Read tula 2 Koronti 5 Bible Online

2 Koronti 5 - tula bible

2 Koronti 5

¹Aya ni yim ka di̱kur chi̱renu a ti̱ti̱ni̱nu a wurene, ka nang chikiye bwi yiyu ni sweendiyu, n Kwama n ki̱fwan ka do ni mi̱n lo ki̱diya kwade a bwadi. Wu lo n ke wu ni a mubbe, ti̱nti̱ne a ne kaiyadu kayane.

²Ki̱ka̱ngu, ni ma ki̱fwilti, di̱ne ni ke a no yadu ni le lo wu.

³Aya ka Kwama a sute bwi chireye, a ne ni ki̱ladu ni katti̱nuwe twatwadu.

⁴Aya ki̱ka̱ngu n chi̱ni we bwi yiyangu, a kau nangang ni kwa kana tu wa riye, aya ti̱tu ki̱fwedu n ke di̱ne ni baddu ni bwadu ke ni kaddu we ti̱ti̱nitu, aya ni baddu a yinge ni ki̱ni bwi yifwiyu, ke yika̱riyu a laimi̱n.

⁵N Kwama ki̱fwan a do ka sute bwiyu, yinu ka ni chi̱ni Fi̱ki̱m ki̱mu ke a yo ni yim chi ka ma ni mi̱nu we bwa kaketu.

⁶Nang chi a yo ka nang wuwule diye yo ni̱re we, kasi ki̱ku niyang yim ko ka n chi̱ni we ki̱ni bwi ti̱ti̱niye, fiswe chire a ma kutan n ti lo wu Tewuduwe wemi̱ne.

⁷Nangki̱n, ni̱n ma da wu a yo ni̱re, n ke chi ni kudi.

⁸Ki̱kumang ni̱n yo ni̱ru we lo bwadiye, a la ni̱mi̱n chi nang chiru we bwi ti̱ti̱niyu, nang swedu n ti Tewuduwe.

⁹Ni̱n baddu a la chi n ki̱n a nwe ta̱ma̱ng chirengu, ka n chi̱ni we ti̱ti̱nite ka a bwadiye.

¹⁰A kabi ki̱ng ni ngabadu we kakku Masiyangu, di̱ne kabaki̱ke. Di̱ne n kawure ka yiu ki̱ti̱me nangangu n ki̱n a ma a ti̱ti̱niyangu, ka ti̱yiliye, ka ti̱bwilaye.

¹¹Di̱ne niyang tu niyang yim chi ni yalu ko tayi Tewuduwe, ni̱n funti̱bwi ni̱n yal ni̱bu a ya bwa di̱Kwama. N Kwama a yim yinangu n chi̱ni we mi̱nangu, ti̱nti̱ne mi̱n kamadu ti̱yim ka n ni̱n n bi̱wure.

¹²N ke di̱ne ni̱n baddu nang ri̱ka yiniye, kwako! Aya ni̱n funti̱ bwi nang yung chi turre wu ka yodu ta nwe ta̱ma̱ng nange. Ti̱nti̱ne ke ti̱yim ti̱ya di̱ki̱li̱n yiinu we bi̱bu ki̱ ri̱ka yichiyu we ti̱ti dwa̱ndwa̱n a nuyi chitu n ti ki̱ku ka bunti̱ chi a ni̱ritu.

¹³Ki̱kuuli ki̱ma ni̱n na? Yinangu bi̱kamu ki̱fwadangu? Kasi no m ma ki̱kuuliyu ni̱n madu ke ni̱n ri̱ka di̱n Kwaman. Aya ka n ke ki̱kuuliye, ni̱n madu di̱ne chi̱ne.

¹⁴Chitu ni̱n maditi kwang n ke di̱ne ta̱ma̱ng nang, aya mi̱laku Masiyangu a ti nimi̱n kakku. Yo nang ke bi̱yili̱mu ko Masiya a bwa di̱ne ni̱bi kwange, ni̱bi kwang a bwa ware n ti ki̱n ti̱n.

¹⁵N ki̱n a bwa di̱ne ni̱bi kwang, di̱ne ke bi̱bu ki̱ni ti̱kuri ti̱fwimu, a madu fiswe wu da bwiye we bwa kakke, aya a ma fiswe di̱ne wu a bwa di̱ne chiye, ti̱nti̱ne wu a kun we furu di̱ne chiye.

¹⁶Di̱ne yiko, bwa kakke a ne da̱ngku niyang we ki̱ni ki̱swi ni̱bu ki̱da̱ngi̱n niye we yinang wa ti̱ti̱niye. Di̱ne kasi ki̱ku m Masiya a ya da̱ngki̱ ki̱ka̱ngu, ki̱ka̱ngu ya̱mu a ri a ne nang wi ti̱nuwe.

¹⁷Di̱ne yiko, ka nii a kau wu Masiya, n ki̱n a kau wu fwiye ni, da bwiye a suu, ka ti̱ti̱le chiye a kau ti̱fwi.

¹⁸Chi ti̱fwi ti̱ti kwang ki̱bedu a Kwama, wu a do tibe ko n ti chi̱ni a di̱Masiya, n ki̱n a ni chi̱ni nangang ki̱ku a doku ni̱bang n ti Kwama.

¹⁹Ya̱mu nang bi̱bu. N Kwama ki̱doka ni̱bi kwang a di̱Masiya. A kibu ko wuka a no ma ki̱le. N Kwama a du nimi̱n di̱si̱n di̱du a dokaku ni̱bangu n ti ki̱nangu.

²⁰Di̱ne yiko, n chi̱ni Bi̱yori̱m Yesu Masiya, a tiwe yinangu n Kwama n ki̱fwan ki̱fwa ya̱mu a di̱chi̱niye. Ni̱n wana chi̱nu we di̱n Masiyanu, ti̱do bwi n ti Kwama ti̱kau fati̱bu ki̱m n ke bi̱bu ki̱kwila chi n ti ki̱ni̱m.

²¹N Masiya a manbi̱ ki̱le we, aya di̱ne chiniye n Kwama a mar ki̱n yinang naba ki̱le. We yiko, ke ni kau ni̱bu yilem we di̱Kwama a di̱Masiya.