Read tula 1 Koronti 15 Bible Online

1 Koronti 15 - tula bible

1 Koronti 15

¹Ki̱ka̱ngu kebi̱mi̱m, n ke mang kur chimi̱n ya̱m bi̱li̱mu mang wi mang fwa chimi̱ni̱mu, bi̱bu ta yiu, ti̱yadu we muremu.

²Ya̱m bi̱li̱m bi̱bu, n nang bi̱bu ki̱yu chini̱mu ka ti̱ti we keku bi̱yili̱mang change. Aya ka a newe yiko, keku bi̱yili̱mang changu a kau ti̱kusi.

³N fwa chimi̱n chi a no la chiti kwange n ti ya̱mu ni̱bu a dub a fa̱la̱ng mangi̱mu. Bi̱bu ko, “M Masiya a bwa di̱ne ki̱leti chireyimu, yinangu ya̱m Kwamamu a fwangu.”

⁴Yo a fur ki̱ne, n ki̱n a kun we wutare di, yinangu ya̱m Kwamamu a fwangu.

⁵M Biti̱r ka nang chikiye wu di̱kanu di̱n ki̱nu n Kefase a ku ki̱n n ti fandubi̱bu kub chiri burabi̱mu

⁶Yinu n ki̱n a fweti̱n a bi̱kam kebu kuliti tunu a ki̱swi ki̱ni wiin, bi̱kam chimu we ki̱ka̱ngu, aya bi̱kamu a dunni we ti̱ti̱nitu.

⁷N ki̱n a fwe Yakubu mi̱ntuwe, yinu a fwe fandubi̱bu mi̱ntuwe ti̱n.

⁸A kuteng ki̱ku bi̱kamu a kuwangu, m mi̱n m be, n ku ti̱n, kasi ki̱ku m mi̱n tiyang bwe wu ni̱bu a bi̱u a lambi̱ ki̱swi kongu.

⁹Di̱ne m mi̱n nang wu mang swan kuteng we fandubi̱be, mang lwebu mang kau fandu, di̱ne riye mang ni ni̱bu bunti̱ki̱me.

¹⁰Aya di̱ne li̱me Kwama, n kau yinangu ta kuyangu, ti̱nti̱ne li̱me a mamiye n ke wukuse. N ki̱lin be, m ma nangangu a lati̱ bi̱kamu fandubu.

¹¹Di̱ne yiko, a lakabu ka naba di̱mware m mi̱ne ka n chiye. Chi a la chiye n nang ti̱tu. Ti̱ke bi̱yili̱mu we di̱mwaru nang manu.

¹²Aya yo ni̱bu we ki̱ma di̱mwaru ko m Masiya a kun fure, yinu a mayire bi̱kamu we ki̱fwadu ko a ne kunku kwa̱miyang we?

¹³Ka a ne kunku kwa̱miyangu wenge, a yung Masiya a kumbu we bi̱bwari̱mu.

¹⁴Ti̱nti̱ne ka m Masiya a kunbu we bi̱bwari̱me, a yung di̱mwar ni̱nnu di̱kusi̱n, yinu keku bi̱yili̱mang changu ki̱kusang.

¹⁵A kau ni̱n ma Kwama mi̱n di̱mwar ti̱kwani̱n, di̱ne ni̱n ma di̱mwar ya̱m Kwamami̱nu ko n Kwama a kukku Masiya we kwa̱miyu. A yung ya̱m bi̱bu a kunebu ka a ne kunku kwa̱miyangu wenge.

¹⁶Nangki̱n ka a ne kunku kwa̱miyangu wenge, a yung m Masiya a tibu kunnu we furu.

¹⁷Yinu ka a kuki̱bu Masiya, keku bi̱yili̱mang changu ti̱kusi, lanta di n ti̱n ni̱bu ki̱leti̱m.

¹⁸Ka yiko, a yung bi̱bu a bwa a di̱n Masiyani̱mu a twiyana?

¹⁹Ka yo ni̱re chire ni yodu di̱ne Masiya a kau wu di̱ne ti̱kuri ti̱ti̱niye, a yung ni kau chi ki̱bunei we nui ni̱biyu.

²⁰We bi̱yili̱mu m Masiya a kun we bi̱bwari̱mu, ti̱tu a yung ni̱bu ka kukku bi̱bu ki̱da duumi̱mu.

²¹Ta kuba, yinangu ni wiin a be ki̱ni bwa we ti̱ti̱nitangu, yiko ti̱n, kunki̱ku a furangu a mwe a nii wiin.

²²Nangki̱n, yinangu ni̱bi kwang ki̱bwadu di̱ne Adamuwangu, ni̱bi kwang ka kunnu di̱ne Masiya.

²³Aya kunki̱ku ka kadi ti̱kattu. M Masiya a mwe, yinu ni̱bu bunti̱ki̱mu ka kunnu di n ki̱n ka ki̱lade.

²⁴Yinu di swan kute ka bedu, ki̱dangu ka ni Kwama Te mati̱n kitangu, a kutengu n ki̱n a la ka nang wuwule fwakware Kwamangu.

²⁵Di̱ne a mwintuwe m Masiya ka chau mati̱ntu, n Kwama ka yo fakwarbi̱ ki̱mi kwang a wanana ko.

²⁶Fakware ni̱bu ka swanu ka chidde nang bwa.

²⁷Nangki̱n ya̱m Kwamamu a fwa ko, “N Kwama a du chiti kwang a wumeko.” Aya yinangu a fwa ko, “N Kwama du chiti kwang a wumekongu,” a yungbu ko n Kwama wetuwe fa̱li kiyu.

²⁸Yinu yo n Kwama a du kati̱ti̱le a wumeko, bwe ka swedu a wume Kwama wu a du chiti kwang a wume bwe, ke n Kwama a kau wuduwe we kati̱ti̱le chiye ka a fi̱re.

²⁹Ka kwa̱miyu a ne kunne, a dakabi̱ ni̱bu ka ni̱n ma batisma wu a kau ki̱swerang we kunki̱ bi̱bwari̱me, ni̱bu ki̱madi yiko di̱ne bi̱bwari̱mu ka kunnu wuka di.

³⁰Ka a ne kunki̱ kwa̱miyangu wenge, a mayire ni ma riye ki̱dati kwange?

³¹Mi̱n twa̱n chimi̱n chi kebu mi̱m, diti ki̱da̱ng m mi̱n a kakku bwaang. Bi̱yili̱m bi̱bu a tiwe yinangu mi̱n ri̱kadu di̱ne kunkaku changu n ti Tewuduwe Yesu Masiyangu.

³²Yo mang le mi̱n makadu n ti ni̱bu bi̱bu yinang nai yibari we Afisa, we yo ni̱re niye, li̱mang kangu wureni ka a ne kunku kwa̱miyangu wenge? “A labu chi ni ka chadu ka nodu, yo bwa ki̱yang nidu fi̱nenanga?”

³³Nii a buti̱du chi̱n we, “Fiswe n ti ni̱bu bi̱bwilame ki̱kai da wuyile.”

³⁴Ti̱ki̱lawe ki̱ni ti̱kuran ti̱yili, ti̱du ki̱letiyu. N fwa ying ke ti̱nwe dibwi di̱ne kono nang bi̱kam chimu a yimbu Kwama.

³⁵Kasi ki̱ku bi̱kam chimu ka medu ka bi̱u chi ko, “Bi̱bwari̱mu ka kunni yire?” Ka chiredu ki̱ni yiyile bwi?

³⁶M mun di̱ra? Mwang yimbu ka n fi chite, ki̱bwadu yinu ki̱ kiyeda?

³⁷Ti̱nti̱ne chitu mwang fitu, n ke kasi chitu ka kiyeditu, aya chi mwang fitu ki̱kwi, ka chame, kasi no bi̱bi̱le duum bi̱bu mwang fiim.

³⁸Yinu n Kwama ki̱ni ti̱chitu wu bwi yifwi yinangu n ki̱n a ku diyang, ka nang wuwule ki̱nuwe ki̱ni duum bwikiye.

³⁹Yinangu ki̱kutiyu n ti tiniyu a lakanangu, nam bwitiye a lakati̱n. Ka wu a niye, ka nandi̱kiye ka wu a ki̱ni̱be ka wu a chi̱nge.

⁴⁰N ki̱n a yo kwa̱li̱n chi̱nu a diinu dang n ti di̱du a ti̱mi̱nu. Aya di̱du a ti̱mi̱nu ki̱ni dwiyen kitu dang, di̱du a diinu ki̱ni ti̱kitu dang ti̱n.

⁴¹Dwiyen kukoti̱ dang, ti̱tu a swangitu dang, ti̱tu a ki̱switi̱tu dang, kono nang ki̱switiyu yikayu a la yikayu ki̱ni dwiyentu.

⁴²Nang tiyangu kunki̱ kwa̱miyu we mi̱nangu, chi niyang fitu ki̱fwidufwiye, chi a kunne a ne bwati̱nuwe.

⁴³Yo ni fide, ni kai yile ko, aya ki̱chiredu ki̱ni dwiyen, yo niyang fiye a ne dukan we, aya ki̱chiredu ki̱ni dukan.

⁴⁴Bwi chireyu ki̱ka̱ng ni fidiyu yibwari, aya yiyu ka kuniyu n ke yibwari. Yinangu bwi yibwariyu wengu, bwi yiyu a ne bwadiyu n wetuwe ti̱n.

⁴⁵We yiko yinangu a mwalangu, “Ni wu kakke n Adamu a kau nii wu ki̱ni ti̱kuriye.” N Adamu wu a swane, Fi̱ki̱m bi̱bu ki̱ni ti̱kurim.

⁴⁶Bwi yibwari a mwe a be, yinu yiyu a ne bwadiyu a nabe.

⁴⁷Nii a mwe ti̱me a be a ki̱ti̱m, a kur ki̱ti̱n, aya wu robe a be a bwa diye.

⁴⁸Yinangu wu a be a ki̱ti̱me we mi̱nangu, bi̱bu a kuri̱mu yiko ti̱nti̱n, yinangu wu a diye we di̱mi̱nengu, bi̱bu a diimu wetuwe yiko.

⁴⁹Yinangu niyang chirkan n ti wu a kurangu, nang tiyangu ni chirkan ti̱nu n ti wu a diyengu.

⁵⁰Chi mi̱n fwa chimi̱nitu Kebu mi̱m, bwi chireyu ki̱ni luktan n ti ki̱tuumiyu a ne le bwa diye, chitu ki̱fwiditu a ne le bwanu chitu a fwibitu wemi̱ne.

⁵¹Ti̱nwe mang fwa chimi̱n bi̱kam ya̱m bi̱lairi̱m, chi̱ni ki̱ni kwang a ne ni bwadu, aya chi̱ni ki̱ni kwang bwiyu ka sutedu.

⁵²Ka fwedu bi̱nabi̱na yinang ki̱ki̱lbe nuwe, ni̱bu ka nwe sum wu wuka a ne nabede, kwa̱miyu ka kunnu ki̱ni bwi yiyu a ne fwidufwiyei, bwitiyu ka sutedu ki̱ni kwang.

⁵³A mwintuwe bwiyu a fwibufwiyeyu ka sute yiyu ki̱fwidufwiyeyu, yinu bwi yiyu a bwabiyu ka sute yiyu ki̱bwadubwayu.

⁵⁴Yo ta kudu bwi yifwiriyu a suten a kau yiyu a fwibiye, yinu bwi yibwariyu a kau yiyu a ne bwadiye, nang ki̱dangu di̱kwa̱l di̱du a mwalmwalenu ka ridu ko, “Bwa a twiyan ki̱diya, ni̱bu a chau ki̱la we bwa.

⁵⁵Bwa a bwa̱le dukan munu? Bwa a bwa̱le twiyang mwa̱ngu?”

⁵⁶Nangki̱n, ki̱letiyu nang twiyen bwangu, yilangu nang chi ki̱ni ki̱letiyu dukane.

⁵⁷Ni wana Kwama ki̱diya kwadu n ki̱n wu ki̱ni ki̱la we di̱n Masiya Tewuduwe n Yesu.

⁵⁸Di̱ne yiko, kebu mi̱mu mi̱n mi̱ladi̱m, ti̱ti ki̱ri̱ng, ti̱ki̱ruwe, ti̱nang funti̱ bwi kwadu we nangang Kwamangu, di̱ne ti̱yim riye ti̱nwedu di̱ne Tewuduwe n ke wukuse.