Read tula 2 Koronti 2 Bible Online

2 Koronti 2 - tula bible

2 Koronti 2

¹Di̱ne yiko, n ko we ni̱r mi̱nu mi ne mang ki̱la bwa di̱ chi̱ne, di̱ne ke n yo chimi̱nu wuka kaiyan ni̱re we.

²Ki̱kumang ka n yo chimi̱n kaiyan ni̱renge, n wure ka li̱ma ni̱r mi̱nu? N ti̱n bi̱bu mang yo chimi̱n kaiyan ni̱remu nangti̱ bi̱bu ta li̱ma ni̱r mi̱ni̱mu.

³Nang chi a yo mang mwal chimi̱ne lwangi̱n di̱du mang swan mi̱ni̱ne. Mang babu be mang ya chi̱nu n ti̱n bi̱bu ti̱li̱mai ni̱ri̱mu ki̱ni ki̱swi wu ka kai mi ni̱re. Di̱ne n yim ka mi̱n ma ti̱mi̱lane ta mi̱ladu.

⁴N mwal chimi̱n yinangu ta kiyangu, di̱ne m mi̱n m ma furi ki̱liki̱lin ki̱ni nwe riye wuduwe ki̱ni ti̱mweni. Mang fwabu di̱ne ke n yo chimi̱n kaiyang ni̱re aya ke ti̱yim tiko m mi̱la chi̱n.

⁵Ka ni a ma ki̱le, a kaibu kana mi̱n mi̱nbi̱ ni̱ru, aya ni̱bu bunti̱ki̱mi kwang. Mang fwabi̱ bi̱bu ke n kuka chimi̱n ki̱rang.

⁶Ti̱welantu a ya ki̱n di̱ne ni̱bu nabwenitu a wura ki̱mi̱n.

⁷Ki̱ka̱ngu, ti̱du ki̱mi̱n, ti̱kum ki̱mi̱n ni̱ru, ti̱dudu ki̱n we yinangu kaiyan ni̱re ka be ki̱mi̱nedu ki̱ni yarengu.

⁸Di̱ne yiko, mi̱n wanna chi̱nu, ti̱yo ki̱n a swaan ko ti̱mi̱la ki̱ni chikku.

⁹M mwal chimi̱n lwangi̱n di̱du ke n da̱ng tiku changu n ti tiyangu ta ma nangangu ki̱ni ya̱m mi̱mangu.

¹⁰Kanang wuwule wu ta du ki̱mi̱n ki̱leti kiye, m mi̱n n du ki̱mi̱n ti̱n. Chi a yo mang du ki̱mi̱ne, di̱ne a kakku Yesu Masiya.

¹¹Di̱ne ke n Setan a yadu wa̱rewe wu ka butu niye, di̱ne ni yim ki̱fi̱lti kiyi kwang.

¹²Yo mang be Toruwa di̱ne ke n fwa ya̱m bi̱li̱m Yesu Masiya, n Tewuduwe a ni da wu mang ma mi̱n nangange.

¹³Aya ni̱r mi̱ni a muten di̱ne mang yabu ke fate nangan mi n Titus we fiko. Di̱ne yiko, n ma siramu we fiko n suti̱ Makidoniya.

¹⁴Aya di̱wan a di̱Kwama, n ki̱n wu ki̱maka ni kwadu, ni chau ki̱la we di̱n Masiyane, ki̱ma nangangu ki̱ni chi̱ni, ni ma di̱mwar yingku Masiya nu ka bwa̱le di̱du ni̱bu ki̱nwedu yinang ki̱nung ki̱ki fi̱rfi̱range.

¹⁵Di̱ne n chi̱ni yinang ki̱nung ki̱ki fi̱rfi̱ra̱ng ki̱ku n Masiya a ni Kwama, ki̱ku a ti̱ran we bi̱bu ki̱ya yuki̱mu n ti̱n bi̱bu a wa̱re twiyakemu.

¹⁶We bi̱bu a wa̱re twiyakemu, fi̱rfi̱re wu yinang wu a bwange, wu ki̱bedu ki̱ni bwange: Aya we bi̱bu ki̱ya yuki̱mu, fi̱rfi̱re wu ti̱kuri, wu ki̱bedu ki̱ni ti̱kuriye. A neni a lwe ka da̱u tureng nangang ki̱ke we.

¹⁷N chi̱ni bi̱bu a newe yinang bi̱kamu ki̱ma di̱mwaru ke chi ya ri̱keku. Aya yo kwer Kwama a tume niye, ni̱n fwa ya̱mu ki̱ni bi̱yili̱m we kakku kangu, di̱ne n chi̱ni ni̱bu nangang Yesu Masiya.