Read tula Romam 12 Bible Online

Romam 12 - tula bible

Romam 12

¹Di̱ne yiko mi̱n wana chi̱nu kebu, di̱ne ki̱bune Kwama ti̱ni bwiti chiyu tiyang niku ki̱ni ti̱kuriyang wu wauwadu ka li̱ma ni̱r Kwamane. Wu nang wa̱re nii ka siin Kwama yinang ka dakange.

²Ti̱bunti̱nu wa̱riyu n ti dati ti̱ti̱niyu we. Ti̱kau bi̱suti̱ri̱m we ti̱kuran chi̱ntu. Ka ti̱ma ye, ta yim chitu n Kwama ki̱baddu ni maditu n ti yinangu niing ri chi n ki̱n ki̱bade.

³Di̱ne mang swaan ki̱li̱mangu n Kwama mamiyange, mi̱n fwa chimi̱nu ki̱ni kwang, ni a ri̱kadu yikiyu we nabwen. N ti ki̱ku ni ka madi yangu, bunge nii a ri̱kadu yikiyu we, a ya yayu yinangi kwadangu ki̱ni keku bi̱yili̱mangu we kakku Kwamangu.

⁴Fantiyu nabwen yiya dal bwi niyu. Aya fanti yiyu ki̱ni nangi̱ntu dangti dangti.

⁵Di̱ne yiko, nabwe ki̱kuwang ni̱bu bunti̱ki̱mangu a dal bwiyu wiin we di̱n Masiyanu, ka wuwule we tibe chire bale we yikayu fanti.

⁶N chini ki̱ni ki̱ti̱ntiyu dangtidangti tiyangu li̱me Kwama a kera ni mi̱nangu. Ka nii ki̱ti̱meko fanduiye a ma ki̱ni dukan keku bi̱yili̱mang kangu. Ka bunti̱ke a bunti̱ yinang, ka yungke a yung yinang. Ka ruke a ru yinang, ka makake ma yinang. Ka tikake ma ki̱ni funti̱ku bwiyang. Ka yungku ki̱bunenge ma ki̱ni furi mwemwen

⁷Ka a ni mun bwa̱ki̱ ni̱bange, bwa̱u ni̱bu yinanga dakanang. Ka miyake, miyan yinanga dakanang.

⁸Ka ki̱li̱mang ki̱ku mwang kum ni̱bu mi̱n ni̱tange, ni kum ni̱bu mi̱n ni̱tu. Ka ki̱li̱mang ki̱ku mwang maka ni̱bange, ni madu fa̱la̱ngu we ki̱si̱n. Ka tikake, ni ma nangang tikakengu yinanga dakanang, ka nangang ki̱bunenge, ni ma ki̱ni ni̱ri mwemwen.

⁹Mi̱laku changu a kadu ki̱ka ti̱kaliyang we. Ti̱madu chi a lebe we. Ti̱tau wa̱re wa lele ki̱ri̱ng.

¹⁰Ti̱mi̱la yichiyu yinang kebi̱bu a ne wiin ni̱m. N kawure a ni fati̱ ki̱n dwiyen ti̱tu a la yikiyitu.

¹¹Bwiyu a fwiduwe, ti̱yo ni̱ru ti̱nang ma nangang Tewuduwe.

¹²Ti̱ri ki̱ni ti̱mi̱lan di̱ne yo ni̱re chi̱n. Ti̱nang ma bwanu ki̱ni chi nwe riyetu, ti̱dudu twa̱ba̱ku ki̱ku we ko bayim.

¹³Ti̱nang maka ni̱bu Kwamamu a ne chiwemu. Ti̱yiu rungko kani kani yurau.

¹⁴Ti̱yo ni̱bu ki̱fuma chini̱mu mi̱n delaku. Ti̱yo chi mi̱n delaku, ti̱ma chimi̱nu yii we.

¹⁵Lweka wu ki̱ma furi mwene. Wu furi ki̱lin a tau ki̱ne, kire ki̱mi̱n.

¹⁶Ti̱swe li̱mangu we yichiyu. Nii a ri̱kadu yikiyu we, ti̱ya yayu yinangu fati̱bu ki̱ya yayu a ne wu ki̱swa̱ba wuka wengu. Da̱duwe mwi n yim chiti kwang.

¹⁷Ka n wure ka ma muli̱ne, ti̱yeduwe tiyangu n ki̱na mangu. Ti̱ma chitu yinangu n kawure ka yidu ko yayu a lengu.

¹⁸Ti̱ri funti̱ku bwiyang changi kwang ka no ka fwede.

¹⁹Ti̱funti̱ bwi we fiswe li̱mange n ti ka nang wuwule niye. Ti̱du Tewuduwe ka ma ki̱yerangu. Di̱ne ya̱m Tewuduwe a mwal ko, “Mi̱n nang naba ki̱yerange, mang ma chimi̱n ti̱nu yinangu n chi a mangu.”

²⁰Ya̱m Kwamamu a ki̱la fwati̱n ko, “Ka fwakaremo a yiko ki̱nwe sune, ni chabti̱tu; ka ki̱nwe dimwene, ni chi ka node.” Ka n ma ki̱mi̱ni yiko, n yo ki̱nmi̱n ti̱kobi wuduwe we muli̱nu n ki̱n a yaki̱ ma mi̱ndi̱nu.

²¹Kedu bwila a ladu dukan munu we. Aya du chi a leletu a chakakku.