solomon nang ni a mu lon Kwama.

⁴⁸“Kasi ki̱ku Te wuduwe a swebu a loni yiyu ni̱bu a mubbi Fa̱liye. Yinangu fa̱ku Yichaya a fwa ko,

⁴⁹‘Dii nang lon mati̱ne mi, ti̱ti̱nitu nang fi mi̱n tari̱n naniye N Tewuduwe ko, Ta mumi bi̱bi̱le ki̱dum lom? Wuwule ki̱dum lo fi̱kare wu ta domide?

⁵⁰M mi̱n n ke wu a yo kwali̱n chiin di̱da?’

⁵¹“N ti̱n bi̱bu ta nwebu diimu, bi̱bu ni̱tuti ki̱ngki̱ng, ki̱teli chiyi yi̱si̱ni̱mu, ta bunti̱bu Fi̱ki̱m mi̱mi kwadu yinangu tukebu chimu a mangu, n ti̱n ti̱mati̱di yiko.

⁵²We fa̱kubi̱bi, bi̱kam we bi̱bu tukebu chimu a dubi̱ma? N chi a chi̱u ni̱bu bi̱bu a fwa beku nii naba ni̱ri di̱ne wu. N ti̱n ti̱kwa̱l ki̱n ti̱chiti̱ ki̱n.

⁵³Ti̱n nang bi̱bu ta yiu yilangu we naba di̱tumbi̱re Kwama, aya ta bunti̱bu yili̱ntu.”

⁵⁴Yo n chi a nwe ya̱m bi̱be, a ma ki̱fwini n kawure ki̱wu bewure di̱ne kaiyan ni̱re.

⁵⁵Aya di̱ne n Yistifanu a rii ki̱ni Fi̱ki̱me, n ki̱n a fwal nuyi kiyu ki̱da̱ng ka dii. N ki̱n a ku dwiyen Kwamatu n ti Yesu a ti a kang ki̱yilang Kwamang.

⁵⁶We fiko n Yistifanu a yi chi ko, “Ti̱da̱ng, n ku dii a wuden, n ku Bwe Nii a ti a kang ki̱yilang Kwamang.”

⁵⁷N chi a yinge ki̱teli chiyu ki̱ni Fa̱li ki̱bwa̱kati̱ kemiyu, a kiya ki̱mi̱ntuwe ki̱ti̱bu.

⁵⁸N chi a chaku ki̱n a kuteng bi̱nang ki̱kweladu ki̱ni ki̱ni kali. We ki̱swi wuko, ni̱bu di̱mwari̱mu a yo kuli̱n chi̱nu a nani wuka bwele di̱n ki̱nu n Chawulu.

⁵⁹N chi a kwela ki̱n ki̱ni kali. N Yistifanu ki̱twa̱ba̱ bunitu ko, “Tewuduwe Yesu, yiu ti̱kuri mitu.”

⁶⁰N ki̱n a sung a kuku keru ki̱ni dukan ko, “Tewuduwe kuru ki̱leti ni̱bu bi̱biyu we.” Kanga fwa bi̱bangu a bwa ti̱n.