Read tula Romam 8 Bible Online

Romam 8 - tula bible

Romam 8

¹Di̱ne yiko, ki̱ka̱ngu a ne kaiyakuwe bi̱bu ki̱bunti̱ Yesu Masiya.

²Di̱ne we di̱n Yesu Masiyanu, da wu a Fi̱ki̱m ki̱ni ti̱kurime a chakii we da ki̱letiye wu a bwa.

³Aya chi yilangu a mebu a mabe di̱ne ki̱taka a da bwiyangu, nang chitu a mantu. N Kwama tume Bwe ko ki̱kun yi wiine ki̱ni di̱ten bwi chi̱renu a ki̱letiye, ke a be bwa di̱ne ki̱leti chireyu, we yiko a yung ki̱letiyu ne di̱kan dukan we ni̱bu.

⁴N ki̱n a ma ti̱tu ko ke chi yilang ki̱badditu a ri we di̱chire, bi̱bu a yabu yayu we da bwiye aya ki̱ya yayu a Fi̱ki̱m Kwamam.

⁵Bi̱bu ki̱ tum ki̱ke bwiyemu, ki̱ma chitu bwi chiyu ki̱badditu aya bi̱bu a yo ni̱tu a chi Fi̱ki̱m Kwamam ki̱baddite, ki̱ma chi Fi̱ki̱mu ki̱badde.

⁶Yo ni̱re we da bwiye ki̱yikadu ki̱ni ni a wa̱re wa bwa̱ke aya yo ni̱re we wa̱re Fi̱ki̱me ki̱ni ti̱kuri n ti li̱mang.

⁷Kanang wuwule niye wu ki̱yadu a da bwiye, a kau fakware Kwama di̱ne a yabu yayu we ki̱ke Kwama we bi̱yili̱mu, n ki̱n a ne me yayu we yilang Kwamangu n ki̱n a ne medu ka madu.

⁸N Kwama a nwebu ta̱ma̱ng ki̱ni bi̱bu ki̱bunti̱ da bwiyemu.

⁹Aya n ti̱n ta bunti̱bu chi bwiyu ki̱ badditu. Ti̱bunti̱ chi a ki̱ke Fi̱ki̱me, ka Fi̱ki̱m Kwamamu ki̱swedu we di̱ chi̱ne, ka nang wuwule niye wu a newe ki̱ni Fi̱ki̱m Yesumu, a newe kwa̱l Masiya.

¹⁰Ka m Masiya we ware n ti mune, bwi mwiyu ki̱bwadu di̱ne bwila aya Fi̱ki̱m mumu a ne bwadu di̱ne n Kwama a yo chi̱n a ni̱bu yilem.

¹¹Ka Fi̱ki̱m Kwamamu bi̱bu a kuku Yesu a furumu, nang bi̱bu a bwi chiyime, n ki̱n wa kuku Yesu we fure, ka ni kwa̱mi chiyu ti̱kuri ki̱ni Fi̱ki̱m ki̱mu ki̱ swedu ti chini̱mu.

¹²Di̱ne yiko kebu mi̱m, n chi̱ni ki̱ni ki̱dada̱ku. Aya n ke wu yayu wu a da bwiye ki̱badde.

¹³Di̱ne ka ni ya yayu a da bwiye, ni bwadu. Aya ka ta du nangang bwiyangu ta yadu a Fi̱ki̱me, ta swidu.

¹⁴Nangki̱n, bi̱bu Fi̱ki̱m Kwama a ti chimi̱n kaki̱mu, bwesi̱m Kwamam.

¹⁵Di̱ne Fi̱ki̱m a bwi chi̱reme, A dakabu ta wul tayu yinang ka̱bii. Fi̱ki̱mu a bwi chini̱mu a yo chi̱n bwesi̱m bi̱suti̱ri̱m we di̱Kwama, tani̱n ma di̱yalu a di̱Kwama ko, Tete,

¹⁶Fi̱ki̱m Kwamamu ti bi̱chiremu ki̱yungdu ko n chini bwesi̱m Kwamam.

¹⁷Yo kwer ki̱ka̱ngu n chi̱ni bi̱u Kwama, ni chau kula wa delaku Kwamange, ni kau fati̱bu Yesu Masiya we kula Kwama. Yo niyang nwe riye n ti Yesuwe, ni yati̱ dwiyentu ware we kakku Kwamangu.

¹⁸We da̱ngki̱ mangu, riye ni nwedu ki̱ka̱nge, a mwatanbu chi n ti dwiyentu yani yaditu.

¹⁹Chi n Kwama yoti̱ kwang, a yo ni̱ri ki̱ng chi ku di wu n Kwama ka wudu bwesi̱m ki̱mu mi̱n dwiyen kite.

²⁰Nangki̱n, chi a ti̱ti̱niye a nwe riye n ke di̱ne ki̱ke ti̱ti̱niye, aya n Kwama a ke yiko. A ma ying,

²¹ko ke ti̱ti̱nitu a chir we ka̱bi ti̱ta fwikitu, a ya dwiyen ti̱ta yo ni̱re bwesi̱m Kwamami.

²²Ni yim ki̱ka̱ngu ti̱ti̱nitu ki̱ tinadu yinang yo bi̱be a lam naye mi̱ne lanta ki̱ka̱ng.

²³N ke kana chi̱ni bi̱bu Fi̱ki̱m Kwamamu a ri ni̱mu, ni tinadu we ni̱ru ti̱n, ni ya mi̱n da wu niyang ya, a yo ni bwesi̱m Kwamame, tuku bwi chireyang.

²⁴Nangki̱n, ni ya yuki̱ku di̱ne yo ni̱re. Aya yo ni̱re ni ku ti̱ne, n ke wu yile ko bayim. N wure ki̱yo ni̱ru we chi n ki̱n, a tu a ya?

²⁵Aya ka ni yo ni̱ru a chi niyang tibu yade, ni swedi ki̱ri̱ngching, ni yandu.

²⁶Yiko ti̱nti̱n, Fi̱ki̱m Kwamamu ki̱maka nidu yo dukana newe. N chi̱ni niyang yimbu chi a no dakan niing twa̱ba̱n bunite aya Fi̱ki̱m Kwamamu we ware n ti chi̱ni bobu ki̱ twa̱ba̱ ni mi̱nu, ki̱tinadu ki̱ni ti̱kwa̱litu ne ni yim fwaditu.

²⁷N ki̱n wu a yim chi a ni̱r niine, a yim chi a ti̱kuran Fi̱ki̱m me. Di̱ne Fi̱ki̱mu ki̱twa̱ba̱ ni̱bu Kwamamu mi̱n chi a ki̱ke Kwama.

²⁸Ni tu ni yim ko, kanang chi kiye n Kwama ki̱ma bi̱bu a mi̱la ki̱ni̱mu mi̱n ti̱yili, ka nang chi kiye, bi̱bu a yal a ki̱ke komu.[5]

²⁹Nangki̱n, bi̱bu n Kwama tu a sutu chimu, nang bi̱bu n ki̱n a so chi ka da̱u di̱mwal bwin Bwe Kwaman, di̱ne ko ke n ki̱n a kau bwe kake we kebi̱bu nabwen.

³⁰Bi̱bu n ki̱n a sutumu, n ki̱n a yal. Bi̱bu n ki̱n a yali̱mu, a mar chi ni̱bu yilem. Bi̱bu n ki̱n a chaki̱mu, a ni chi dwiyen.

³¹Ni fwadu ko wule we wu nabwe chi ya̱r yii wu ye? Ka n Kwama a di̱chi̱niye, n wure a lwe ka katadu n ti chi̱niye?

³²Yo n Kwama a dubu wuko Bwe, a yo bwa bwe ko di̱ne chi̱ni kwange, n Kwama wu a tu a ni chi̱ni Masiya, ka bwin wureni wu a ne ka ni nide?

³³N wure a lwe ka fwa ya̱m we bi̱bu n Kwama a sutumu? Di̱ne n Kwama n ki̱fwan nang wu a yo chi a kau ni̱bu yilem we kakku kange.

³⁴Yinu n wure ka kai nidu, ko bayim! Di̱ne m Masiya nang wu a bwa di̱ne chiniye, a kun ki̱ni ti̱kuri di̱ne chi̱ni, a swe a fa̱la̱ng ki̱yilang Kwamangu, ki̱twa̱ba̱ buni di̱ne chi̱ni.

³⁵Kano wureni ka medu ka yarka ni n ti mi̱laku Masiya ma a nimi̱nangu? Riyenga, fumaka, chuna, kwalanna ka bwanga?

³⁶Ko no nang ya̱m Kwamamu, a mwal ko, “Ditiyu ki̱da̱ng ni̱n bwadu di̱ne mune n chi ki̱bita ni̱nu yinang kwanti.”

³⁷Ko bayim, a kuteng ti̱chitu wuwangi kwang, n chi̱ni ni̱bu ki̱lam a di̱n Yesun wu a mi̱la niye.

³⁸Ki̱kumang, n ke bi̱yili̱mu ka bwa ka ti̱kuriye, ka ni̱bu ti̱tumbi̱rime, ka ki̱fi̱bti yi bwilaye, ka da wu ki̱ka̱nge ka wu ki̱bede, ka kasi bi̱bi̱le ki̱duum dukani̱m mati̱n ne,

³⁹Ka sa̱re ka bwange kasi no ti̱ti̱le we chi Kwama yo, a ne yarkayu n ti mi̱laku Kwamangu a mami a di̱Yesu Tewuduwe chirengu. A ne chi ka yarka nide we.