Read tula Romam 15 Bible Online

Romam 15 - tula bible

Romam 15

¹N chi̱ni bi̱bu keku bi̱yili̱mang chirengu a ma dukani̱mu, a dakan ni kuru ki̱ni bi̱bu keku bi̱yili̱mang chiyangu a mabu dukani̱mu, di̱ne ke ni maka chi.

²Kanang wuwule chire a yo keko mi̱n li̱mbwi ke keku bi̱yili̱mang kangu a ti ki̱ri̱ng we bunti̱ki̱ Tewuduwe.

³Ko no nang Masiya a mabu fiswe wu a nwe ta̱me, yinang ka a mwal we ya̱m Kwamamu ko, “Ti̱turantu ni̱bu ki̱tura chinitu a tu min.”

⁴Chi ni̱bu a mwal feredi we ya̱m Kwamame, di̱ne ke a miya nimi̱n we muku ni̱rang n ti kunku ni̱rangu we ya̱m Kwamamu ni yoon ni̱ri̱mu.

⁵Yam Kwama wu ki̱ni muku ni̱rangu n ti kunku ni̱range, a ni chi̱n Fi̱ki̱m bi̱bu a kunkaki̱m we tibe chi̱n we bunti̱ki̱ Yesu Masiyangu.

⁶Di̱ne ke ti̱ni ki̱ni kwang ti̱dela dwiyen Kwamatu ti̱ri̱ka Kwama Tewuduwe Yesu Masiya ki̱ni yii wiin a Fi̱ki̱m Kwamam.

⁷Di̱ne yiko, ti̱yiu ka nang wuwule niye, yinangu m Masiya a yiu chiniyangu; yinu n Kwama ka ya dwiyentu.

⁸Mi̱n fwa chimi̱nu, n Yesu Masiya a kau yinang naba nanga ni̱bu Yafudam, a kuteng ya̱m bi̱yili̱m Kwamamu, ke a yung ti̱n n Kwama ki̱rii chi n ki̱n a fwa we biku laar a suteti̱bu ya̱m ki̱mu a fwa fa̱kuti mi̱n ferediyu.

⁹Ke yikayu kuuti ti̱n a dela Kwama di̱ne ki̱bune ko. A tiwe yinanga a mwal ko, “Di̱ne yiko, Teweduwe, Mang dela di̱n munu, mang dela di̱n munu ki̱ni teni we kuutiyu.”

¹⁰A fwatu ki̱da ko, ti̱ma ti̱mi̱lan wa ni̱bu kuuti̱m n ti ni̱bu Kwamamu.

¹¹A ki̱la fwati̱n ko, “Ti̱dela Tewuduwe, n ti̱n yikayu kuuti ti̱dela ki̱n kutiyu ki̱ni kwang yiyu a ni̱bu ti̱ti̱nime.”

¹²N Yichaya ki̱la fwati̱n ko, “Wuka we lo Dauda bwe Yesse ka chiredu, beka ma mati̱n yikayu kuuti kwang. Bi̱bu a yikayu kuutiyu ka yoti̱ ni̱ru we di̱ki̱ne.”

¹³Ke n Kwama wu ni yon ni̱re a ri chi̱n ki̱ni furi mwe mwen n ti fiswe li̱ma yo ti̱ke bi̱yili̱mu we di̱ki̱ne, ke ti̱ ri ki̱ni yo ni̱re ti dukan da fi̱ki̱m Kwamam.

¹⁴Kebi̱mi̱m, m mi̱n, m mi̱fwan n ke mi n ti̱ni̱n ti̱fwan ki̱ni ni̱r di̱yili̱n ki̱ni yingku ki̱yilang. N ti̱n ti̱lwe ta miya yichiyu mi̱nu.

¹⁵N mwal chimi̱n yi kwa̱rikwa̱ri we ti̱katu ti̱kwa̱li yii yinu mi̱n kur chimi̱n ti̱nu ki̱da di̱ne li̱me Kwama a niye.

¹⁶Ko n kau naba nangang Yesu Masiya we kuutiyu n ki̱ni nangang fansetiyangu we di̱mwar ya̱m Kwamamu.

¹⁷Di̱ne yiko, mi̱n ngau kwiye ki̱ni Yesu Masiya we chi n ki̱n a ma di̱ne mi̱n sii Kwama.

¹⁸A ne mang fwa bi̱kam ya̱m we di̱mune ka ke chi n Yesu Masiya a ma we di̱mi̱ne wu a wuwe ni̱bu kuutimu ka bunti̱ Kwama we chi mang fwa mang mati̱ne.

¹⁹Mang medu mang fwa chi ka̱ta̱kitu n Yesu Masiya a ma ki̱ni dukan Fi̱ki̱m Kwamamitu. N ma di̱mwar ya̱m bi̱li̱mi̱nu n ri chi a dakani we Wurchalima n ti ti̱ntiyu a kananiyu n fwe ti̱na Yilirikum wu a Yiti̱liye.

²⁰Aya ka nang wuwule ki̱swiye mi̱n kuru we ni̱r mi̱nu mang ma di̱mwar ya̱m bi̱li̱mu we fi ni̱bu a yimbu Masiya.

²¹Ka nang chikiye nang ka mwalangu Bi̱bu ni̱bu a fwa chi mi̱n bi̱mu ka kudu, yinu bi̱bu a no nwebi̱mu ka swaanu.

²²Ti̱tu nang chi a yo ki̱dati kwang mang yabu da yaku bwana di̱chi̱ne.

²³Yo ki̱kangu a ne wuka fi ma man nangang we bale we, yo man tau mi̱n badu swa̱tu nabwen mang kunne.

²⁴N do bwiyu mang ya bwa di̱chine ki̱dangu mang ya Asbaniyangu. We bwako mang bau ki̱swi mang sii chinedu ke ti̱makai ti̱n we yayu mi, yinu mang chakakku ki̱ni yayu.

²⁵Aya ki̱ka̱ngu mi̱n yika Wurchalima yamang maka we ni̱bu bunti̱ki̱ma fiko mu.

²⁶Ti̱da̱ng ni̱bu bunti̱ki̱mu a Makidoniya n ti Akayamu a maka ti̱lusani ni̱bu bunti̱ki̱m a Wurchalimamu ki̱ni furi mwen.

²⁷N chi a nwe ta̱ma̱ng maki̱ku yinu a kau chimi̱nti̱ yinang ki̱da̱dda̱ku we di̱chiye. Ka ni̱bu kuutimu a yati̱ ki̱ti̱me we delaku ni̱bu Yafudam wa fi̱ki̱me, a kau chimi̱n ki̱da̱dda̱ku ka kerati̱ yaku chiyangu n ti ni̱bu Yafudamu.

²⁸Yo mang ri nangang ki̱ke yinu n yinti̱ n chi a ya makake, mang yika Asbaniya yinu mang bunti̱ fiya di̱ki̱ne.

²⁹N yim ka n ya bwa di̱chine, mang yadu ki̱ni ki̱li̱mang ki̱duwang ki̱ka Masiya.

³⁰Kebu mi̱m, we a di̱n Yesu Masiya n ti mi̱laku Fi̱ki̱m Kwamamu, mi̱n baddu ta makayu ki̱ni twa̱ba̱ku buni we kwa̱mbi̱r mi̱nu we Tewuduwe.

³¹Ti̱twa̱ba̱n, ke n ya chirku we ni̱bu bi̱bu a ko bunti̱ki̱ Yesu Masiya we yaa Yafudiyamu, di̱ne ke ki̱li̱mangu mang madu a Wurchalimangu a kau chi ni̱bu bunti̱ki̱m ka yinde.

³²Ka Kwama kenge mang ya bwa di̱ chi̱ne ki̱ni ni̱ri mwen ke ni kunka dutu chi̱retu.

³³N Kwama naba li̱me a swe ware n ti chi̱ni kwang. Amin.