Read tula 2 Koronti 7 Bible Online

2 Koronti 7 - tula bible

2 Koronti 7

¹Fati̱bi̱ mi̱m, yo niyang ya bwa̱ki̱ku nang ki̱kiye, ni chaku yichireyu we ti̱bwitantu n ti chi ki̱kai ni̱tu ka bwi chireyetu. Ni funti̱bwi ni bau kasi siiku Kwama, di̱ne n chi̱ni ni nwe tayi Kwamaye.

²Ti̱yung ni̱n mi̱laki̱ changu. Di̱ne nang mabu wuka nii mi̱nbi̱ ki̱le, nang kaiti̱bu wuka nii, nang sul ti̱bu wuka ni.

³Mang yo chimi̱nbi ki̱le yinangu mang fwa yangu, yinangu mang wi mang fwa chimi̱nangu, a ne chi ka yarka chi̱nu n ti mi̱laki̱ nange we, ka a bwange ka ti̱kuriye.

⁴N ke ki̱ni chi̱n yinang. Mi̱n ngatti̱ kwiye ki̱ni chi̱n, ti̱ru mi̱nu, mi̱n ma furi mwen, ki̱ni riye ni̱n nwede kwang.

⁵Kasi no nang ki̱dangu nang be Makidoniya, nang yabi̱ fi̱kaku. Kasi no ni̱n ya bwa̱le ka ti̱kwa̱ma̱n, ti̱kwa̱ma̱ntu wetuwe fi̱langu, we mure ni̱re tayu a ri bwiyu.

⁶Aya n Kwama wu ki̱ru ni̱tu bi̱bu a yobu ni̱ri̱mu, a ru ni̱n we beki̱ Titusangu.

⁷Nang mabu furi mwenu di̱ne kana beki̱ kangu, aya ya̱m bi̱bu a fwa ni mi̱ni̱mu a yo ke ni ya kunkaku changu. A fwa ni̱mi̱n yinangu ti̱bau numi yinangu, n ti kaiyan ni̱re ta ma di̱ne chi a fwe n ti mi̱ne, n ti yinangu ta funti̱bwi ta ti mituwe ki̱ri̱ngu, ti̱tu a yo n nwe ta̱ma̱ng yinang.

⁸Kasi no lwangi̱n mi̱nu a yo chi̱ni kaiyan ni̱ri, a buibu ni̱r. A no n kai ni̱r yo ferediye di̱ne mang ku lwangi̱nu a kai chimi̱n ni̱re, kasi ki̱ku a baki̱ swi bayim a newe nabwenangu.

⁹We yiko yinangu chitu ki̱yadangu, ni̱r mi̱ni mwe. Kasi ki̱ku mang nwebu ta̱ma̱ng yinangu mang kai chimi̱n ni̱rangu, aya kaiyan ni̱re chi̱n a yo suteku ni̱rang di̱ne ta wo ki̱ti̱me. Kaiyan ni̱re chi̱n a letuwe ki̱ke Kwama, di̱ne a yo chi wo ki̱ti̱m, nang ma chimi̱nbu ki̱le we chi nang ma chimi̱nitu.

¹⁰Nangki̱n, kaiyan ni̱re wu a be a dukan Kwamane, ka yo ni̱bu ka wo ki̱ti̱m, ka ki̱la bwa di̱Kwama, we yiko n ka, ka ya yuku. Ti̱nti̱ne a ne no ka no n yimme we. Aya kaiyan ni̱re wu ni a ki̱ bedi ki̱ne ki̱yo ni a bwa.

¹¹Ti̱da̱ng chi kaiyan ni̱re wu Kwama yo ni̱tu chi̱ntu a be chimi̱ne ki̱nitu. A yo ti̱bau nangangu, ti̱keti̱ ki̱taku changu. A yo ti̱ma ki̱fwini, ti̱nwe tayi. A ni chi̱n yo ni̱re, ti̱funti̱ bwi. A yo ti̱swe ki̱ni doku bwiyang, ti̱ke ta ku ti̱welan ti̱tu a dakani. We ti̱tu fal, ti̱funti̱ bwi we wa̱riyi kwang ta kebu ta ma ki̱le.

¹²Ki̱dangu mang mwale lwangi̱n di̱dangu, m ma di̱ne nii wu a ma ki̱le, ka nii wu ni̱bu a ma ki̱mi̱n ki̱lenge. N ti ki̱ki yikongu n mwal chimi̱n di̱ne ke n fwa chimi̱n mi n Kwama a yim ko ti̱mi̱la ni̱n yinang yinang.

¹³Nang chi a yo ni̱tu ni̱ntu a kummi buke. A bwin ni̱tu ni̱ntu a kummitu, lanta di ni̱n ma furi mwen di̱ne furi mwenu n Titus kikundi̱nu, di̱ne n ti̱ni ki̱ni kwang ti̱maka ki̱n a ya kunki̱ ni̱rang ki̱ku.

¹⁴Aya kasi no n fwa ki̱mi̱n mi mi̱n ngau kwiye ki̱ni chi̱n, n ke chi dibwi. We yiko yinangu chi nang fwa chimi̱ne kwang ka bi̱yili̱mangu, we yiko ti̱n ngakku kwiye nangu ki̱ni chi̱n a kau bi̱yili̱m we kabu Tituse.

¹⁵Mi̱laki̱ku n Titus ki̱ma chimi̱ndangu, ki̱chakakku yinang ka a kur kwa̱mbi̱r chi̱nangu, n ti nabwe dwiyene ta ni ki̱n we ki̱dangu ta yiu ki̱nangu.

¹⁶Mi̱n ma furi mwenu ki̱ka̱ngu di̱ne n yo ni̱r we di̱chine yinang.