Read tula 1 Koronti 11 Bible Online

1 Koronti 11 - tula bible

1 Koronti 11

¹Ti̱bunti̱n dami yinangu mi̱n bunti̱ Masiyangu.

²Mi̱n wer chi̱nu di̱ne ti̱kuriyu we kanang ti̱ti̱le chiye, ti̱tatti̱ miyaku bunti̱kangu yinangu mang fwa chimi̱nangu.

³Aya chi mi̱n baddu ta yinde nang ti̱tu. N Kwama nang wu ki̱ni dukan a dur Masiyane, n Masiya nang wu ki̱ni dukan a dur Kwartane, kwarta nang wu ki̱ni dukan a dur nayene.

⁴Kwarta ka yinge dur ki̱nu yo ki̱ twa̱ba̱ buni ka ka ma fa̱kui we ya̱m Kwamame, a nibu Yesu dwiyentu.

⁵Aya Naye ka twa̱ba̱ buni ka ka ma fa̱kui we ya̱m Kwamamu ki̱ni dur ki̱ni ka̱si̱r a ne chi we, a nibu kwarta ko dwiyentu a no ka la chi ka n ki̱n a kwa̱l dur ki̱nu kwale.

⁶Ka naye a yiko neka bwa̱u chi we dure, bunge a kwa̱l duru, aya yo chitu a kau chi dibwi we naye ka kwa̱l dure, bunge a nang yinge duru.

⁷Kwarta a dodu chi we duru yo ki̱sii Kwama di̱ne kwarta dwiyen Kwamai, ki̱wulang Kwamang aya naye dwiyen kwartai.

⁸Di̱ne ni wu kake a chirebu a naye, aya naye a chire a kwarta.

⁹Ti̱nti̱ne n Kwama a yo naye di̱ne kwarta, n ke ko kwarta di̱ne naye.

¹⁰Di̱ne yiko, a mwituwe naye ka bwa̱u chi we duru, kanang chikiye, ki̱yung di̱mwal dukani̱n di̱ne ni̱bu ti̱tumbi̱ri Kwamamu.

¹¹Ki̱ni yiko, we di̱n Tewuduwe, naye a newe dang n ti kwarta, kwarta a newe dang n ti naye.

¹²Nangki̱n kasi ki̱ku naye wu kakke a chire a kwartangu, we yiko, naye a bi̱u kwarta aya kanang ti̱ti̱le chiye a fa̱la̱ng Kwamang.

¹³Ti̱da̱ngi yire? A le naye ka twa̱ba̱ bunitu we tibe ni̱be ki̱ni duru a yi̱nge ba?

¹⁴We bi̱yili̱mu n ke chi dibwi ka kwarta a du riitu nabwen we dur ki̱nu a kwalbukwalenga?

¹⁵Aya ka naye ki̱ni rii ti̱swa̱mite, ka kau ki̱mi̱n chi ri̱kakkiya? Di̱ne n Kwama a ni ki̱n ko ke a yinge duru.

¹⁶Aya ka wuka ni ki̱baddu ka kwila ya̱m bi̱be, chi mang fwaditu a ne wuka da wu mang yime we ka n ke wuwe. Ni̱bu we kambi Kwamatu a da̱u ya̱m bi̱bu a fi wiine.

¹⁷We ki̱ku yilang, mang wer chinbu, di̱ne muraki̱ changu n ke ki̱yilang, ki̱ku a chi dibwiyang.

¹⁸Bi̱bu mang mwendi̱mu nang bi̱bu: Ka ti̱ ya duum muraki̱mu a ni̱bu bunti̱ki̱me, n nwe ko bi̱ngai ki̱le tibe chi̱n, n ke ya̱m bi̱bu mi ka fwedu.

¹⁹Aya ki̱kumang a dakan bi̱ngaiyu ka le tibe chi̱n di̱ne ke ni̱bu ki̱tum yilemu a chire kwa̱rikwa̱ri.

²⁰Yo ti̱murade ta bebu tiko beta no mwe ki̱danne ni̱bu bunti̱ki̱me.

²¹N ya ya̱mi ko bi̱kam chimu ki̱chau chabtu chi̱ntu a yanti̱bu bi̱kamu ko ke chi kera ware. Di̱ne yiko bi̱kamu ki̱du fiko ki̱ni chun aya bi̱kamu ki̱lami̱n ti̱noritu ki̱yadu.

²²Ti̱tu Wureni? Yoye ti̱tu bi̱yili̱ma? N ti̱n ti̱ne loni we fi ta chammi̱ne chabtu ta nomi̱n teda? A no dakan mang fwadu mi wule we bi̱bu ya̱m ni̱bu? Ti̱badu mang wer chi̱na? Ki̱kumang a ne mang wer chi̱nu.

²³Di̱ne bi̱bu nang chi Tewuduwe fwaatu, mi̱n fwa chimi̱nu yinangu mang yuwengu, we kum wu a kwa̱li̱n ki̱ne, Tewuduwe n Yesu a da̱u Ki̱danne,

²⁴a kutengu a twa̱ba̱buniyangu, a wulan a yi ko, “Ti̱tu nang bwi miyu, yiyu mang ni di̱ne chini̱mu. Ti̱ma ti̱tu ti̱nang kuri̱n mi̱nu.”

²⁵A fiwiine, a da̱u sa̱ne mwe ki̱danne a kutengu n chi a chau chitangu a yi ko, “Sa̱ne wu n nang bwa̱ki̱ ki̱fwiyangu wu a tibe Kwama n ti chiniye, ki̱tuumu mi̱n kuru di̱ne chi̱ne. Ti̱nang madu ti̱nang kuri̱n mi̱nu ka nang ki̱ki̱le ki̱dangu ti̱nodange.”

²⁶Kanang ki̱ki̱le ki̱dangu ti̱chau ki̱danne, ti̱ noti̱ mwe ki̱danne we sa̱nenge, ti̱yung bi̱kamu ni̱bu tiko a bwa Tewuduwe di̱ne chi̱n, ka ki̱ladu.

²⁷Di̱ne yiko ka nang wuwule niye wu ka chau ki̱danne, ka ka no mwe ki̱danne wu a sa̱ne Tewuduwe ki̱ni ki̱taki̱ kange, a ma ki̱le we bwiyu n ti ki̱tuum Tewuduwe mu.

²⁸N kawure a ya̱nti̱la yikiyu yinang, yinu a chau ki̱danne a noti̱ mwe ki̱danne we sa̱ne Tewuduwe.

²⁹Di̱ne ni a chau ki̱danne yinu a noti̱ mwe ki̱danne we sa̱ne Tewuduwe a kurbu kunkaku ni̱bu bunti̱ki̱mangu a Fi̱ki̱mangu, a yal dur ki̱nu mi̱ne riye we chaku n ti noku n ki̱n a mangu.

³⁰Nang chi a yo bi̱kam chimi fusufusu ki̱ni buri̱ne, bi̱kamu a ne dukan we, yinu bi̱kamu ki̱bwarade.

³¹Aya ka no ni da̱ng yichireyu yinang yinu ni chade, a no a neni le riye.

³²Aya yo Tewuduwe ki̱mwata ni mi̱nu ki̱ni ti̱welan ti̱te, a yung ki̱tele chireyu ki̱chakakku wu ka yodu a ne ka mwata ni mi̱nu n ti ti̱ti̱nite.

³³Di̱ne yiko, kebu mi̱m ka ti̱muran di̱ne Chabtu Tewuduwe, ti̱yamma yichiyi kwang.

³⁴Ka chun ki̱bu wuka ki̱kumange, a chau, a lo, ke yo ta murade a kaddu ti̱welan we dutu chi̱ntu. We yikayu ya̱mi ka m benge, mang fwa chimi̱nu.