Read tula 1 Koronti 4 Bible Online

1 Koronti 4 - tula bible

1 Koronti 4

¹Di̱ne yiko, a dakan ni̱bu nangang Masiya bi̱bu n Kwama a yo ko ke a nang fwa chi ni̱bu a yimbu we ya̱m Kwamamitu.

²Nangki̱n, ni̱bu n Kwama a yo chi wakili mu, a dakan ta tum yile.

³Ta medu ta da̱ng yayumi, ti̱swe we ni̱tu chi̱ntu ka da̱nge. M mi̱n nemang swe yimiyu.

⁴Mang yimbu fi mang ki̱tami̱ne, aya ti̱tu a yungbu ko mang mabu ki̱le. Tewuduwe nang ni ka mwata chiti kwange.

⁵Di̱ne yiko, ti̱mwata wu nii mi̱nu we yo ki̱swi a tibu lande, ti̱yam yo Tewuduwe ka ki̱lade. N ki̱n nang wu ka kwa̱l chitu a ki̱liyetu n ti ti̱lairi ti̱tu a ni̱rite. Yinu fal n kawure ka ya ki̱ti̱medelaku kangu we Kwama.

⁶Kebi̱mi̱m, m ma nangangu n ti Afolos n ti dur mi̱n ke n yung chi̱n chitu mang tau mi̱n fwaditu. Ka ti̱yadu we chi ya̱m Kwamamu ki̱fwaditu a dakabu ni ka da̱u wuka tikakeko ka la wuka.

⁷N la bi̱kamu ni̱bu ki̱ni wureni? Muni ki̱ni wureni wu n ke chi Kwama a ni̱nne? Yinu ka chiti kwang a be a di̱Kwama, amayire mun ngau kwiye yinang ka mwang ma ti̱kan chi ki̱ni fa̱la̱ng mwange?

⁸Ti̱tu ti̱ku yinangu ta ya chitu ti̱baditu. Ti̱ku ti̱kau kulli̱m. Ti̱kau yinang mati̱m, n ni̱n n ke ti̱kan chi. Ka no ko n chi̱n mati̱me, a no nang ma mati̱ntu n ti chi̱n.

⁹Kebi̱mi̱m, we da̱ngku mangu n Kwama a Kwa̱rikwa̱ri ko fandubi̱bu nang swan kute we ka ti̱ti̱le chiye, yinang ni̱bu a ma chimi̱n mwataki̱ ka bwam, ko ke ni kau chi ti̱ti̱niti kwang, n ti ni̱bu ti̱tumbi̱ri Kwamamu n ti ni̱bu ka kur kwalangi ka ni̱n da̱ngde.

¹⁰Di̱ne niku duranagu we di̱Masiya ni kau yinang di̱bbu. Aya n ti̱n ki̱ni yingku we di̱Masiya! Ni̱n newe ki̱ni dukan, aya n ti̱n ki̱ni dukan! N ti̱n ti̱ya dwiyentu, aya n ni̱n, ni̱n nwe riye!

¹¹Lanta ki̱ka̱ng nang yabu chabtu n ti mwe, kono nang kuli̱n di̱dori̱nu nang yabu. Ni̱bu a ngau ni̱n, ni̱n nwe riye we fa̱li ni̱biyu. Nang mabu lo wu a dur ni̱nne.

¹²Ni̱n fwiyeni mwe we nangangu ki̱ni fa̱li ni ke ni̱n ya chi nang chaditu. Ni̱n yo bi̱bu ki̱yo ni̱mi̱n yiimumi̱n delaku. Ni̱n ma bwanu ki̱ni bi̱bu ki̱tura ni̱ni̱mu.

¹³Bwi nii a bwabu we ni̱bu ki̱fwa ya̱m bi̱kwani̱m a dur ni̱ni̱mu. Ni̱n kau yinang ti̱bwitan we ti̱ti̱nitu, chi a ne ni ka kwati̱nu we. We yiko lanta ki̱ka̱ng.

¹⁴Mang mwal chimi̱nbu ya̱m bi̱bu mi ke ti̱nwe dibwi. Aya di̱ne n ti̱n kebi̱mi̱me, mi̱n yung chi̱n mi̱laki̱ mangu ki̱ni ki̱kure.

¹⁵Kasi no n ti̱n ki̱ni ni̱bu yungki̱m ya̱m Kwamamu a lam kuniritu kubu, n ti̱n ti̱newe ki̱ni tebi̱bu nabwen. We di̱n Masiya n kau Te chi̱n, yo mi̱n fwa chimi̱n ya̱m bi̱li̱me.

¹⁶Di̱ne yiko, mi̱n wana chi̱nu, ti̱bunti̱ dami.

¹⁷N tum chimi̱n Timoti bwe mi wu mang mi̱lane, wu a mabu ti̱kali ki̱ni ya̱m Tewuduwe me. N ki̱n ka maka chi̱nu ta kuru yinangu mang bunte Kwamangu n ti miyaku mangu kasi no bwa̱le we tibe ni̱bu bunti̱ki̱me.

¹⁸Aya bi̱kam chimu a da̱u ko kano ne mang be bwa di̱chine, ki̱ku ki̱ti̱ni dur.

¹⁹Aya ka n Tewuduwe a du mi̱ne, mang ya bwa di̱chine a ne tike, mang kute ni̱bu bi̱bu ki̱kukku durumu ka tekan chi we ti̱tu a ya̱mi yikusiye.

²⁰Di̱ne yaa Kwama a bunti̱bu a meku ya̱ma̱ng, aya dukan Kwaman.

²¹Di̱ne yiko, ti̱swau chi a la chiye, m be chimi̱ne ki̱ni kwa̱ngta̱nga ka m be chimi̱ne ki̱ni mi̱laka?