Read tula Nangi̱n Fandubi̱m 8 Bible Online

Nangi̱n Fandubi̱m 8 - tula bible

Nangi̱n Fandubi̱m 8

¹N Chawulu a ke ko ni̱bu a chi̱u Yistifanu, n Chawulu ki̱fuma ni̱bu bunti̱ki̱mu a bwinbu kaang ba̱la̱ng we Wurchalima. Ti̱tu a yo ni̱bu bunti̱ki̱mu a yarani yak a le ti̱m Yafudiyam n ti di̱du a Samariyam a du ka fandubu.

²Bi̱kam ni̱bu Kwamam bi̱bu a ru ni̱ti̱mu a yikan a fure Yistifanu a siiti̱ bwako.

³Aya n Chawulu a chakakku ki̱fuma ni̱bu bunti̱ki̱ we kambi Kwamatu, ki̱bunti̱ loni loni, ki̱taba kwartabu n ti nati̱bu ki̱maru a di̱bi̱nti̱l.

⁴Ni̱bu bunti̱ki̱mu a yayyani̱mu, a chakakku ki̱mwa ya̱m Kwamamu we bwa n chi a ngan dure.

⁵N Filibu wu a ya di̱kan bi̱n a Samariya, a chakakku ki̱mwa ya̱m bi̱li̱m Masiyamu we bwako.

⁶Yo ki̱tuu ni̱be a nwe ya̱m bi̱li̱mu we di̱Filibu we a ku di̱mwal chi ka̱ta̱kitu n ki̱n ki̱madite, n chi a swe wudidi ki̱nwe ya̱m bi̱li̱mu.

⁷Ki̱fi̱bti yi bwilayu a chir we ni̱bu nabwen ki̱bwa̱ka kemi, bi̱ngi̱rmani̱mu n ti ki̱kubti nabwen a ya beku.

⁸Di̱ne ti̱te, bi̱n di̱ki̱nu diko a ri ki̱ni ka ti̱mi̱lan.

⁹We ki̱dang kangu, wuka nii we di̱n ki̱nu n Simun. Feredi n ki̱n a no ki̱ma buwang we bi̱n di̱ki̱nu. We kuu ni̱bu Samariyamu kwang, n ki̱n ki̱yung ni̱bu ko n ki̱n ti̱kan chi.

¹⁰Ti̱tu a yo ni̱bi kwang we bi̱nu, seli̱bu n ti bwesi̱mu ki̱yidu ko, “Nii wu ki̱ni dukan Kwamanu ni yalu ko, dukan di̱duni̱nu.”

¹¹N chi ki̱bunti̱ ki̱nu di̱ne chi ya̱r yitu n ki̱n ki̱madu we buwang kangitu.

¹²Aya yo n chi a ke bi̱yili̱mu we di̱mwar Filibu di̱du a ya̱m bi̱li̱m yaa Kwamanu a di̱n Yesu Masiya, kwartabu n ti nati̱bi kwang a ma batisma.

¹³N Simun ti̱n a keti̱ bi̱yili̱mu a mati̱ batisma. A kuteng ki̱ku a ma batismangu, a dubu Filibu ki̱nabi̱du kasi no ka ya bwa̱le. Aya n ki̱n a ya̱r yii we chi ki̱yungde n ti chi ka̱ta̱kitu n ki̱n a kuutu.

¹⁴Yo fandubu a Wurchalimamu a nwe ko ni̱bu a Samariyamu a yiu ya̱m Kwamame, a tung Biti̱r n ti Yowana we di̱chiye.

¹⁵Ki̱dangu n bi̱u Biti̱r a lam fikongu, a twa̱ba̱ bi̱bu a yiu Kwamamu mi̱n ko ke a ya Fi̱ki̱m Kwamamu.

¹⁶Di̱ne Fi̱ki̱m Kwamamu a tibu be wuka mi̱nedu didine. N chi a ma kana batisma we di̱n Yesu Tewuduwe.

¹⁷M Biti̱r n ti Yowana a yo chi mi̱n Fa̱liyu we dutu chitu, yinu n chi a ya Fi̱ki̱m Kwamamu.

¹⁸Yo n Simun a ku ni̱bu a ya Fi̱ki̱m Kwamamu di̱ne Fa̱liyu fandubu a yo chimi̱niye, a ni chi ka̱mbi̱r,

¹⁹a yi chi ko, “Ti̱ni mi̱n da wu, ke ka nang wuwule niye wu mang yo ki̱mi̱n fa̱liye, ka ya Fi̱ki̱m Kwamamu.”

²⁰M Biti̱r a yi ki̱n ko, “M mun n ti ka̱mbi̱r munu yati̱kaiyan, di̱ne mun kuru mwi mwang ta̱n Fi̱ki̱m Kwamamu ki̱ni ka̱mbi̱r.

²¹A ne lwangang mwang we n ti ni̱n, di̱ne ni̱r munu a newe n ti Kwama.

²²Wo ki̱ti̱m we nangang ki̱bwilang mwangu, twa̱ba̱ buni a Tewuduwe, Ka we mwang ya duku di̱ne Nangang ki̱bwilang mwange.

²³Di̱ne n ku ti̱tu ka kati̱n, mun ma chi a lebi.”

²⁴N Simun we fiko ko, a twa̱ba̱ ki̱mi̱n buni a di̱Tewuduwe ke chitu ta fwatu a fweduwe n ti mi̱n.

²⁵A kuteng ki̱ku n chi a ri ki̱ni di̱mwar Tewuduwe, a ki̱la Wurchalima, yaki̱ mwa ni̱bu a beti̱ bi̱ni Samariya.

²⁶Wuka naba di̱tumbi̱re Tewuduwe a ya Filibu a yi ko, “Do bwiyu subi Twa̱r wuli̱n, a wa̱re wu a chire a Wurchalima ki̱yika Ka̱sa̱.”

²⁷N Filibu a kun, a yika ti̱n. We bwako, wuka ni wu di̱twari̱n a mabu nangange we, wu ki̱tau ka̱mbi̱r di̱du a Mai wuwiye Cheba wu a tau Yitofiyane ki̱ma mati̱n Kandise ki̱ki̱la lo. Nii wu di̱twari̱n ki̱nu a mabu nangange a ya Wurchalima yaki̱ sii Kwama.

²⁸Yo n ki̱n a yaki̱ ki̱la lo, a swe ki̱ki taki̱da fa̱ku Yichaya we dii a di̱bi̱l kwere konu.

²⁹Fi̱ki̱m Kwamamu a yi Filibu ko, “Ya ki̱dwang, kwatuwe di̱bi̱l kwerenu.”

³⁰N Filibu a wul a ya mwatu ni wu, a nwe ki̱ki taki̱da fa̱ku Yichaya. A bi̱u ki̱n ko, “Mwang swaan chi mun kidita?”

³¹Nii wu a yi Filibu ko, n swaan a fi̱re, ka n ke wuka nii ka miya mide? “Yinu n ki̱n a yal Filibu ko, n fi̱le bwa̱le, be swengi ying n miyami.”

³²Ya̱m Kwamamu n ki̱n a no ki̱kidi̱mi ying: “A wu ki̱n yinang kwan di̱du ni̱bu yaka bidu biyen. Yinang kwan di̱du a fa̱ki̱tabi̱ bwin yo ni̱bu ki̱bi ki̱mi̱n riin, a fwabu chi.

³³Ni̱bu a ni ki̱n riye, a da̱ngti̱ ki̱n bi̱yili̱m ki̱mu. N wure ka ying ki ni̱bu ki̱dang kangi̱mu? Di̱ne diti kiyu a ri we ti̱ti̱nitu.”

³⁴Nii wu a bi̱u Filibu ko, “Fwami, n wure wu fa̱ku ki̱ twa̱ba̱ ya̱m a dur ki̱ne, a dur ki̱na ka dur wuka ni̱na?”

³⁵Yinu n Filibu a mwetuwe fi n ki̱na no ki̱ kide ki̱fwa ki̱mi̱nu, a fwa ki̱mi̱nti̱ ya̱m bi̱li̱m Yesumu.

³⁶Yo n chi a yaki̱ yikadu we wa̱re, a lam wuka fi wu ki̱ni mwe, Nii wuduwe wu a yi Filibu ko, “Mwe nang wu, wule ka kadu a ne mwang mami batisma?”

³⁷Mwang medu mwang ma batisma ka kwer n ke bi̱yili̱mu we di̱n Yesune. Naba ni a yi ko, “N ke mi Yesu Masiya nang Bwe Kwama.”

³⁸Nii wu a ti ki̱ni di̱bi̱l kwere ki̱nu, n ki̱n n ti Filibu a le mwe, n Filibu a ma ki̱mi̱n batisma.

³⁹Yo n chi a chire we mwe, Fi̱ki̱m Tewuduwe a da̱u Filibu a yikani ki̱n. Nii wu a kuti̱bu Filibu ki̱da, a chakakku ki̱ni yayu ko, ki̱ni furi mwemwen.

⁴⁰N Filibu a ya fwe a Asotu. N ki̱n a chakakku ki̱yika Kaisariya, ki̱mwati̱ ya̱m Kwamamu we wa̱re ka nang di̱di̱le bi̱ne.