Read tula Romam 1 Bible Online

Romam 1 - tula bible

Romam 1

¹Mi̱na Bulus bwe wu kali̱lle Yesu Masiya. Fandu wu suture wu n Kwama a yal ko a ya fwa ya̱m bi̱li̱m,

²bi̱bu n Kwama a bwa̱u a yii Fa̱kube feredi we ya̱m bi̱mwali̱li̱m ki̱mi̱me.

³Ya̱m bi̱bu a dur Bwe ko n Yeseu Masiya. Wu we da niye, a bi̱u ki̱n a ki̱fi̱ku Mai Daudange.

⁴Kwama a yung n Yesu Masiya Bwe ko we kunku kangu a furangu, di̱kan a Fi̱ki̱m Tewuduwe.

⁵N Kwama a ni mi̱n da wu mang kau fandu Yesu Masiya di̱ne di̱n ki̱ne, ke n yal ni̱bu we kuuti a ma kwa̱mbi̱r ke a ke bi̱yili̱mu a bunti̱ ki̱n, ke a ni ki̱n dwiyen.

⁶N ti̱n wetuwe bi̱bu n Kwama a yal ke a kau bi̱bu m bi̱u Yesu Masiyamu.

⁷Mi̱n mwal bi̱bu a Romamu mi̱nu, bi̱bu n Kwama a mi̱lan, a yal chi ke a kau ni̱bu ki̱mi̱mu. Li̱me n ti li̱mang ki̱ka di̱Kwama Te chire n ti Tewuduwe Yesu Masiya a swe n ti chi̱ni.

⁸N ke mang mwedu ki̱ni di̱wan a di̱Kwama we di̱n Yesu Masiya di̱ne ti̱n ki̱ni kwang. Di̱ne ti̱ti̱niti kwang ki̱fwa ya̱m keku bi̱yili̱mang changu.

⁹N Kwama wu mi̱n ma ki̱mi̱n nangange ki̱ni ni̱r mi̱ni diin we di̱mwar Ya̱m bi̱li̱m Bwe kone, nang wu ka fwadu kangi kwadu mi̱n kuri ki̱ni chi̱n we twa̱ba̱ku buniyangu.

¹⁰We twa̱ba̱ku mangu ki̱dati kwang. Ki̱ka̱ngu ka no Kwama ka kemide, a no nii da mang ya chimi̱n di̱siir.

¹¹Chi a yo mang bau mang ya bwana di̱ chi̱ne, di̱ne ke ti̱ya rikeki̱ku a Fi̱ki̱m Kwamamu, ke a ni chi̱n dukanu.

¹²Chimi̱n fwaditu nang ti̱tu. Ke m mi̱n n ti chi̱n ni rike yichireyu ki̱dangu ki̱ni kiin we keku bi̱yili̱mang chirengu a di̱Yesu.

¹³Mi̱n baddu ta yindu kebu mi̱m, tiko mi̱n kuru kwadu mi mang ya bwa a di̱ chi̱ne ke ni̱bu nabwen a wo ki̱ti̱m we di̱chine yinang kangu a fwe we yikayu kuuti yangu, (aya a maribu ko n ya a lanta ki̱ka̱ng).

¹⁴Mi̱ni ki̱ni ki̱da̱dda̱ku di̱mwar ya̱m bi̱li̱mu we dur mi̱nu di̱ne ni̱bu Yelenamu n ti bi̱bu n ke Yelenamu, bi̱bu a swaani̱mu n ti bi̱bu a swaanbi̱mu.

¹⁵Nang chi a yo mang bau mang fwa chimi̱n ya̱m bi̱li̱mu ti̱nti̱n, n ti̱n ni̱bu Roma.

¹⁶Mi̱n mang nwebu dibwi we fwaku ya̱m Kwamamu di̱ne ti̱tu dukan Kwaman, ke a yu ka wuwule niye wu ki̱ke bi̱yili̱m a di̱Yesuwe: A mwetuwe ni̱bu Yafudam, ka swan ti̱nu a Yelena.[1]

¹⁷Nangki̱n, ya̱m bi̱li̱mu ki̱yungdu yinangu Kwama a yo niyang kau ni̱bu ki̱tum yilem, yile wu ki̱bunti̱nu a keku bi̱yili̱mang we wu a ti kake ti wu a swane. Yinang ka mwal we Ya̱m Kwamamangu, “Ni̱bu ni̱ri dini̱mu ka swidu ki̱ni keku bi̱yili̱mang.”[2]

¹⁸Ki̱fwini Kwama a kwa̱la̱n we dii, di̱ne ki̱letiyi kwang n ti chi ti̱bwilai ti̱ta ni̱bu bi̱bu ki̱yinge bi̱yili̱mu ki̱ni ni̱tu ti̱kwani̱n chiti̱mu.

¹⁹N Kwama ki̱wu chimi̱n ki̱tele, di̱ne n chi a yim chi a no dakan ka yinde. N Kwama ki̱fwan a yung chi.

²⁰We tile bi̱rke, da Kwama niyang yimbe n ti dukan ki̱nu ki̱diya kwadi̱nu n ti fiswe ko wa Kwama, ni swaan yinang, we chitu n ki̱n a yowetu, a ne ni ka ya filliye we.

²¹Aya kasi ki̱ku n chi a yim Kwamangu, a nibu dwiyen kitu a lami̱nti̱bu di̱wan. Ti̱kuran chitu a kau ti̱kusi, ni̱tu chitu a ne swaanku we, a ri ki̱ni ki̱liye.

²²Kasi ki̱ku n chi ki̱da̱du ko chi kasanangu, n chi kasi di̱bu.

²³N chi ki̱sute dwiyen Kwama siinitu ki̱ni dwiyen nii wu bware n ti ta ki̱ni̱bitu n ti ta naitu n ti kwali̱chinu ki̱kwa̱dukwa̱kane,

²⁴Di̱ne yiko, n Kwama a du chi ko a nang burti̱du yinang ka ni̱r chi̱nu ki̱badangu. N chi ki̱bwiti̱du, ki̱kai yichiyu ki̱ni ti̱kulitu.

²⁵N chi ki̱sute bi̱yili̱m Kwamamu ki̱ni ti̱kwani, n chi ki̱ sii kwalin chinu n Kwama yonu ki̱du Kwama we, wu ka yiu delaku ki̱diya kwade. Amin.

²⁶Nang chi a yo, n Kwama a du chi ko a nang bwita yari chitu. Ko no nang nati̱bu chimu, ki̱manadu yinang kwartabu a du ki̱swi n Kwama a yon chiye we ki̱ma dati a dakabiyu.

²⁷Nang kangu kwartabu a du da wuyile n ti nati̱be, yinang ka no dakanangu, kwartabu kima chi dibwitu a bwiti chi. Kwartabu ki̱ma da wumu kiyale ti̱wela Kwama wu fi̱rantuwe da chiye.

²⁸Di̱ne yiko, yo n chi a ko ka yiu Kwama wu yile, n ki̱n a du chi ko a nang temadu we ni̱tu chitu, n chi ki̱ma chi a no dakabu ka made.

²⁹N chi a ri ni̱tu chi̱tu ki̱ni bwilai n ti ti̱kwaniti̱ n ti ni̱r di̱kwani̱n n ti muli̱n mi̱kakwiye n ti kubeku. N chi a ri ki̱ni kati̱n ki̱fwini n ti kakku dutang n ti ti̱kulani n ti di̱buti̱r n ti muli̱n. N chi a ma ti̱fwaran n ti

³⁰ni̱bu yii rarabi̱m n ti bi̱bu a ko Kwamam n ti ni̱bu mweki̱ni̱m n ti bi̱bu a kubu ki̱siyang niyangi̱m n ti bi̱bu ki̱kukku dutu chitu nabweni̱m. N chi ki̱babba wa̱ri bwilayu we bwa we mi̱ne, a mabu kwa̱mbi̱r we seli̱bu.

³¹N chi a ne ti̱kuran we, a ribu bwa̱ki̱ changu, a ne ki̱ke we, a ne chi ki̱bune we.

³²Kasi ki̱ku n chi a yim we kabaku Kwama ki̱yilangu ko ni̱bu bi̱bu ki̱ma ti̱chitu wumu a lwe bwangu, n chi a dubu ti̱chitu wu, ki̱ru ni̱tu we bi̱bu ki̱madi̱mu ko da chi a le.