Read tula 2 Koronti 6 Bible Online

2 Koronti 6 - tula bible

2 Koronti 6

¹We nanga chirengu n ti Kwamangu, ni̱n wana chi̱nu n ti̱n bi̱bu ta ya li̱me Kwamamu, ti̱yo a kadu chi ti̱kusi we

²Ti̱nwe chitu n Kwama a fwaatu, “Yo ki̱swi mang yungi̱n chi̱n li̱me a lame, n nwe chi̱n. Yo di yuke lame n maka chi̱n.” Ti̱nwe! Wu nang ki̱swi ta yin li̱me Kwama di wu nang di wu ta yaan yuke.

³Nang babu wuka ni ka ya ni̱nu ki̱ni ki̱le we nangangu. Di̱ne yiko nang yo wuka mi̱nbu chi yarki we wa̱re.

⁴We yiko, chi ni̱n maditi kwang, ni̱n madu di̱ne ke ni̱n yung ko, n ni̱n ni̱bu nangang Kwamang. Ni̱n madu yiko ki̱ni runni, n ti riye n ti nwe riye nabwen n ti ti̱kumeni.

⁵Ni̱bu a ngau ni̱n, a di̱ki̱ ni̱n ti̱n a di̱bi̱nti̱le, ni̱bu a nwe ni̱mi̱n burang di̱ne kulangkulange a kunne, ni̱n ma nangangu a la dukan ni̱nangu, nang dabu duum a bwin kwalan chabte.

⁶Di̱ne ni̱tu ni̱ntu wa̱la̱k n ti swaanki̱ n ti bwanu n ti ki̱li̱mang nangu, ni̱n yungdu ko ni̱n ma Kwama mi̱n nanga ki̱ku a Fi̱ki̱m Kwamam, ki̱ni mi̱laku ki̱yilang.

⁷We di̱mwar di̱yili̱nu, n ti di̱kan Kwamanu. Yile ni̱n wu a kau yinang kusa n ti kul, nang tau a kan ki̱yilang ka a kantakwelange ni̱n soon yichireyu.

⁸Ni̱bu ki̱dela ni̱nu, ki̱turati̱n ni̱nnu, ki̱ni ni̱n dibwi, ki̱wana ni̱nnu. Ni̱n kau yinang ni̱bu ki̱mwe ti̱kwanim, kasi ki̱ku ni̱n fwa bi̱yili̱mangu.

⁹Ki̱madu yinangu ni̱bu a yim ni̱bang, aya a yin ni̱n yinang. Yinangu n ni̱n a fa̱li bwayang, aya n ni̱nni ki̱ni ti̱kuri. Ni̱n ya ti̱welantu, aya ni̱bu a chi̱n ni̱nbu.

¹⁰We kayan ni̱re, aya ni̱n ma ti̱mi̱lan we kwalantu ni̱n yo ni̱bu nabwen a ya kuli yinangu ni̱n ne chi we, aya ni̱n ki̱ni chiti kwang.

¹¹Ni̱bu Korontom, ni̱n fwa chimi̱n bi̱yili̱mu, nang laibu chi̱n chi, ti̱nti̱ne ni̱n yung chi̱n, ni̱n mi̱la chi̱nu yinang.

¹²We yiko, n ni̱n n ke bi̱bu nang ko chini̱mu, n ti̱n ta yibu ni̱n bi̱bu we ni̱tu chi̱ntu.

¹³Mi̱n fwa yam bi̱bu n ti chi̱n yinangu Te ki̱fwa ya̱m n ti bwesi̱m ki̱mang, n ti̱n fal ti̱yungti̱ ni̱n mi̱laki̱ changu.

¹⁴Ti̱chaki̱n yichiyu we ni̱bu bi̱bu a kebu bi̱yili̱m we Tewuduwe mu. Ke nii wu yile a me a swe li̱mangu n ti ni wu bwila? Ki̱liye ka swedu n ti yiiki̱ku yire?

¹⁵M Masiya ki̱ma fati̱n n ti Setana? Wureni ka kunka naba bunti̱ke n ti naba ki̱liye?

¹⁶Wureni ka yodu se Kwama n ti wu a di̱yore ka li̱made? N chi̱ni se Kwama wu kure yinangu n Kwama a fwa ko, “Mang swedu n ti ni̱bu mi̱mu, mang bwa̱lu we tibe chi, Mang kau Kwama chi, n chi ka kau ni̱bi mi̱m.”

¹⁷Di̱ne yiko, n Tewuduwe a fwa ko, “Ti̱chir mi̱ne we di̱ chiye, ti̱twaiyu chitu ka bwita chinitu we. Wu nang ki̱swi mang keendu ki̱ni chi̱ne.

¹⁸Mang kau Te chi̱n, n ti̱n ta kau bwesi̱m mi̱m bi̱bari̱m n ti bi̱wuti̱m.” N Tewuduwe naba dukane kwang a fwa.