Read tula 2 Koronti 4 Bible Online

2 Koronti 4 - tula bible

2 Koronti 4

¹Di̱ne yiko, yo Kwama we li̱me a ni chi̱ni nangang ki̱ku ni madangu, a dakabu ni ka̱ta̱du.

²A ne lwangang nang we ki̱ni muli̱nu n ti ti̱lairi chitu n ti ti̱bwitan ti̱kusitu. A ne lwangang nang we ki̱ni ti̱kwanitu n ti ti̱kwanitu ni madu ki̱ni ya̱m Kwamamitu. Ni̱n fwa bi̱yili̱mi kwa̱kwa̱ri, nang tiyangu kanang wuwule niye ka ma di̱mwar bi̱yili̱mi̱nu we kakku Kwamangu we ni̱tu chitu.

³Ka ya̱m bi̱li̱mu ni̱n mwadi̱mu ni̱bu a swaanbe, kwalan swaanke wu ki̱bedu a bi̱bu a yimbu Kwamamu.

⁴N Setan Mai wu a ti̱ti̱niye, a di̱ngi̱l ni̱tu ni̱bu bi̱bu a kebu bi̱yili̱mi̱mu. A yo ni̱tu chitu a kubu ki̱yiiye dwiyen ya̱m bi̱li̱m bi̱bu ki̱yii chidi̱mu. N chi a swaanbu ya̱m bi̱li̱mu ni̱n fwadu a dwiyen Masiyamu, wu n ki̱n nang chirkaku Kwamange.

⁵Ni̱n mwa ya̱m Yesu Masiya n ke bi̱ni̱m. N ki̱n nang Tewuduwe chire kwang. N ni̱n yinang ka̱bi we di̱Yesuwe,

⁶Di̱ne n Kwama wu a yiko, “Ki̱yiiye a chire we ki̱liye,” a yo ki̱yiiye ko ki̱yiidu we ni̱tu chi̱rete, ke nui ni̱biyu a wuden we di̱Yesuwe ni ku dwiyen Kwamatu we kabu Yesu Masiya.

⁷N chi̱ni ki̱ni kuli ti̱tu a beti̱siyu ni̱bu a mubbi swani. Ni kabbi yiko ke a yung n Kwama n ki̱kun ki̱ni dukani sini̱nu, n ke chi̱ni.

⁸Kasi ki̱ku ni nwe riye we kasi no ki̱ki̱le ba̱la̱ngengu, a ya a chabu ki̱la we di̱chi̱niye. We yiko kangu ki̱dang ki̱yo nimi̱n kamaku aya yo ni̱re we.

⁹Ni̱bu ki̱ni ni̱n riye, aya ki̱ni yiko n Kwama a dunibu. Wuka yo ni̱n ni bobu, aya ki̱ni yiko a chibu nii.

¹⁰Kanang wuwule diye, n chi̱ni a yii bwa, yinangu ni̱bu a ma ki̱ni Yesuwangu, ke ni̱bu a ku da Yesuwe we bwi chireyu.

¹¹Diti chireyi kwang we ti̱ti̱nitu, ni yadu a fa̱li bwai di̱ne ni bunti̱ Yesuwe, ke ni̱bu a ku da Yesu we bwi chireyu ki̱ bwadu bwayu.

¹²Nang chi a yo nang wulbi̱ bwa, ke n ti̱n ti̱ya ti̱kuritu.

¹³Ya̱m Kwamam bi̱mwali̱mu a yi ko, “N fwa di̱ne mang ke bi̱yili̱me.” Keku bi̱yili̱mang chirengu ka ki̱kinang, ni̱n fwa yam Masiyamu di̱ne nang ke bi̱yili̱me.

¹⁴Di̱ne ni̱n yim ko n Kwama wu a kuku Tewuduwe fure, ka kukuti̱ ni̱nu ware n ti Yesu, yinu ka yika kakku Kwamang ki̱ni ni̱n n ti chi̱n.

¹⁵Ti̱tu kwang ke a maka chi̱n, ke li̱me Kwama ki̱lam ni̱bu nabwene, a yo chimi̱n ni̱r di̱wani̱n yinang nebwi ke n Kwama a ya ri̱kaku.

¹⁶Di̱ne yiko ni̱n yo ni̱ri chikku, kasi ki̱ku bwiti chireyu ki̱kaiyadangu, aya Fi̱ki̱m chi̱remu ki̱ya fwiri ka nang wuwule diye.

¹⁷Di̱ne yiko be riye wu ni nwede, a ne da̱u ki̱swi, ka yo nidu a delaku ki̱duwangu nabwen ki̱ku a su ki̱nati̱ng.

¹⁸Di̱ne nang mabu nangangu ki̱ni riye wu nuyu ki̱kude aya kana chi nuyu a kubitu, di̱ne chi nuyu ki̱kudu ki̱ka̱ngitu ka suredu. Aya ti̱tu niyang kubitu, ki̱diya kwadu.