Read tula 1 Koronti 8 Bible Online

1 Koronti 8 - tula bible

1 Koronti 8

¹Ki̱ka̱ngu we ya̱m chabtu di̱yori̱mu, ni yim yingki̱ku we nabwen, ti̱nti̱ne yingki̱ku ki̱bedu ki̱ni ri̱kaku, aya mi̱laki̱ku ki̱mu chitu mubbe.

²Kwang nii ki̱kudu ko ki̱yim chite, a lanta ki̱ka̱ng a tibu yin chi a no dakan ka yinditu.

³Aya ka nang wuwule niye wu ki̱mi̱la Kwama, n Kwama yim ki̱n.

⁴We ya̱m chaku chabtu ti̱yoriti̱mu, ni yim we ti̱ti̱niti kwang, di̱yoru n ke ti̱kan chi, n kawure a yim ko Kwama wiin, a neti̱ wuka we.

⁵Kasi ki̱ku a kwiyabu chi ni̱bu ki̱yalu ko “Kwamatiye,” we ti̱ti̱nitu n ti bwa diye, di̱ne Tewuduwe n ti tebu lomu we nabwen.

⁶Ki̱ni yiko ni̱n ni̱n yim Kwama wiin. Kanang chikiye, Te wu chiti kwang a fwe a di̱ki̱ne, wu ni chadu ni nodu di̱ne ki̱ne, Tewuduwe wiin. N Yesu Masiya wu chiti Kwang a kab a di̱ki̱ne, n chi̱ni kwang ni be a bwa di̱ki̱ne.

⁷Aya n ke ka nang wuwule niye wu a yim ti̱chitu we, yo a lanta di bi̱kamu ni̱bu bi̱bu ki̱siiki̱ di̱yoru a kau chimi̱n bwimu, ki̱kamadu ko chabti̱tu chi chaditu n ti̱u di̱yor. Aya ka ma bwar yinangu n chi ka swaan chi ti̱yilitu n ti ti̱tu a lebitangu, ti̱nti̱ne ka ni chabe a subi chi.

⁸Chabti̱tu a ne yonu mwang ya lon Kwama, ka ni a chabe a ki̱ti̱bu chi. Ka ni a chabe a subu chi.

⁹Aya ti̱ma daandaan, ke ki̱la da wu ta ya, a kadu ware yarke we bi̱bu a yimbu Kwamamu.

¹⁰Di̱ne ka ni̱bu a ki̱la ku mun wu ki̱ni yingke mun chau chabtu di̱yoritu we se di̱yore, ti̱tu a ne ru chidu ka yodu n chi ka chau chabti̱tu ni̱bu ki̱siin di̱yorita? Di̱ne n chi a rubu we keku bi̱yili̱mang chiyanga?

¹¹Di̱ne yiko, yingku mwangu a ki̱la ki̱yo yare we ke wu a tibu rudu we keku bi̱yili̱mange, wu n Yesu Masiya a bwa di̱ne ki̱ne.

¹²Ka ti̱ma kebu chimumi̱n ki̱letiyu, we wu bale ti̱yo chimi̱n yare, ti̱ma Masiya mi̱n ki̱le.

¹³Di̱ne yiko, ka chabti̱tu ka yo kemi ki̱ma ki̱le, kasi no nam mang du wuku, ka ka yo kemi mi̱n yare.