Read tula 1 Koronti 10 Bible Online

1 Koronti 10 - tula bible

1 Koronti 10

¹Da̱ng mi̱n baddu mang fwa chimi̱nu Kebu mi̱m, tukebi̱ chi̱remu ki̱ni kwang a ya yayu we di̱twinu, n chi ki̱ni kwang a bunti̱ la rude.

²N chi a ma batisma we di̱twinu n ti la rude di̱ne n chi ki̱bunti̱ Musa.

³N chi ki̱ni kwang a chab chabtu Tewuduwe ti̱tu a Fi̱ki̱mitu.

⁴N chi ki̱ni kwang a no mwe wu a Fi̱ki̱me. N chi ki̱ni kwang a no mwe we kale wu ki̱yikadu ki̱ni chiye, ka nang chikiye ni fwa Masiya.

⁵Ki̱ni yiko, n Kwama a nwebu ta̱ma̱ng ki̱ni chi nabwen, di̱ne yiko a chi̱be bi̱kamu we di̱chi̱lanchangi̱n.

⁶Ti̱tu ki̱wu ni̱mi̱n ki̱tele di̱ne ke ni madu chi ti̱bwilatu n chi a maatu we.

⁷Ti̱kaddu ni̱bu ki̱sii di̱yor we yinangu bi̱kam chimu a kabangu. Yinangu a mwal ko, “Ni̱bu a swe, a chau, a no, a swana ti̱ni yilang, ki̱ma dwadi ni̱bu di̱yore.”

⁸Nii kedu da ti̱kuliye we, yinangu bi̱kamu a ma, a yo ni̱bu kuniritu wan turau chiri yitta a bwaran di wiin.

⁹Ni swedu Tewuduwe Yesu Masiya we, yinangu bi̱kamu a mangu, a yo sooti a chi̱be chi.

¹⁰Ni madu bi̱ngaiyu we, yinangu bi̱kamu a mangu, a yo naba di̱tumbi̱re chike a chi̱be chi.

¹¹Ti̱chitu wu a fwe n ti chi ki̱ni kwange, a kau ni mi̱n ki̱kure, n chi̱ni bi̱bu di swan kute ka ridu a di̱chi̱niyemu.

¹²Di̱ne yiko, ka m mun wu mun kamadu mwiko n ti ki̱ri̱nge, ti yinang ke ki̱la m mun n yar.

¹³Tabi̱duwe mwi ka nang ki̱ki̱le sweku ki̱ku a yanange, ni̱bu a bwarani̱mu a tu a twaitwaiye, n ke chi ti̱fwi. N Kwama a ne ka du chi̱nu ko sweki̱ku a la dukan chi̱nu. N ki̱n ka ma wa̱re wu ta chiru we swa̱ka̱ki̱ke.

¹⁴Di̱ne n ti̱n bi̱bu mang mi̱lani̱mu, tiko siiku di̱yor rangu.

¹⁵Mi̱n fwa ya̱mu n ti chi̱n di̱ne n ti̱n yinang ni̱bu bi̱yili̱m, ti̱da̱ng chi mi̱n fwade n ti̱n ti̱fwan.

¹⁶Yo ni no mwe ki̱danne, wu a dela ke ki̱ni sa̱ne, mi ka ki̱yungdu n chi̱ni wiin we ki̱tuum Masiyame? Ki̱danne ni wuladu ni kerade n ke wu ki̱yodu n chi̱ni a fi wiine we bwi Masiya ya?

¹⁷N chi̱ni kwang ni chau a ki̱danne wiin, ti̱tu a yung n chi̱ni a bwi wiin.

¹⁸Ti̱da̱ng ni̱bu Yisrelamu, bi̱bu ki̱chadu a niku ki̱tuumangi̱mu, n chi a newe fi wiine yo ki̱chau ki̱danne nike we se Kwama?

¹⁹Mi̱n fwadu mi wureni we fi? Mi̱n yidu mi ti̱yobitu ni̱bu di̱yori̱m ki̱siiditu, Kwamati yiyili yinu ti̱nti̱ne niku chidu ki̱ni ki̱kwiya?

²⁰A newe yiko, a newe ko bayim, mi̱n yung chi̱nu we fi mi niku ki̱tumang chiyangu ki̱ni ki̱fi̱bti n ke Kwama. Di̱ne yiko, Mang babu ta kau fati̱bu ki̱fi̱bti̱m.

²¹A dakabu ta no chitu we sa̱ne Kwama yinu ki̱la ta no ti̱nu we sa̱ne ki̱fi̱btiye. Ti̱nti̱ne a ne dawe ta chadu we kakku Tewuduwe, yinu ta chau ti̱nu we wu a ki̱fi̱btiye.

²²A mayire ni yo Tewuduwe mi̱n ki̱fwiniye? Ti̱ kamadu ni la Kwama ki̱ni dukana?

²³A ke nimi̱n kanang ti̱ti̱le chiye, aya n ke kanang chiye ka ma nangang. A ke nimi̱n kanang ti̱ti̱le chiye, aya n ke kanang ti̱ti̱le chiye ka bedu ki̱ni mukku.

²⁴Kuru ka dur mun we, nang kurti̱ kebi̱ mumu.

²⁵Ta medu ta wu ka nang wuwule ki̱duum nami̱me we fi ni̱bu ki̱ miin nam we kwa̱ma̱re, ti̱bi̱du we ti̱wu nam di̱yora ka n ke wu a di̱yora? Ke ti̱bwa̱u ni̱ru we ti̱kurantu.

²⁶Ya̱m Kwamamu a fwa ko, “Ti̱ti̱nitu n ti kwa̱li̱n chi̱nu a murenu n ti̱u Tewuduwe.”

²⁷Ka wuka ni wu a mabu bunti̱ke a yali̱n ko m be ti̱chau chabtu, yinu n ke ti̱n n yange, ti̱chau kanang ti̱ti̱le chiye ti̱tu a be ki̱nitu, ti̱bi̱du chi we di̱ne ti̱kurante.

²⁸Aya ka ti̱ya mwarangu ko, “Nam wu n wu butu ka di̱yore, ti̱wuduwe, di̱ne ni wu a fwami̱ne, a le mwang ri̱ka ya̱m ki̱mu.”

²⁹Mi̱n fwa ti̱kuran mitu, n ke ti̱chintu. Wuka chi̱n ka medu ka yidu ko amayire ti̱kuran wuka ni ka mwatiye?

³⁰Chi mang chau mang wanati̱ Kwama, di̱ne wule wuka ni ka swa̱ba mi chi mang chau mang wanti̱ Kwamate?

³¹Kanang ti̱ti̱le chiye ti̱tu ti̱maditu n ti ti̱tu ti̱chaditu n ti̱ ti̱tu ti̱noditi kwang, ti̱ma chi ka ni Kwama dwiyene.

³²Ti̱yodu ki̱le we a ni̱bu Yafudamu, ka Yelena ka ni̱bu bunti̱ki̱ Kwamame.

³³Ti̱ma yinangu mi̱n madangu, mi̱n funti̱bwi mi ke n kawure a nwe ta̱ma̱ng mangu, mang mabu di̱ne yimi m mi̱kun aya di̱ne ni̱bu nabwen ke n kawure a ya yuku.