Read tula Romam 16 Bible Online

Romam 16 - tula bible

Romam 16

¹Mi̱n yung keku mangu we di̱kechire n Fibi wu ki̱ma makaku a kan Kwamana Kanki̱riya.

²N fwa chimi̱n mi ti̱yiu ki̱n kani yurau we di̱n Tewuduwe yinangu naba bunti̱ke a dakan ka madangu. Ti̱maka ki̱n ki̱ni chi ka badditu, di̱ne n ki̱n a maka ni̱bu bunti̱ki̱ni̱mu nabwen, a makati̱ mi̱n.

³Ti̱simi Biriskila n ti Akila bi̱bu nang ma nangang ware a di̱n Yesuni̱mu

⁴N chi a mwatan ka su ti̱kuri chiitu di̱ne mi̱ne. Nii ki̱ma di̱wane, n ke ka mi̱n ki̱ni ni̱bu bunti̱ki̱ a yikayu kuuti mu.

⁵Ti̱siti̱ ni̱bu bunti̱ki̱mu ki̱muradu a lo chimu. Ti̱sii ti̱n ki̱bwa̱rtang mangu n Afinitu, fati̱mi wu siine, wu a mwe a wo ki̱ti̱mu ki̱bunti̱ Masiya we ti̱m Asiyamu ki̱ni kwange.

⁶Ti̱si Maryamu wu a ma nangange yinange di̱ne chi̱ne.

⁷Ti̱siiti̱ Andaroniku n ti Yuniya kebi̱ mi̱m bi̱bu n ni̱n ware we di̱tbi̱nti̱li̱mu n chi ni̱bu Yafudam yinang mi̱n. Nibu ki̱ni ti̱chin dwiyentu yinang fandubu. N chi a tu mi̱n a ke bi̱yili̱mu we di̱Masiya.

⁸Ti̱sii Amfiliyatu, fatemi wu yile we bunti̱ku Tewuduwe.

⁹Ti̱sii Wurbanu fate ni̱n nang ma nangang ware we di̱n Masiyane n ti fate mi n Sitaki.

¹⁰Ti̱si Afalis wu a ki̱labu kutenge we tiku kangu a di̱n Yesunu. Ti̱siti̱ di̱kur lon Aristobulu.

¹¹Ti̱sii Yiridiya wu n ki̱n naba Yafuda ti̱n. Ti̱si bi̱bu a di̱kur lon Narkisusunu bi̱bu ki̱bunti̱ Tewuduwe.

¹²Ti̱sii Tirayifina n ti Tirayifusa. Nati̱n bi̱bu ki̱nwe riye a nangang Tewuduwe. Ti̱sii Farsa fate wu mang mi̱lane wu a nweti̱ riye ki̱ma nangang Kwamange.

¹³Ti̱sii Rufu wu swabre Tewuduwe n ti neki̱n wu n ki̱n ne we di̱mi̱ne.

¹⁴Ti̱sii Asinkiritu n ti Filikona n ti Armi n ti Faturoba n ti Yerme n ti kebi̱bu we ware n ti chimu.

¹⁵Ti̱sii Filoloku n ti Chuliyana n ti Nariyo n ti keko wuwiye n ti Olimfa n ti ni̱bu bunti̱ki̱mi kwang we ware n ti chimu.

¹⁶Ti̱sii yichiyu ki̱ni kwarkaki̱ki wauwadu ki̱ka bunti̱kang. Kuu ni̱bu bunti̱ki̱m Masiyamu ki̱si chintedu.

¹⁷Kebu mi̱m, ti̱ma daandaan ki̱ni ni̱bu ki̱yo chimi̱n bi̱ngaiyimu. Bi̱bu ki̱yo chimi̱n yaremu, ki̱yo kati̱n we chi ta miyanitu. Ti̱kwa chimi̱n ti̱nuwe.

¹⁸Di̱ne ni̱bu bi̱bu a siibu Tewuduwe Masiya. Ki̱ sii yichi. Yiini chiyu a ri ki̱ni luki̱ri ti̱kwanitu ki̱butu bi̱bu ki̱nwe chimu. Bi̱bu ki̱nwe chimu ki̱ni ti̱kuran chitu yinang bwesi̱m.

¹⁹Kanang wuwule niye a nwe yinangu ta tau ya̱m bi̱li̱m Masiyamu. Ti̱tu a yo mi̱n ma ti̱mi̱lani ki̱ni chi̱n. Aya n ke ta kau ni̱bu kasani̱m. Ti̱chaku yichiyu we chi ti̱bwilaitu.

²⁰N Tewuduwe naba li̱me ka faba chimi̱n dukan Setan. Mi̱n twa̱ba̱du mi li̱me Kwama a swe ti chi̱n.

²¹N Timoti wu ni̱n ma nangang ware ki̱si chi̱nu n ti Luchiyo ti Chason n ti Sasifata n ti bi̱bu n chi kebi̱ mi̱mu.

²²M mi̱n Tartiyu wu ki̱mwal ki̱mi̱n lwangi̱n di̱de, mi̱n sii chi̱nu a di̱n Tewuduwe.

²³N Ka̱yu wu a si̱ki a loko, wu ki̱si̱ku ni̱bu bunti̱ki̱mu a loko, ki̱sii chi̱nu. Yeratu wu ki̱tau ka̱mbi̱r bi̱nenu, n ti ke chire n Kwartu ki̱sii chintedu.[10]

²⁴[Yam, li̱me Yesu Masiya a swe ware n ti chi̱ni kwang. Amin.][11]

²⁵Ki̱kangu ni ni wu a lwe ka ru chinu we ya̱m bi̱li̱mu yinu ka ma di̱mwar Yesu Masiya, ke wuduku chi kwa̱layi ti̱lairitu a ma ferditu.

²⁶Aya ki̱ka̱ngu a ne chi a lailaiye we di̱ne ti̱mwalantu Fa̱kubu a mwalanitu. We dukan ya̱m Kwamamu. Ti̱nti̱n, kuuti kwang a swaan. Ti̱tu ka yodu n chi ka ke bi̱yili̱mu a mati̱ kwa̱mbi̱r ki̱diya kwadu.

²⁷Dwiyentu a ki̱la bwa di̱Kwama ki̱diya, n ki̱n wu nang naba yingku chiyange, n ki̱kun a di̱Yesu Masiya ki̱diya kwadu! Amin.