Read tula 1 Koronti 5 Bible Online

1 Koronti 5 - tula bible

1 Koronti 5

¹N nwe ya̱mu ko yaritu a lala we tibe chi̱n, a lati̱ kuu ni̱bu bi̱bu a yimbu Kwamamu. N nwe ko wuka nii a da̱u kaye neki̱ne ki̱dadu ware.

²Yo ti̱ri̱kati̱ bwiye, ti̱tu chi kaiyan ni̱ri a lwebu chi ta chaki̱n nii wu we tibe chi̱na?

³Kasi ki̱ku m mi̱n n newe n ti chi̱n a bwiyangu, aya m mi̱n we n ti chi̱n a Fi̱ki̱m. We di̱n Tewuduwe n Yesu, mi̱n fwadu yinangu m mi̱n ware n ti chinang, ti̱wela ni wu a ma nangang ki̱ke.

⁴We fi ta murande, m mi̱n we n ti chi̱n a Fi̱ki̱m, n ti dukan Tewuduwe n Yesu.

⁵Ti̱chaku nii wu we tibe ni̱bu bunti̱ki̱me, a twaiye kwa̱ngta̱ng Setan didiin. Yo ka ki̱lade, ti̱kuri kitu ka swidu kasi ki̱ku bwikiyu ka bwadu we di n Tewuduwe ka ki̱lawede.

⁶Ti̱ri̱kadu chi we, ka ta du nii wu a ma yariye we tibe chi̱ne. Ta yimbu tiko ka ti̱du nii wiin a chakakku ki̱ni yarite, a ne ti ke bi̱kamu nabwen ka ledu kani̱n ma ti̱na?

⁷Ti̱cha̱ki̱ naba yariye wu, we tibe chi̱n, ke a fi̱re chi̱ni wauwadu. N Yesu Masiya nang kwan Yiye yabake chi̱renu, a kur ki̱tuumu di̱ne chi̱ni.

⁸Di̱ne yiko we Yiye Yabake chire, ni ki̱la ti̱nu ki̱danne wu ka̱re wu a bwila we, wu a bwila n ti nangi̱n ti̱kusiye we. Aya ni chau ki̱danne wufwiye wauwadu wuyile.

⁹Yo mang wi mang mwal chimi̱n lwangi̱ne, n yi chi̱n mi ti̱kunkaduwe n ti ni̱bu ki̱ma yarimu.

¹⁰Aya mang fwabu ya̱mu a dur ni̱bu ti̱ti̱nim bi̱bu siiku di̱yor a kau chimi̱n bwiimu ka bi̱bu mi̱kakwiye a la dukan chi̱ni̱me, ka dabi̱kuume, ka bi̱bu ki̱sii di̱yori̱me. A no ka la chi ta du ti̱ti̱nitu ke ti̱kunkaduwe n ti duum ni̱bu bi̱bi̱me.

¹¹Chimi̱n fwaditu nang ti̱tu. Ti̱kunkaduwe n ti bi̱bu ki̱yal dutu chitu ko n chi kebu ni̱bu Kwamam aya ki̱ sii di̱yor, ka mi̱kakwiyenge, ka bi̱bu ki̱wile ya̱mi̱me, ka bi̱bu ki̱si di̱yori̱me, ka bi̱bu ki̱nora chime, ti̱chadu kasi no chi we n ti chi.

¹²Lwangang mangu wule wu mang wela bi̱bu n ke ni̱bu bunti̱ki̱mi̱me? Aya n Kwama nang wu ka ma chimi̱n mwataki̱ke.

¹³N Kwama nang wu ka mwata ni̱bu ti̱ti̱ni mi̱nde. Ti̱chakku wu bwila nii we tibe chi̱n.