Read tula Romam 14 Bible Online

Romam 14 - tula bible

Romam 14

¹Ti̱yiu nii wu keku bi̱yili̱mang kangu a tibu kwire, ti̱nidu ki̱le we didin ka ti̱kuran chi̱ntu a lakane.

²Wuka ni keku bi̱yili̱mang kangu a yung ka chadu kasi ti̱ti̱le, aya we wuka nii wu keku bi̱yili̱mang kangu a tibu kwire, ki̱chau ka fule.

³N ki̱n wu ki̱chau ka ti̱ti̱le, a swa̱badu wu a mabi yiko we. N ki̱n wu a chabu ka ti̱ti̱le ti̱nti̱n, chiye a kaiyu nii ki̱chade we di̱ne n Kwama a kobu ki̱n.

⁴M muna wure wu mun mwata wuka ni mi̱ne? Kana Tewuduwe ko, nang wu a lwe ka fwa tiiki̱ kangu n ti yare ko. A mwintuwe ka tidu di̱ne Kwama ko ka yo ki̱nu ka tidu.

⁵Wuka nii ki̱da̱ng wuka ki̱di a la ki̱mi̱n chi we yikayu diti. We wuka nii, ditiyu ki̱ni kwang a fiwine. Kanang wuwule ki̱bunti̱na chi ni̱r ki̱n a tau kwari̱le.

⁶N ki̱n wu a da̱u wuka di a la ki̱mi̱n chiye, a ni Kwama dwiyentu we chi n ki̱n a ma. N ki̱n wu ki̱wu name, ki̱ni Kwama dwiyentu di̱ne a wana Tewuduwe. N ki̱n wu a wube, a ni ti̱n Tewuduwe dwiyentu di̱ne a wana Kwama.

⁷Di̱ne a ne ni we tibe chire wu ki̱ma fiswe di̱ne dur ki̱ne yinu a neti̱ nii wu ki̱bwadu di̱ne dur ki̱ne.

⁸Ka ni ma fiswe ni swedu di̱ne Tewuduwe, ka ni bwange ni bwadu di̱ne Tewuduwe. Di̱ne ka ni ma fiswe ka bwa n chini m bi̱u Tewuduwe.

⁹Nang chi a yo n Yesu Masiya a bwa, a kuntuwe ko ke ki̱kau Tewuduwe bi̱kuri̱me, n ti bi̱bwari̱m.

¹⁰A mayire mun mwata kemo mi̱ne? A mayire mun swa̱ba kemo? Di̱ne n chi̱ni ki̱ni kwang ni tidu we ki̱di̱ng kabaku Kwamangu.

¹¹A mwal ko, “N Tewuduwe a yi ko bi̱yili̱m, ka nang wuwule niye ka sungdu we kakku mangu ki̱ni ti̱dumi̱n ka dela Kwama ki̱ni yii ko.

¹²“Di̱ne yiko, ka nang wuwule niye ka fwa chi n ki̱n a maatu we kakku Kwamangu.”

¹³Di̱ne yiko, ni du kabaku ni̱bu mi̱nu we. Aya mu ni̱ru tiyangu ne mwang lwanda ka mwang yo chi yare we wa̱re kemo.

¹⁴N yim yinu n ni bi̱yili̱mu we di̱Tewuduwe Yesuwe, a ne ti̱kan chabtu ti̱tu ka kai nii. Aya ka nii a da̱u ti̱kanchi ko a lebe, a mwituwe yiko we di̱ki̱ne a lebu.

¹⁵Ka ke mo ka yaru we kuteng mwangu di̱ne chabti̱tu mun chadite, a yung mi̱laki̱ mwangu a newe. A dakabu chi mun chaditu, ka kau kemo wu n Yesu Masiya a ni yikiye mi̱n bwa.

¹⁶Kedu chi mun da̱ngdu a letu ni̱ba da̱duwe bwila.

¹⁷Yaa Kwama n ke chakku ti nori̱n, aya yile ti fiswe li̱ma ti furi mwemwen we fi̱ki̱m Kwamamu.

¹⁸Di̱ne ka nang wuwule niye wu ki̱sii Yesu Masiya a wa̱re we, n Kwama ki̱nwe ta̱ma̱ng kangu, ni̱bu ki̱yiu ki̱nu kani yurau.

¹⁹Di̱ne yiko, ni swaan funti̱ku bwiyang chirengi kwang, ni ma chi ka ru yichireye n ti keku bi̱yili̱mang ki̱ku a dakanang.

²⁰Ti̱kaiyu nangang Kwamangu we ki̱ni ya̱m chabtu ti̱tu a lebitu. Chabti̱ti kwang a ne ki̱le we. Aya a kau ki̱le ka nii ki̱chau ti̱kan chi ti̱tu ka yo wuka nii mi̱n yare.

²¹A la chi, wudu nam we, nodu yim we kasi no ti̱ti̱le ti̱tu ka yo ka ke mo mi̱n yaritu.

²²Di̱ne yiko, chi mwang ke bi̱yili̱m a dur ki̱ne, tiwe yiko a tibe mo n ti Kwama mo. Naba delake wu a ke we ni̱r ki̱nu ki̱ni chi n ki̱n a ke ko chabte.

²³Aya n ki̱n wu ni̱r ki̱nu a ko chi n ki̱n ki̱chade, a kau ki̱mi̱n yare. Di̱ne n ki̱n a chabu ki̱ni keku bi̱yili̱mang. Ka m ma chi mwang kebu bi̱yili̱m mwi a lete, a kau ki̱le.