Read tula 1 Koronti 3 Bible Online

1 Koronti 3 - tula bible

1 Koronti 3

¹Kebu mi̱m, mang mebu mang fwa chimi̱nbu ya̱m yinang bi̱bu Fi̱ki̱m a ti chimi̱n kaki̱m, aya mi̱n fwa chimi̱nu yinang ni̱bu ti̱ti̱nim, yinang bi̱bu a tibu rudu we di̱n Masiyani̱m.

²N bunti̱ ki̱ni chi̱n yinang bwesi̱mu ki̱ka̱r ya̱ri̱m, a newe yinang bi̱bu ki̱chau chabti̱m. Di̱ne ta lambi̱ bi̱bu ka chau chabti̱mu. Lanta ki̱ka̱ng ta lakabu n ti bwesi̱mu.

³Di̱ne n we chikku ta dubu da bwiye, ka ti̱kube chi a niitu, ti̱ma di̱kulanu n ti yichiye, a yung ta dubu da wu a bwiye. Ti̱nti̱ne ti̱chakakku ki̱ni da bwiye.

⁴Ka wu a yi ko, “M mi̱n mi̱bunti̱ Bulus,” Wuka ko, “M mi̱n mi̱bunti̱ Afolos,” Ki̱chitu wu a yungbu yinangu n ti̱n n bi̱u ti̱ti̱niyanga?

⁵Ti̱yalin wure ki̱ni Afolos? M Bulus n wure? N chi n ke kana ni̱bu nangang Kwama ma? N chi n ke ni̱bu a ma chimi̱n wa̱re ta ke bi̱yili̱m a di̱Kwama ma? N kawure ki̱ma nangangu yinangu n Tewuduwe a ke ki̱mi̱nang.

⁶M mi̱n wu mang mwe mang ma chimi̱n di̱mware, yinang wu a fi dume, Afolos a miya chimi̱n ya̱m Kwamamu nabwene yinang nii ki̱kur mwe, aya n Kwama nang wu ki̱yo ni̱bu ki̱dwiyedu we Fi̱ki̱me.

⁷Di̱ne yiko, wu a fiye, n ti wu a kur mwe, n ke ti̱kan chi, aya kana Kwama wu a yo chitu a dwiyene.

⁸Wu a fiye n ti wu a kur mwe ki̱ma nangang sureng. N kawure ka ya ki̱ti̱me sure ko.

⁹N ni̱nni kwang ni̱ma nangang Kwamang yinang bi̱bu ki̱su kali̱m, n ti̱n yinang kuu Kwama, nangang fa̱li Kwamang n ke nangang niyang.

¹⁰Di̱ne yili̱n li̱me Kwama, m mwe n ru tamme we ya̱m Kwamamu mang fwa chimi̱ni̱mu. Wuka nii ka chakakku we fi mang ti mi̱ne, ka nang wuwule niye ka yim dum mukki̱mu ki̱madi̱mu.

¹¹Aya a ne wuka nii wu ka ki̱ladu ka ruti̱ wuka tamme, ka la wu n Yesu Masiya a rubbe we.

¹²Wu ka chakakku ki̱ni mukku we tamme wu ka ki̱ni si̱nariya ka asurfa ka kali yiyiliye ka ti̱ti̱niye, ka swa̱ki̱ ka rudenge ka mwariye.

¹³A ne ti ke, ni̱bu ka swa̱ka̱ nangi̱n ti̱tu ki̱ni ki̱rang, chi ki̱rang ka twide a yung a mabu ki̱kwi, ka nangang mwangu a twiye, a yung n twiyan ki̱diya.

¹⁴Ka nangangu nii a mu we tammengu a twibe, n ki̱n ka ya ki̱ti̱me.

¹⁵Ka nangi̱n ni̱tu a twiye, a yung bunitu a tau nii wuko. Kasi ki̱ku n ki̱n ka swidangu, aya ka kaddu yinang wu a su a ki̱range.

¹⁶Yoye ta swaanbu ti n ti̱n se Kwama, ka nang chikiye fi swe Kwama? Ta yimbu ti Fi̱ki̱m ki̱mu we ni̱tu chinta?

¹⁷Aya ni ka kai se Kwamange, n Kwama ka kaiti̱ ki̱nu, di̱ne kan Kwamanu fi wauwade, aya n chi̱n nang kan Kwamamu.

¹⁸Ti̱buti̱du yichiyu we, Ka wuka nii ki̱kudu ko ki̱kasane ki̱ka̱nge, a mar dur ki̱nu yinang di̱r ke a kau wu a kasane.

¹⁹Nangki̱n yingku ti̱ti̱ni ti̱tangu kana di̱ttu we di̱Kwama. Di̱ne a mwal ko, “Ki̱tau ni̱bu yingkumu ki̱ni furali chitu.”

²⁰Ti̱nti̱ne a mwal ko, “Tewuduwe a yim ko ti̱kurantu a ni̱bu yingki̱miti kwang ka ti̱kusi.”

²¹Di̱ne yiko, ngaddu kwiye we bunti̱ki̱ wuka niyangu mwiko mwang nabi̱du, n ti̱n ki̱ni kwang ti̱ma bunti̱ki̱ku.

²²Ka m Bulus, ka n Afolos, ka n Kefase, ka ti̱ti̱niye ka ti̱kuriye, ka bwa, ka chi ki̱ka̱nge ka ti̱tu a kakkiye, ka ti̱ti̱le chiye n ti̱u chi̱n.

²³M ti̱n m bi̱u Masiya, m Masiya wu Kwama.