Read tula 2 Koronti 11 Bible Online

2 Koronti 11 - tula bible

2 Koronti 11

¹N yo ni̱ru ta ma bwanu ki̱ni mi̱n di̱ne wuka yo mi̱n fwa ya̱mu yinangu m mi̱n di̱rang. Aya mi̱n wana chi̱nu ti̱ma bwanu ki̱ni mi̱n.

²Mi̱n mibadi bobu diti ki̱da̱ng we chi ki̱fwedu n ti chinitu, yinangu n Kwama ki̱mibadi bobu we chi ki̱fwedu n ti chi̱nangu. Yinang ni ki̱mibadi bobu we fwa̱nu ko ke a le lo kwarta ko ni̱bu a turbangu, n yo ni̱ru mi n ti̱ni kwang ta kau ni̱bu Masiya n ke bi̱u wuka niim.

³Aya mi̱n nwe tayi ke a kaduwe yinangu soo a butu Awawu ki̱ni fural ki̱ninu, ke a buti̱du chi̱n we a bunki̱ku bi̱yili̱mangu a di̱Masiya.

⁴Nangki̱n ta mwatanbuwe yo ni̱bu ki̱ be bwa di̱chi̱ne. Ti̱ke ki̱ni chii n chi a miyan a dur Yesunitu, kasi ki̱ku a lakan n ti chii nang ma di̱mwar ki̱nitangu. Ti̱ke ki̱ni Fi̱ki̱mu n chi a bwa̱u ko chii ni chini̱mu. Fi̱ki̱m bi̱bu n ke bi̱bu ta yiu a di̱Kwamamu. Ti̱ke ti̱ni ki̱ni ya̱m bi̱li̱m chimu, kasi ki̱ku a lakan n ti bi̱bu nang fwa chimi̱ni̱mu.

⁵Mi̱n kamadu, bi̱bu ti̱yalu tiko, “Fandubu bi̱duumi̱mu,” a layibu ki̱ni ti̱kan chi̱n.

⁶Ka mang kwala miyaku fwaku ya̱mange, aya mi̱ni ki̱ni yingki̱ku. Ni̱n yung chi̱n bi̱bu a wa̱riyu nabwen.

⁷M ma chimi̱n di̱mwar ya̱m bi̱li̱m Kwamami li̱mang. Mang nibu dur mi̱nu dwiyentu di̱ne ke ti̱ya ri̱kaku. Yoye n lelenga?

⁸N yiu we ka̱mbi̱ritu we bi̱kamu ni̱bu bunti̱ki̱m di̱ne nanga mangu a di̱chi̱nengu. Mang medu mang yidu mi n kwabbe we di̱chiye di̱ne ke n ma chimi̱n nangang.

⁹Yo no mi̱n we ti chi̱ne, n kwala ka̱mbi̱r, aya mang yibu chi̱n ya̱m. Kebu ni̱bu bunti̱ki̱mu a Makidoniyamu nang bi̱bu a be miye ki̱ni chi mi̱n badditi kwange. Mang yibu mi ti̱makai, ti̱nti̱ne, a ne mang yo chimi̱n ki̱dandaku, mang chakakku ki̱ni maku yikongu.

¹⁰Di̱ne bi̱yili̱m Masiyamu a di̱mi̱ne mu, nang chitu a yo mang fwa mi, we ti̱m Akayami kwang a ne ni wu ka kodu ko n du kukki̱ku durangu we.

¹¹Yo mi̱n fwadi ye a yung mang mi̱la chinba? N Kwama a yim ko mi̱n mi̱la chi̱nu.

¹²Mang chakakku ki̱ni ni̱ru mang bwa̱u mi a ne mang yiu ka̱mbi̱r makaki̱ chi̱nu, ke n yung Fandubu ti̱kwanim bi̱bu a ngadu kwiye we ko nangang chiyangu a fi̱rami̱n n ti ki̱nangu.

¹³Duum ni̱bu bi̱bi̱mu n ke fandubu bi̱yili̱m aya fandubu ti̱kwanim. N chi ki̱ma nangi̱n ti̱kwani, ki̱mar dutu chitu yinang fandubu Masiya.

¹⁴N ke chi ya̱r yii, kono nang Setan ki̱yung dur ki̱nu yinang naba di̱tumbi̱ri wu a yiike.

¹⁵Di̱ne yiko, a kabu chi ya̱r yii, ka ka̱bi kiyu ki̱yung dutu chitu yinang ni̱bu nangang ki̱yilange. Di̱ne we di swa̱n kutenge n chi ka ya ki̱ti̱me a fi̱ra mi̱n n ti nangi̱n chite.

¹⁶Mi̱n fwa ti̱nu ki̱da, wuka ni a ki̱ladu a kamaduwe ko m mi̱n di̱r. Aya ka ta kamadi yiko, ti̱ke ki̱ni mi̱n yinang di̱r. ke m mi̱n n yati̱ chi bayim wu mang ngan kwiyetu.

¹⁷Ngakku kwiyengu n ke chi Tewuduwe ki̱badde, aya mi̱n madu yinang di̱r.

¹⁸Aya yo bi̱kamu ki̱ngau kwiye ki̱ni kasan ti̱ti̱nitu, m mi̱n mang ma ti̱ni yiko.

¹⁹Ki̱la wureni? Mare n ti̱n bi̱bu ti̱kamadu ti ti̱kasan yinangi̱mu, ti̱si ki̱tele we ya̱m di̱ri̱mu!

²⁰Nangki̱n, yo ni̱bu a yo chi̱n a ka̱biye, mare ti̱mu ni̱ri chiku, ka a yitu chi we di̱chine, ka a nwe ta̱ma̱ng change, ka a yung chi̱n ko ki̱lwenge, ka a ngau chi̱n a kabbe.

²¹Mi̱n nwe dwbwi yinangu mang yidu mi n chi̱ni ni ki̱tanang we nangi̱n ti̱tangu. Aya ka wuka ni ki̱kukku dur ki̱nu a ti̱kan chiye, m mi̱n ti̱n mang mu ni̱ru mang madi yiko, we fi mi̱n fwa ya̱mu yinang di̱r.

²²Ka n chi Yafudawa, m mi̱ni yiko ti̱n. Ka n chi Yisrela, m mi̱ni yiko ti̱n. Ka n chi ki̱fi̱ku Yibrayim, m mi̱ni yiko ti̱n.

²³N chi ki̱ma Masiyami̱n nanganga? M mi̱n m Masiya. (We fi ya̱m mi̱mu yinang naba fangi̱miye.) We yiko n la chi ki̱ni funti̱ku bwiyangu yinang yinang, ni̱bu a kwai, ni̱bu a ngai nabwen, yotiyu nabwen mi̱n ya dur mi̱nu a fi a lwe mang bwaangde.

²⁴A ki̱switiyu dangtidangti Ki̱da yuunu, ni̱bu mwataki̱m ni̱bu Yafudamu a twalai ki̱ni kwa̱ntangu wan ti̱ta chiri turkubu.

²⁵Ki̱da yitta ni̱bu mwataki̱mu a Romamu a twalai. Ti̱nti̱ne ni̱bu a kwelai ki̱ni kaliyu ki̱da kiin, kwa̱mbi̱re mwe a wuren ki̱da yitta ki̱ni mi̱n we mure. Da kiin, n di kuko n ti kum ki̱sul sul sul we a mwe yinu ni̱bu a be chaki.

²⁶We ti̱bwalan mitu, n nwe riye nabwen we mweti layu n ti dabi̱kumu ki̱wur ni̱bi̱mu. N le riye we Fa̱li kuti chireyu n ti yikayu kuuti. N le riye we bi̱nti̱ ti̱duitu n ti beti̱ bi̱ntiyu, n le riye we lati yiduiyu n ti ni̱bu bunti̱ki̱m bi̱kwanimu.

²⁷N ya ti̱fumantu nabwen, n nwe riye, mang dabi̱ duum, a ne chabtu we, dimwen wetuwe. Datiyu nabwen yiyu mang kwala chabtiyu. N da a suyi, a ne luke mang buli̱n bwiye we.

²⁸A bwin ti̱tu mang kiyebitu, kanang wuwule diye ki̱da̱da̱ki̱ku ni̱bu bunti̱ki̱mangu n we dur mi̱nu.

²⁹Ka wuka ni a ki̱tane, ki̱madu yinangu m mi̱n mang ki̱tanang, ka wuka nii a ma ki̱le, ti̱tu ki̱yodu mi̱n ma ki̱fwini.

³⁰Ka a kau mang ngau kwiye, mang ngaddu ki̱ni chitu a yung ki̱taku mangitu.

³¹N Kwama a yim mang mwebu ti̱kwani. N Kwama n ti Te chire, Tewuduwe Yesu Masiya, dela ki̱ku a swe ware n ti ki̱n ki̱diya kwadu.

³²Ki̱dangu m mi̱n a no Dimaskuwangu, kwabna wu a wume Mai Areta a yo ni̱bu ko a to kwa̱tu Dimasku ko ke a tai.

³³Aya fati̱bi̱ mi̱mu a yoi a ki̱ti̱ng, a mariye ki̱n a bwang ya kwale bi̱ne, nang tiyangu mang swimi̱n we fa̱li kiyangu.