Read tula 1 Koronti 14 Bible Online

1 Koronti 14 - tula bible

1 Koronti 14

¹Ti̱mu ni̱ru ti̱bau mi̱laku, ti̱mi̱la bakku ki̱ti̱nti yiyu a fa̱kui. Ka no ta mede, ti̱bau fa̱kutu.

²Di̱ne wu ki̱fwa ya̱m ki̱ni bene, a fwabu ya̱mu n ti ni̱bu ki̱fwadu n ti Kwama. Di̱ne a ne nii ki̱swaan chi ki̱fwadite we, di̱ne ki̱fwa chitu niyan swaanbi ki̱ni dukan fi̱ki̱m Kwaman.

³Aya wu ki̱ma fa̱kuiye, ki̱fwa ya̱mu n ti ni̱bu ke ni a ti kwir, a ya, a rub, ki̱kire ni̱bu mi̱nu.

⁴Nii ka fwa ya̱mu ki̱ni yiiniye, ki̱do yiki, aya wu ki̱ma fa̱kuiye ki̱do ni̱bu bunti̱ki̱m.

⁵Mi̱n baddu n kawure ka fwa ya̱mu ki̱ni yiini, aya n bau ta ma fa̱kuitu a la chi. Wu ki̱ma fa̱kuite a la wu ki̱fwa ya̱mu ki̱ni yiiniye ka n ke wuka ni ka fwa ni̱bu mi̱n chi n ki̱n a fwa ke a mu ni̱be.

⁶Kebu mi̱m, ka m be mi̱n fwa chimi̱n ya̱mu ki̱ni yiiniyu ta yimbiye, ti̱tu ka maka chi̱ni yire? Aya ka n wudu chimi̱n chi yaka fwedite, ka n fwa chi yingkiye, ka fa̱kuye ka miyake, n nang chi ka maka chi̱ne.

⁷A lakanbu n ti chi a ne ti̱kuri we, yinang kwa̱l n ti ki̱mili̱nki̱me. Ka ker ki̱nu a chirbe, ni ka yindi yire kangu ni̱bu ki̱ngadangu n ti kangu ki̱kudangu?

⁸Ka ni̱bu a kubu sum wu a kunne yinangu ni̱bu ki̱ kudange, n wure ka chire kunnu?

⁹We di̱chine yiko, ka ti̱fwa ya̱mu ki̱ni wuka yii wu ni̱bu a swaanbe, ni̱bu ka yim chi ti̱ fwade yire? A yung ya̱m bi̱bu a kau bi̱kusi̱m.

¹⁰Fwaku yiiniyangu we dangtidangti we ti̱ti̱nitu, ka nang wuwule ki̱ni ki̱kwi.

¹¹Yinu ka mang swaanbu yiiye, n kau nabakuu we nii ki̱fwa ya̱me, n ki̱n wu ki̱fwa ya̱me, a kau nabakuu we di̱ mi̱ne ti̱n.

¹²We di̱chine yiko ti̱n, yo kwer ti̱mi̱ladu ta ya ki̱ti̱nti yiyu a Fi̱ki̱miye, ti̱funti̱ bwi ti̱ni dukanu a yiyu ka maka chi̱nu n ti̱n ni̱bu bunti̱ki̱mu.

¹³Di̱ne yiko, kanang wuwule niye wu ki̱fwa ya̱mu ki̱ni wuka yiiye, a twa̱ba̱ buni ke n ki̱n a ya ki̱ti̱me wu ka yung ni̱bu yii wu n ki̱n a fwaan ya̱me.

¹⁴Ka n twa̱ba̱ bunitu ki̱ni wuka yiiye, fi̱ki̱m mi̱mu ki̱ twa̱ba̱du, aya mang swaanbu chi mi̱n fwaditu.

¹⁵Yoye mang ma wureni? Mang twa̱ba̱ bunitu a fi̱ki̱m, aya mang madu ki̱ni ti̱kuran mita? Ma kau teni Kwamai we fi̱ki̱m mi̱mu, aya mang madu ki̱ni ti̱kuran mitu.

¹⁶Ka a newe yiko, ka n dela Kwama a kana fi̱ki̱me, yinu kanodu n ki̱n wu ki̱nwene, wu a nwebi̱ yii wuwe, we kedu ko “Amin na?” We di̱wanu mun madi̱nu, ka a yimbu chi mun fwadite, n chi ka bunmi̱n ti̱ni yire?

¹⁷Kasi ki̱ku mwang dela Kwama yinangangu, aya ni wu a kunbu ki̱ni chi.

¹⁸N Kwama a mabe di̱ne n la chi̱n ki̱ni fwaku ya̱mu ki̱ni yiiniyangu.

¹⁹Ki̱ni yiko we muraku ni̱bu bunti̱ki̱mangu, n ke mang fwa ti̱kwa̱li ya̱miti tunu ki̱ni ti̱kuran mitu ke m miya bi̱kam mi̱n n ti ki̱ku mang fwa ti̱kwa̱li yiitu kuniri kubu ki̱ni wuka yiiyangu.

²⁰Kebu mi̱m, ti̱madu ti̱kurantuwe yinang bwesi̱m, aya we muli̱nu, ti̱kau yinang bwesi̱m, aya ti̱kabbi ki̱ni ti̱kurantu yinang seli̱bu.

²¹A mwal we ya̱m Tewuduwe ko, “Mang fwa ya̱mu n ti rungko ni̱bu ki̱fwa yiini dangtidangtimu, ke a fwa ni̱bu mi̱mu mi̱n ya̱m. N chi ka fwa chi mi̱nu ki̱ni yikayu yiini, aya a mwituwe ni̱bu mi̱mu a ne ka nweiyu.”

²²Ti̱da̱ng fwaku ya̱ma̱ngu ki̱ni yiiniyangu n ke di̱mwal we ni̱bu bunti̱ki̱mu. Fa̱kutu di̱ne ni̱bu keku bi̱yili̱mang, n ke di̱ne ni̱bu bi̱bu a kebu bi̱yili̱mi̱mu.

²³Di̱ne yiko ka ni̱bu bunti̱ki̱mu a muran, yinu n kawure ki̱fwa ya̱mu ki̱ni wuka yiiye, yinu bi̱kam bi̱bu a yimbu chitu ni̱bu ki̱maditi̱mu, ka bi̱bu ki̱si di̱yori̱m a lewe fiko, n chi a ne ka yidu ko, fangi̱mi ki̱ma ni̱bu bi̱ba?

²⁴Aya ka n kawure ki̱ma fa̱kuitu, yinu wuka wu a bunti̱bu Kwama ka wu a yimbu chi ni̱bu ki̱maditu a lewenge, ya̱m kawure mu a ne twai ki̱nu, ka yo ki̱nu ka wo ki̱ti̱ma?

²⁵Chi a ni̱r ki̱ne ka chiredu, we yiko n ki̱n ka chungdu ka sii Kwama ki̱ni ya̱mu ko, “Bi̱yili̱m Kwama we ware n ti chi̱n.”

²⁶Yoye ni madi yire kebu mi̱m? Yo ta murane, wu ki̱dela Kwama ki̱ni teni, wu ki̱yung chi ni̱bu a fwa, wu chi a ki̱ke Kwama, wu ki̱fwa ya̱mu ki̱ni wuka yii, wu ki̱fwa chi naba yiiniye ki̱fwade, ti̱ma chitu a da we Fi̱ki̱m Kwamamitu.

²⁷Bi̱bu ka fwa ya̱mi wuka yiimu a ladi bi̱ta we, ti̱nti̱ne wuka a nabu kuteng yo wuka a fwa a riye, wuka a yung ni̱bu chi naba yiiniye a fwaatu.

²⁸Ka a ne ni ka yung ni̱bu chi naba yiiniye a fwaatu wenge, ka n wure wu a no fwa yiiye a fwaduwe tibe ni̱bu bunti̱ki̱me, a fwa ya̱mu a tibeko n ti Kwamako.

²⁹Ni̱bu ki̱ma fa̱kumu, a ladi bita we, aya bi̱kam a swe chi n chi a fwaatu.

³⁰Ka Kwama a wudu wuka we bi̱bu a sweswemu ya̱m bi̱be, wu a mwe fwaku ya̱ma̱nge a lemi̱n.

³¹N ti̱ni ki̱ni kwang ti̱ma fa̱kuitu ki̱ni ti̱kati̱tu, a lami̱nti̱ yo n kawure ka miya chi we, yinu n kawure ka kum ni̱ru we.

³²Fi̱ki̱m fwaki̱mu a nani fa̱kubu.

³³Di̱ne Kwama chire n ke wu ki̱yo kulangkulange, aya naba li̱mange we ni̱bu bunti̱ki̱mu.

³⁴Ti̱dudu nati̱bu a yingledu muraku ni̱bu bunti̱kangu we ki̱ni didi̱kuni̱nu. A daka chimi̱nbi yiko, n chi a nabu kwartabu, yinangu a fwa we miyaku Musangu.

³⁵Ka n chi ki̱baddu ka yim ti̱kan chiye, a bi̱u kwartabu chimu a loni. Di̱ne chi dibwi naye ka fwa ya̱mu we tibe ni̱bu bunti̱ki̱me.

³⁶Ya̱m Kwamamu a mwe a di̱ chinenga, ka ya̱m Kwamamu a ya bwa di̱chine n ti̱ni ti̱kuna?

³⁷Ka wuka ni ki̱kamadu ko n ki̱n fa̱ku we, ka ki̱kudu n Kwama a ni ki̱n wuka ki̱ti̱me wu a Fi̱ki̱me, a dakan ka swaanu ko, chi mi̱n mwal chimi̱nde, ki̱ni dukan Tewuduwe.

³⁸Aya ka wuka a swa̱ba ya̱m bi̱be, a ne nii ka keti̱ ki̱ne we.

³⁹Di̱ne yiko kebu mi̱m, ti̱kube fa̱kuitu, aya ti̱kodu fwaku ya̱ma̱ngu we ki̱ni yiiniyu.

⁴⁰Kasi no ti̱ma ti̱ti̱le chi, ti̱ma der yinangu a ne kau burti̱kangu.