Read tula 1 Koronti 16 Bible Online

1 Koronti 16 - tula bible

1 Koronti 16

¹Ki̱ka̱ngu we ya̱m makaku ni̱bu bunti̱ki̱mangi̱mu ti̱ma yinangu mang yii bi̱bu a Ka̱latiya mi a mangu.

²Kanang wuwule difi̱kare, n kawure a nang yo ti̱kan chi, yinangu dukan ki̱nu we mi̱nangu, ti̱yanduwe ti se mang be.

³Ka n yange, ti̱sutu bi̱kam we tibe chi̱n, mang nika chi lwangi̱n ti̱tu ka maka chi̱ntu, yinu n chi ka yika Wurchalima.

⁴Ka a le mang ya ti̱ne, yamang yote chi̱nu.

⁵Mang ya chimi̱n siram, a kutengu mang kana ti̱m Makidoniyamu. Di̱ne n tu m bwa̱u we ni̱ru mang ya Makidoniya.

⁶A ne mang swedu nabwen we bwa di̱chine, ka sa̱na̱ng ka tai ti̱nu we bwako. Ka yati̱ yoye we bwa mang yade kwang.

⁷Aya mang babu mang sudu, mang kubu chi̱n. Di̱ne no mi̱n baddu mang ma yikai diti n ti chi̱n ka Tewuduwe a kemiye.

⁸Aya mang tidu we Afisa ka lami̱nti̱ di Fentikose.

⁹Nangangu a wuden we fi nabwen, ni̱bu nabwen ki̱bedu kasi ki̱ku mi̱ni ki̱ni kati̱bu nabwenangu.

¹⁰Ka Timoti a benge, a swe n ti chi̱n a nwedu tayi we. Di̱ne n ki̱n ki̱ma nangang Tewuduwe yinang kangu mi̱n madangu.

¹¹Di̱ne yiko, ti̱kedu wuka nii a swa̱badu ki̱n we, ti̱yo ki̱n li̱mang a be fi a di̱ mi̱ne, di̱ne mi̱n da̱ng wa̱re ko n ti kebi̱bu ware.

¹²Nangki̱n n ti ke chire n Afolos ti̱n, n wana ki̱n mi a be bwa di̱ chi̱ne ware n ti kebi̱bu, aya a kebu ka bedu ki̱ka̱ngu. Ka bedu we ki̱swi n ki̱n a da̱ng a da̱nge.

¹³Ti̱swengi doku bwiyang, ti̱ti ki̱ri̱ng we keku bi̱yili̱mang changu, ti̱ kunka yichiyu, ti̱madu ti̱kali we.

¹⁴Chitu ta maditi kwang, ti̱ma ki̱ni mi̱laku.

¹⁵Kebu mi̱m, ti̱yim ni̱bu a mwe a wo ki̱ti̱m a ti̱m Akayamu nang di̱kur lon Yistifanuse, n chi a ni yichiyuki̱maka ni̱bu bunti̱ki̱mu.

¹⁶Mi̱n wana chi̱nu, ti̱ma duum ni̱bu bi̱bi̱mumi̱n kwa̱mbi̱r ki̱ni ni̱bu niyang nwe riye waremu.

¹⁷N nwe ta̱ma̱ng beku Yistifanusengu n ti Fatunatus, n ti Akakus, wu a kammi yinangu n ti̱n ta benge.

¹⁸Di̱ne n chi a ribe mi ni̱ri ki̱ri̱m, yinangu n chi n ti chi̱nangu. Duum ni̱bu bi̱bi̱mu ti̱ni chi dwiyen.

¹⁹Ni̱bu bunti̱ki̱mu a ti̱m Asiyamu ki̱siite chi̱nu. N Akila n ti Biriskila, n ti ni̱bu bunti̱ki̱m bi̱bu ki̱muradu a lo chimu, ki̱siite chi̱ni kwang we di̱n Tewuduwe.

²⁰Kebi̱bi kwang ki̱siite chi̱nu. Ti̱siti̱ kebu chimu ki̱ni kwarkaki̱ wauwadang.

²¹M mi̱na Bulus, mi̱n mwal di̱siru ki̱ni fa̱la̱ng mang.

²²Kanang wuwule niye wu a mi̱labu Tewuduwe, a kau ki̱mi̱n yo yii. Bengi daatu Tewuduwe.

²³Li̱me Yesu Tewuduwe a swe ware n ti chi̱n.

²⁴Mi̱n mi̱la chi̱ni kwang a di̱n Yesu Masiyanu. Amin.