Read tula 1 Koronti 12 Bible Online

1 Koronti 12 - tula bible

1 Koronti 12

¹Ki̱ka̱ngu kebu mi̱m, mang mwal chimi̱n ki̱ti̱ntiyu Fi̱ki̱m Kwamam ki̱nikadiyu. Mang babu ta kadu ki̱ni kwalan swaanke.

²Ti̱yim we ki̱dangu n ti̱n no a yikai kuuti n ti̱n n ke ni̱bu bunti̱ki̱mangu, ni̱bu a butu chi̱n, ti̱le ti̱sii ti̱yobi ti̱tu a ne ti̱kuri we.

³Di̱ne yiko mi̱n baddu ta swaanu tiko ni wu Fi̱ki̱m Kwamam ki̱bunti̱ne a ne fwadu ko, “N Yesu a bwilan!” Ti̱nti̱ne a ne nii wu ka medu ka yidu ko, “N Yesu Tewuduwe we,” Ka n ke wu Fi̱ki̱m ki̱ti ki̱mi̱n kake.

⁴Ki̱kumang, ki̱ti̱ntiyu Fi̱ki̱m Kwamam ki̱nikadiyu we dangtidangti. Aya ki̱ni kwang ki̱chiredu a Fi̱ki̱m Kwamam.

⁵Wa̱ri yiyu a nangayu we dangtidangti, aya Tewuduwe wu ni maki̱mi̱nde wiin.

⁶Nangi̱ntu we dangtidangti, aya Kwama wiin wu ki̱ni kawure da make ki̱ni kwang.

⁷N Kwama ki̱ni kawure di̱mwal di̱du ki̱yung Fi̱ki̱m bi̱bu wauwadi̱mu we bwi kiye, di̱ne ke n kawure a ya makaku.

⁸Wuka ki̱ya ki̱ti̱me wu ka miya ni̱bu yingku chiimmi̱nde, aya wuka ki̱ya ki̱ti̱me wu a yingke we Fi̱ki̱m Kwamamu.

⁹Wuka a ya ki̱ti̱me wu a keku bi̱yili̱mange we Fi̱ki̱m bi̱bu, wuka a ya ki̱ti̱me wu a beku ni̱bange we ka Fi̱ki̱m bi̱biini̱m.

¹⁰Wuka a ya ki̱ti̱me wu a maku chi ka̱ta̱kiyange, wuka fakui a swaanku duum Fi̱ki̱m tiim, wuka a yingku ya̱ma̱ng ki̱ni yiini ni̱bi, wuka ki̱medu ki̱fwa ni̱bu mi̱n chi wuka nii a fwa ki̱ni wuka yiiye.

¹¹Ti̱chitu wu kwang ki̱chiredu a Fi̱ki̱m bi̱biini̱m, ki̱keradu yinangu n kawure ki̱badangu.

¹²Yinangu bwi niyu we ki̱ni di̱mbi̱ri̱mangu, ki̱ni fantiyu nabwen, kasi ki̱ku fantiyu nabwenangu, bwiyu ki̱ni wiin. Nang tiyangu m Masiya we mi̱nangu.

¹³Di̱ne n chi̱ni ki̱ni kwang ni ma batisma a Fi̱ki̱m Kwamam ki̱ni wiin, kasi no m mun n wu ni̱bu Yafudam, ka ni̱bu Yelena, ka ka̱be ka bwe lo ki̱ni kwang, ni no ki̱fi̱be Fi̱ki̱me ki̱ni wiin.

¹⁴Ki̱kumang bwiyu ki̱ni fantiyu dangtidanngti, a newe fi wiin.

¹⁵Ka nangu a no fwa ya̱m ko, “Yo mi̱n n ke fa̱la̱nge, m mi̱n n ke fi we bwiye,” ti̱tu a ne yodu n ki̱n a ne kau fi we bwiyu.

¹⁶Yiko ti̱n, ka ki̱tele a fwa ya̱m ko, “M mi̱n n ke nu, di̱ne yiko m mi̱n n ke fi we bwiye,” ti̱tu a ne yodu n ki̱n a ne kau fi we bwiyu.

¹⁷Ka no bwiyu kwang kana nuwe, a no mang nwe chiti wule? Ka no bwiyi kwang Ki̱telenge, a no mang num chiti wule?

¹⁸Da̱ng n Kwama a yo ka nang wuwule fiye we bwiyu yinangu n ki̱n a ku a daang.

¹⁹Ka no bwiyi kwang fi wiine, no yikayu bwi a fi̱re?

²⁰Aya da̱ng fantiyu we nabwen, aya bwiyu ki̱ni wiin.

²¹A ne dawe nu ka yi fa̱la̱ngu ko, “A ne lwangang mwang we n ti mi̱ne we,” Ka duru ka yi naniyu ko, “A ne lwangang mwang we n ti mi̱ne.”

²²A bwinti̱ yiko, ki̱la fantiyu ni kudu yinangu a ne dukan weyu nang yiyu a ki̱la a la chi ki̱ni nangayu.

²³Fantiyu ni kudu yinanga lambu yikaiyu ki̱ni ki̱siyangiyu ki̱ya ri̱kaku ki̱la chi. We yiko ti̱n n ti fantiyu a lebi̱ da̱ngkiyu, ki̱ya doku ki̱yilang.

²⁴Fantiyu a le yinangiyu a babu kaang doku. Aya n Kwama a do bwiyu, a yo fi wukuse a la chi ki̱ni nangangu.

²⁵Ke kwalan kunkake a ledu bwiyu we, a ya fantiyu a maka yichiyu, duum makaki̱mu ki̱ni wiin.

²⁶Di̱ne yiko ka wuka fi a nwe burange, fantiyu kwang ki̱nwe burangu ware, ka wuka fi a ya werke, fantiyi kwang ka ma ti̱mi̱lantu a fi wiine.

²⁷Di̱ne yiko, n ti̱n bwi Masiya, ka nang wuwule chi̱ne fi we bwiyu.

²⁸We kwa̱l ni̱bu bunti̱ki̱mi̱mu, n Kwama a yo fandubu a fi wu kakke, yinu a ni fa̱kubu bi̱bu fi wu robe, a ni bi̱bu ki̱miya chimu fi wutare, yinu a bunti̱ni ki̱ni bi̱bu ki̱ma chi ka̱ta̱kimu, yinu bi̱bu ki̱be buramu, yinu bi̱bu ki̱ma makaki̱mu, n ti bi̱bu ki̱to nangi̱n ni̱bi̱mu n ti bi̱bu ki̱fwa ya̱mi yiini ni̱bi̱mu.

²⁹Ni̱bu bunti̱ki̱mi kwang fanduba? Ka fa̱kubu? Ka ni̱bu miya ki̱ma? Ka n chi ki̱ni kwang ki̱ma chi ka̱ta̱kiya?

³⁰N chi ki̱ni kwang ki̱ni ki̱ti̱me wu ki̱be buri̱na? N chi ki̱ni kwang ki̱fwa ya̱mu ki̱ni yiini ni̱biya? Ka n chi ki̱ni kwang ki̱fwa chi ni̱bu a fwa yii ni̱ba?

³¹We fi, ti̱yo ni̱ru a ki̱ti̱ntiyu a la chi. Mang yung chi̱n wa̱re wu a la chiye.