Read tula 1 Koronti 9 Bible Online

1 Koronti 9 - tula bible

1 Koronti 9

¹Mi̱n n newe ki̱ni da yinang kawurenga? M mi̱n n ke fanduwa? Mang kubu Yesu Tewuduwa? Nangang mangu n ke chi a yo chi̱n ta yim Tewuduwenga?

²Ka we bi̱kamu m mi̱n n ke fandu Yesuwe, we di̱ chi̱ne m mi̱n fandu ko di̱ne n ti̱n ta medu ta ma di̱mwaru tiko m mi̱n naba di̱mware Tewuduwe.

³Wu nang soku durang mangu, we bi̱bu ki̱fwa bwila we du mi̱ni̱mu.

⁴Yoye a ne dawe nang chadu, nang nodu we loni chiya?

⁵Yo bi̱kamu fandubu n ti kebu bi̱wuwiye Tewuduwe mu n ti Kefas (Biti̱r)[1] a yikan ki̱ni nati̱bu chime, a dabu m ni̱n nang yika ti̱ni ki̱na?

⁶Ka a mwintuwe m mi̱n n ti Barnaba nang bau wa̱re nang makan yiniya?

⁷N wure ka ma nangang ni̱bu ki̱rangmu yinu ka fe dutu chiye? N wure ka su ku yinabe, a ne chau ti̱kulankite? N wure ki̱ni ki̱ran tanti̱kaiyin a ne no ya̱me?

⁸Mi̱n fwadu ki̱ni kamaku niyanga? Yilangu a fwabi yikonga?

⁹Di̱ne a mwal we yilang Musangu ko, “Bwadu tangka nanga mi̱nu sumbi̱ru we ki̱danguki̱ma nangangu.” N Kwama ki̱to ka tanti̱kaiya?

¹⁰N ki̱n a fwabu n ti chi̱ni ti̱nti̱na? Ki̱kumang ni̱bu a mwal di̱ne chi̱ni. Di̱ne a dakan nii ki̱su ti̱me n ti wu ki̱kade, ka chadu we nangang kuwangu.

¹¹Yo kwer nang fwa ya̱m bi̱li̱mu a le ni̱tu chinte, ka kaddu ki̱ni ki̱kwi ka ni̱n yiu chabti̱tu ka maka ni̱nu a bwite.

¹²Ka bi̱kam ni̱bu ki̱ni da ka madi ye, n ni̱n fal nang labu chi ki̱ni da wu nang mandi yikonga? Ki̱ni yiko, nang mabu nangangu ki̱ni wu da ko a mwintuwe ta ni ni̱n chi, ni̱n mu ni̱ru ki̱ni ka ti̱ti̱le chiye n ti ki̱ku nang bedu ki̱ni chi ka yo nangang Masiyangu ka ki̱ladi kutenge.

¹³Yoye ta yimbu tiko, ni̱bu ki̱ma nangang a kan Kwamani̱mu, nang fi ka chan chabtu chiya? Yinu bi̱bu ki̱ma nangang a se Kwamamu, nangti̱ fi n chi ki̱yaan ki̱ti̱me,

¹⁴We yiko, n Tewuduwe a ni da ko ni̱bu ki̱ma di̱mwar ya̱m bi̱li̱mi̱mu a chau we chi ni̱bu a mur di̱ne nangang Kwamange.

¹⁵Aya mang bunti̱bu wuka da we dati yiyu, ti̱nti̱ne mang mwalbu di̱ne ke ni̱bu a mami yiko, bunge bwa, mang babu wuka ni ka yodu ne mang ngau kwiye ki̱ni di̱mwar ya̱m bi̱li̱mi̱nu.

¹⁶A ne mang ngau kwiye we ti̱tu di̱ne mi̱n ma di̱mwar ya̱m bi̱li̱mi̱ne, aya a dakan mang ma nangangu. A noi ka n ko mi ne mang ma nangang Kwamange.

¹⁷Ka no n kur a ni̱r mi̱n mi mang ma nangang ki̱ke, a no a da ni̱bu ka feyu. Aya n Kwama a suti we ki̱ke ko a yo mi̱n ma nangangu.

¹⁸Yoye ki̱ti̱me mi wure ni? Ki̱ti̱me mi ka mang ma di̱mwar ya̱m bi̱li̱mi̱ne, m ma li̱mang. Mang mabu nangangu ki̱ni dami kwang we nangang di̱mwar ya̱m bi̱li̱mi̱nu.

¹⁹Kasi ki̱ku m mi̱n n ke ka̱be wuka niyangu, m mar dur mi̱nu ka̱be we ni̱bi kwang. M ma ying ke n wuwe ni̱bu, m be ki̱ni chi a di̱Yesuwe.

²⁰Yo m mi̱n n ti ni̱bu Yafudam, mi̱n mar yimiyu yinang Yafuda ke n wuwe chi nabwen. We bi̱bu ki̱yadu we yili̱n Musati̱mu, mi̱n ma ti̱ni yiko kasi ki̱ku mi̱n n newe wume yilangengu aya ke n wuwe chi bi̱bu ki̱yadu we wume yilangemu.

²¹We bi̱bu a yabu we wume yili̱nemu, n kau yinang chi ti̱n, ma mati̱bi yiko. Kasi ki̱ku n yim yilang Kwamangu we dur mi̱nangu, we mi̱n bunti̱ chi m Masiya a fwaatu ke n wuwe bi̱bu a bunti̱bu yili̱ni̱mu.

²²We bi̱bu keku bi̱yili̱mang chiyangu a ki̱tani̱mu, mi̱n ma ti̱nu yinangu m mi̱n we ti chiyang ke wuwe chi. M mi̱n yinang ki̱di̱ke we ti̱be kwa̱li ti̱te di̱ne ke n chi a ya yuku ka no we fwede.

²³Mi̱n ma di̱mwar di̱di kwang di̱ne ke ni̱bu nabwen a ke bi̱yili̱mu we ya̱m Masiyamu. Ke n yati̱ ki̱ti̱me delake we di swan kute.

²⁴Yoye ta kubu yo ni̱bu ki̱swa̱ka̱ bananiya? N kawure ki̱funti̱bwi ka su keko, nii wiin beka ya ki̱ti̱me werke. A le n kawure a nang wulu ke a be, a ya ki̱ti̱me werke.

²⁵Ni̱bu ti̱ka̱limu ki̱miyadu yinang. N chi ki̱madi ying ko ke chi ya ki̱ti̱me werke wu ka kaiyadu kayane, Aya n chi̱ni ni madu ke ni ya ki̱ti̱me werke wu a ne kaiyadu kaiyane.

²⁶Di̱ne yiko, banang mangu n ke ki̱kusan, di̱kulan mi̱nu n ke di̱kusi̱n.

²⁷Aya mi̱n ni bwi miyu riye yinang ka̱be ke a ma chi mi̱n badde, di̱ne ke ki̱la n fi̱tan a kuteng ki̱ku ni̱bu bi̱bu a swi a di̱ne di̱mwar mi̱ni̱mu.