Read tula 1 Koronti 1 Bible Online

1 Koronti 1 - tula bible

1 Koronti 1

¹M mi̱n m Bulus wu n Kwama we ki̱keko a yali, mang kau fandu Masiya Yesuwe n ti ke chire n Sastanis.

²Mi̱n mwal ni̱bu Kwamamu a Korinti n ti bi̱bu n Kwama a yal a yo chi̱n yinang ki̱n ko ke ti̱kau bi̱ki̱m bi̱bi wauwadi̱m, bi̱bu takau bi̱u Kwamam di̱ne wiine chi̱n n ti Yesu Masiya n ti bi̱bu kasi no fere ki̱yalu we di̱n Yesu Tewuduwe Masiya chire n ti chi kwang.

³Li̱me n ti fiswe li̱mang a di̱Kwama Tewuduwe n ti Yesu Masiya a swe ware n ti chi̱n.

⁴Mi̱n wana Kwama kwadu di̱ne chi̱n n ti li̱me a ni chi̱n ki̱ka̱ng ti̱bunti̱ Yesu Masiyangu.

⁵Nangki̱n di̱ne Yesu, n Kwama a ni chi̱n chitu ti̱baditi kwang, a bwinbu ya̱m n ti yingku a ni chi̱n.

⁶Ti̱tu a yung chi mang fwa chimi̱n a dur Masiya Yesunitu bi̱yili̱m.

⁷Di̱ne yiko, ti̱ya kasi no n nang bi̱bi̱le duum ki̱ti̱me Fi̱ki̱m Kwamam, yo we ti̱kur nuyi chiyu ti̱yam ki̱laku Tewuduwe Yesu Masiya .

⁸N ki̱n ka ru chi̱ni ki̱ri̱ng ka lami̱nti di ka ki̱lade, ke n kaddu wu ki̱ni di̱tuurwe di n Tewuduwe Yesu Masiya.

⁹N Kwama a ne du chi̱nu ta dwaladu, di̱ne n ki̱n a mabu ti̱kali ki̱ni ya̱m ki̱mu. N ki̱n a yal chi̱n ke ti̱kunka ware n ti Bweko n Yesu Tewuduwe m Masiya.

¹⁰Mi̱n wana chi̱nu kebi̱mi̱m, we dukan Tewuduwe Yesu Masiya, yii chi̱n a kabi wiin. Bi̱ngaiyu a ledu tibe chi̱n we, ti̱kunka dutu chi̱ntu ke ti̱kuran chi̱ntu a kabbi wiin.

¹¹Bi̱kam kebu we lon Kuluwiye, a fwami ko bi̱ngai a le tibe chi̱n.

¹²Chi min fwaditu nang ti̱tu. N kawure ki̱fwa bi̱ki̱mu ya̱m dang, wu ki̱yidu ko, “M mi̱n mi̱n bunti̱ Bulus,” wu ko, “M mi̱n mi̱n bunti̱ Afolos,” wu ko, “M mi̱n mi̱n bunti̱ Kefas.” Wuka ki̱yidu ko, “M mi̱n mi̱n bunti̱ Masiya.”

¹³Kano m Masiya a kera bwi kiyu kerana? M Bulus nang nii a bwa we ki̱tiyang bwangu di̱ne chi̱na? Ka ta ma batisma ki̱ni di̱n Bulusi̱na? Kwako, a newe yiko.

¹⁴N Kwama a mabe yinangu mang mabu wuka chi̱n mi̱nbu batisma ka n ke Kiribu n ti Ka̱yus.

¹⁵Di̱ne yiko, a ne ni ka yidu ko, ki̱ma batisma ki̱ni di̱n mi̱ne we.

¹⁶We yiko n kur, m ma di̱kur lon Yistifanuse mi̱n batisma, a kuteng ki̱ku, mang kurbu ka mang ma wukane nimi̱n ti̱n batisma.

¹⁷M Masiya a tumebu mi̱n ko n ya m ma batisma, aya m mwa ya̱m bi̱li̱m bi̱bu a ne mang ma nangang ki̱ni dukan yii mi̱ni̱m di̱ne ke ya̱m bwa Yesu a ki̱tiyang bwamu a ma dukan.

¹⁸Ki̱kumang ya̱m bwa Yesumu a mabu ki̱kwi we bi̱bu a tau wa̱re bwamu. Aya n chi̱ni bi̱bu niyang ya yukumu, ni swan ko ya̱m bi̱li̱mu dukan Kwama.

¹⁹Yinangu a fwa we ya̱m Kwamamu ko, “Mang kai yingku niyangu, mang yung chidu mi n chi a yimbi̱ chi.”

²⁰Di̱ne yiko a bwa̱le ni̱bu bi̱bu ki̱ni yingki̱mu? A bwa̱le ni̱bu yungku yili̱n Musati̱mu? A bwa̱le ni̱bu ki̱kudu ko chi me fwaku ya̱mi̱mu? Mi̱n yi bi̱bu ki̱kamadu ko chi swaan chiti kwangi̱ mu? N Kwama a marbu yingku chiyangu a ni̱bu ti̱ti̱nimu a kau di̱ta?

²¹Nangki̱n we yingku Kwamangu, ni̱bu ti̱ti̱nimu a yimbu Kwama di̱ne yingku chiyang, n ti ki̱ki yikongu, n Kwama a sutu di̱mwar di̱tti̱n chi̱nu, a yu bi̱bu a ke bi̱yili̱mi̱mi ki̱n.

²²Ni̱bu Yafudam a kubu wa̱re Kwama ki̱ni ki̱kwi, ka n ke n chi ka ku di̱mwal ka chiredu a diye. We ni̱bu Yelenamu ti̱tu a kau di̱tu di̱ne n chi a ke ki̱ni ka yingku chiyang.

²³Di̱ne yiko, yo ni ma di̱mwaru ko n Yesu Masiya a bwa a ki̱tiyang bwange, ni̱bu Yafudam ki̱kai ni̱tu a kebu bi̱yili̱mu, aya n chi bi̱bu n ke kuu Yafudamu ki̱kudu nangang ki̱kusang yinangu nii ka bwadu di̱ne ni̱bangu.

²⁴Aya ya̱m ni̱mu nang bi̱bu, m Masiya dukan Kwaman n ti yingku Kwama we bi̱bu a yali̱mu, ka ni̱bu Yafudam ka naba Yelena.

²⁵Di̱ne chitu ni kudu yinangu kano Kwama a ma di̱ttitu, a la dukan ni̱nu. N ti chitu ni kudu ko kano ki̱taku Kwamangitu, a lati̱ dukan ni̱nu.

²⁶Kebu mi̱m ti̱kur yinangu no n ti̱n we mi̱nangu yo Kwama a no yal chi̱ne, we yingki̱ niyangu ni̱bu ki̱ni kasani̱mi bayim we tibe chi̱n. Ti̱nti̱ne yi bayim we tibe chi̱n bi̱bu ki̱ni dwiyeni̱mu. Yinu bwesi̱m ni̱bu bi̱duumi̱mi bayim ti̱n.

²⁷Aya n Kwama ki̱mwen neki̱ti ki̱sutu ni̱bu bi̱bu ki̱ kamadu di̱bu ti̱ti̱nimu, ki̱yo chidu ki̱ni ni̱bu bi̱bu ki̱kudu ko chi kasani̱mu dibwi. N ki̱n a ki̱sutu chi ni̱bu ki̱kudu ko a ne dukan we, ki̱ni bi̱bu ki̱ni dukani̱mu dibwi.

²⁸Chitu ni̱bu a kubu ki̱siyang kangitu, ka chi ti̱kusiye, ka n ke ti̱kan chiye, nang chi n Kwama ki̱ma nangangi ki̱n ki̱kaiyin chi ni̱bu ki̱kudu ko ti̱yiliye.

²⁹N Kwama a ma ti̱chitu wu di̱ne ke ni̱bu ti̱ti̱nimu a kuki̱du dutu chitu we kakku kangu.

³⁰N Kwama a yo ni ke bi̱yili̱mu a di̱Yesu Masiya. N Kwama ti̱n a yo Masiya a kau nimi̱n yingku. N Kwama a ke ki̱ni chi̱ni, a nura ni, a yu ni di̱ne Yesuwe.

³¹Di̱ne yiko, yinangu a mwalangu ko, “Kanang wuwule niye wu ki̱ri̱ka yikiye, a ri̱kan a di̱n Tewuduwe.”