Read tula 2 Koronti 3 Bible Online

2 Koronti 3 - tula bible

2 Koronti 3

¹Yoye ni mwe na ni wer dutu chireta? Ka ni bau bi̱kam ni̱bi ka mwal lwangi̱n werki̱n we di̱chniya?

²N ti̱n nang lwangi̱nu n ni̱nni ki̱ni̱nu, di̱du ni̱bu a mwal a ni̱tu ni̱nni̱mu, ke n kawure a ku a ki ti̱n.

³N Ti̱n ti̱yung dur chi̱nu tiko n ti̱n lwangi̱n Masiya we nangi̱n chi̱ntu. Ni̱bu a mwalbi chi mwalki aya ki̱ni Fi̱ki̱m Kwamam wukure. A mwalbu a wule kwame aya a ni̱tu ni̱bi.

⁴Ni̱n fwa ying di̱ne ni̱n yo ni̱ru we Kwama a di̱n Yesu Masiya.

⁵N ke ko a ne nang medu nang ma chiti wauwadu ki̱diya kwaditu n ni̱n ni̱fwane. Dukan ni̱nu n ti chakku ki̱langu ki̱bedu a di̱Kwama.

⁶N ki̱n Nang wu a yo niyang me niyang ti we bwa̱ki̱ ki̱fwiyange. Wu a bunti̱bu a yilangu ni̱bu a mwalange, aya a bunti̱n Fi̱ki̱m Kwamame, yilang ki̱mwali̱langu nang chi a be ki̱ni bwa aya Fi̱ki̱mu ki̱bedu ki̱ni ti̱kuri.

⁷Ni̱bu a mwal Miyaku Musagu a wule kwame, dwiyen Kwamatu a fwe we fiko we yoko a yaki̱ nide, kasi ki̱ku wa̱liwa̱liye a ka̱be Musa a tibu kengu, a yii yinangu a yo ni̱bu Yisrelamu a mebu a da̱ngbu nukongu. Ka yilangu ki̱bedu ki̱ni bwangu a kau ki̱ni di̱kwan n ti dwiyene,

⁸yinu nabwe dwiyene wu a Fi̱ki̱m Kwamame ka kadi yire?

⁹Ka chi ki̱yo bwatu a be ki̱ni ri̱kakiye, a mwintuwe ti̱tuki̱bedu ki̱ni yile Kwamatu ka su ti̱tu kutan.

¹⁰Bi̱yili̱m, ri̱kaku a bwa̱ki̱ ki̱ka̱ra̱ngu a dwiyen we ki̱ka̱ngu, ka ni swe ki̱n n ti bwa̱ki̱ ki̱fwiyange.

¹¹Yinu ka ti̱tu ki̱sudusuduwetu ki̱ni dwiyene, ka kadi yire n ti ti̱tu ki̱diya kwaditu.

¹²Di̱ne n ni̱n ki̱ni duum yo ni̱rem bi̱be, nang chi a yo nang ya dukane.

¹³N Ni̱n newe yinang Musa, wu a yinge kabu ko ki̱ni kwa̱du, ko ke ni̱bu Yisrelamu a kudu dwiyen ti̱tu ka riduriyetu we.

¹⁴Aya ni̱tu ni̱bitu we ki̱ngki̱ng, di̱ne lanta di ti̱kan chi we wu ki̱dang chi swaanku bi̱yili̱mange, yo ni̱bu ki̱ki bwa̱ki̱ ki̱ka̱ra̱ng si̱re we lanta ki̱ka̱ng ni̱bu a chaki̱bu, ni̱bu a yimbu chaki̱du ka n ke bunti̱ki̱ Masiyange.

¹⁵A lanta dii, ka ni̱bu ki̱ki taki̱da Musa, ki̱madu yinangu ti̱kan chi a yinge kabi̱ni chiyang.

¹⁶Aya yo ni a be bwa Tewuduwe, ti̱dui ti̱tu ki̱wora ti̱nu.

¹⁷N Tewuduwe ki̱ma nangangu we ni̱tu chi̱retu ki̱ni dukan Fi̱ki̱mi̱n, fi Fi̱ki̱m Tewuduwe wemi̱ne, nang fi da wemi̱ne.

¹⁸N chi̱ni bi̱bu kabi̱ni chireyu a yingebiyu, ki̱yiye wu a dwiyen Tewuduwe yinang mwe ni da̱ngi̱n ka̱be, ti̱nti̱ne ki̱sute nidu ni kadu yinang ki̱n. Suteki̱ku ni̱bu ma ni mi̱nangu ki̱rike ri̱kaki̱ku a chire a bwa di̱Tewuduwe, wu n ki̱n Fi̱ki̱me.