Read tula Romam 13 Bible Online

Romam 13 - tula bible

Romam 13

¹N ka wure a mwintuwe ka ni yikiyu we bi̱seli̱m kwabnatimu. A ne ti̱kan dwiyen we ta kekitu n Kwama a yonge. Dwiyentu n Kwama nang nii a rube.

²Di̱ne yiko, ka nang wuwule niye wu a mabu kwa̱mbi̱r we kasi no ti̱ti̱le mati̱ne, a kebu ki̱ni chi Kwama a rube. Ni̱bu ki̱madi yikomu, ki̱yal dur chi̱nu mi̱ne riye.

³Mati̱mu a kabu chi tayi we bi̱bu ki̱tum yilemu kana bi̱bu ki̱tum chi a lebiti̱mu. Ka mun baddu ne mwang wul tayi tikake nii wu ki̱mati̱ne, ma chi a leetu, n ki̱n ka weri̱nu.

⁴N Kwama yo ki̱n ka ma mi̱n nangang. Aya ka n ma chi a lebe, wul ki̱n di̱ne ka welanu we ti̱kitu. N Kwama a ni ki̱n dwiyen ti̱tu di̱ne ke a nang madi yiko, ka nang chikiye a nang wela bi̱bu ki̱ma ti̱ta lebiti̱mu.

⁵Di̱ne yiko, a mwintuwe ni ma mati̱m ti̱ti̱nimu mi̱n kwa̱mbi̱r. Ni madu, n ke kana di̱ne ke ki̱fwini Kwama a yaruwe dur chi̱renu, aya ke n chi̱ni ni swe ki̱ni ki̱wulang chi̱renu a kunnu we.

⁶Nang chi a yo ta fe sangkale, di̱ne ni̱bu dwiyeni̱mu a kambi Kwamai bi̱bu ki̱ ni ki̱swi chi kwang di̱ne nangang ki̱ku.

⁷Fe di̱si̱nu ka ni ki̱bumi̱nti̱ di̱si̱ne, ka no mwang febu sangkale, fe ki̱ka̱ngu, ka ka̱mbi̱r kuli̱ne, fe ki̱ni kwang. Ti̱nwe tayi wu a lwe ni nwe tayi kiye. Ni ki̱n dwiyentu wu a lwe ka yiu dwiyene.

⁸Kedu ni a bumi̱nti̱nu chi we. Chi a kau mi̱n di̱si̱nitu nang mi̱laki̱ku. Di̱ne ni ki̱mi̱la keko a rii yili̱ntu.

⁹We tatti̱ki̱dai yika̱riyu, yili̱ntu we yinang ti̱tu: “Madu ti̱kuli we, chidu ni we, madu kutu we, kubedu chi we n ti ti̱kantu yili̱n ti̱tu wetu, a dalan we di̱kwa̱li dini̱n di̱du. Mi̱la kemo yinang dur mun.”

¹⁰Ka n mi̱la niye, ne mwang nwe ki̱mi̱n burang. Chi yilangu ki̱baddi kwange nang mi̱laki̱ku.

¹¹Ti̱yim ki̱duum ki̱dangi̱mu n chi̱ni we muremu. N kawure a do yayu ko a swengi ki̱ni doku bwiyang, di̱ne ki̱swi n ke wu niin daan dume. Ki̱dang yukangu a mwatawe, a newe yinang yoko no niyang mwe niyang yiu Kwama.

¹²Kum a tau wa̱re, ti̱ma a mwatan ka kwiyadu. Ni chaku ti̱bwitan chi̱retu ni yo bwa, ni ya yayu wu a ni̱bu bi̱ba ke bi̱yili̱m a di̱Yesuwe.

¹³Ni ya yayu ki̱ni ni̱ri si̱k yinang yo ti̱ma kwiyane. Ni burti̱du we yinangu ni̱bu nori̱mu ki̱bwitadangu. Ni kedu yaritu we n ti nwe ta̱me wu kuse wa da wu ka̱riye n ti di̱kulan n ti kaiku ni̱rang ki̱ni chi ni ki̱yade.

¹⁴Bunge mwan kum bwi mwiyu a di̱Tewuduwe Yesu Masiya, yinu kedu kuradu tiyangu mwan ni yimwiyu we da wu ki̱leti bwiye.