Read tula 2 Koronti 8 Bible Online

2 Koronti 8 - tula bible

2 Koronti 8

¹Kebu mi̱m, ki̱ka̱ngu ni̱n baddu ta yim li̱me Kwama a ma ni̱bu Makidoniyamu mi̱ne.

²Nangki̱n n chi a nwe riye yinang, we riye n chi a ya dur chi̱nu we, di̱ne furi mwen chi̱nu, n chi a ma li̱me wu a makaki̱ ni̱bange, kasi ki̱ku bunitu a la dukan chi̱nangu.

³N ke bi̱yili̱mu mi n chi a ma makaki̱ku yinang a suti̱ ki̱nati̱n. N chi a ma makaki̱ku ki̱ni ni̱ri diin, a ne nii ni̱bu a yo ko a mawe.

⁴N chi a wana ni̱n ko ni̱n ni chi da chi kau ni̱bu makaki̱m, di̱ne ke n chi a ya da chi letuwe ni̱bu ki̱maka ni̱bu bi̱suti̱ri̱m a bale ni̱bu Yafudamu.

⁵Chi n chi a niye, a la chi nang kuranitu. N chi a mwe a ni Tewuduwe dutu chitu, yinu a mati̱n we di̱ni̱nne yiko, yinangu Kwama ki̱ badangu.

⁶Yo chiti ye, ni̱n wana Titus ko a chakakku ki̱ni nanga murku kuli̱n niki̱nu yo n ki̱n nang ni a mwenge.

⁷Nangki̱n ti̱tu ti̱chakakku we chitu ti̱maditu, ka a keku bi̱yili̱mange, ka a fwaku ya̱ma̱nge, ka a yingku bi̱yili̱mange, ka a nangange, n ti yinangu ti̱mi̱la ni̱nangu. Di̱ne yiko ti̱chakakku ki̱n li̱me wu nike we nangan Kwamangu.

⁸Mang yibu mi a mwintuwe ta madu, aya n yung chi̱n ka yungku chitu bi̱kamu a maatu. Ti̱tu ki̱medu ki̱swe mi̱laku changu we di̱ ni̱nne.

⁹Nangki̱n, ti̱yim li̱me Tewuduwe Yesu Masiya. Kasi ki̱ku a ri ki̱ni chitangu, n ki̱n a kau di̱lusan di̱ne chi̱ne ke ti̱ya kulitu we kakku Kwamangu.

¹⁰Mang su chimi̱n furi ying: Ka la chi ta swan chi ta mwe a swa̱ru a sunu, n ti̱n nang bi̱kaki̱mu ta ni mu, yinu ti̱baddu ta ma ti̱n ni ki̱ku ki̱da. Aya di̱ne n ti̱ni ki̱ni ti̱kuran ta made.

¹¹Aya mi̱n fwa chimi̱n, ti̱ swan nanga ki̱ku ki̱ni ni̱ru ta mwe mi̱ni̱nu, ti̱ma chi a ne la dukan chi̱ne

¹²Ka n ti̱n ki̱ni ni̱r niki̱ne, n Kwama ka nwe ta̱ma̱ng niku ki̱ku, ka nang chikiye, ka ti̱ni yinangu dukan chi̱nu we mi̱nange, n Kwama a ne kedu ta ma chi a la dukan chi̱ne.

¹³N ke ko mi̱n baddu mang ni bi̱kamu chiti bubbuki, yinu bi̱kamu ti̱tu ki̱ni riyeiye.

¹⁴Aya di̱ne ke ni keran nangi̱ntu a fiwiine yinang ka dakanang, ti̱maka chi ki̱ka̱ngu yo n ti̱n ki̱ni wa̱re makake. N ti̱n we ki̱dangu ta newe ki̱ni chabtangu yinu n chi ki̱nangu, n chi ti̱n ka ma makaku. N nang ki̱swi chitu ka yaandu yinange.

¹⁵Yinangu bi̱mwali̱li̱mu ya̱m Kwamamu a fwangu, “Wu a mur nabwene, a swetuwe dukan di̱ki̱nu, wu a muri bayi̱me, a swetuwe yikiyu ti̱n.”

¹⁶Ni̱n wana Kwama di̱ne n Titus a ke ka maka chi̱nu yinangu mang kengu.

¹⁷N ki̱n a keti̱bi̱ we ying ko ka ya bwa di̱chine yinangu nang wana ki̱n ko a yangu, aya n ki̱n ka yadu yinangu a tu a bwa̱u ni̱ru ko ka yadangu.

¹⁸Da̱ng, ni̱n tum chimi̱ne ke chirewu ware n ti ki̱n, wu di̱n ki̱nu a ti̱ran we ni̱bu we di̱mwar ya̱m bi̱li̱mi̱nu we kambi Kwamati kwang.

¹⁹A bwin yiko, ni̱bu bunti̱ki̱mu a sutu ki̱n ko a kau wu ka ni̱n bungadu n ti ni̱n di̱ne nangang li̱meng ki̱ku ni̱n madu ke ni ri̱ka Tewuduwe, di̱ne ke ni̱n yung ko ni̱nni ki̱ni ni̱r makaki̱n.

²⁰Ni̱n baddu nang ma chitu a ne ni ka tu niine we ki̱swi ni̱n mang ki̱li̱mang ki̱ku ki̱ni ni̱ri dinange.

²¹Chi a ni̱r ni̱nne no ni̱n baddu nang ma chi a dakani. Aya a newe kakku Tewuduwe n ki̱kun, n ti kakku ni̱bangi kwang.

²²Ni̱n tume ke ni̱n ware n ti chi, wu ki̱dati kwang nang swe chimi̱ne, nang yung chi̱n yinangu a ni ni̱ru we nangangu dangtidangti. Aya ki̱ka̱ngu a ke ki̱ni chi̱nangu, a ke ka maka chi̱nu yinang.

²³Ti̱kur tiko, n Titus fate ke nanga, m mi̱n ti ki̱n ni̱n ma nangangu di̱ne chi̱ne. Bi̱kamu fandubu bi̱bu n chi waremu, nang bi̱bu ni̱bu a tume mu. Nangang chiyangu ki̱bedu ki̱ni ri̱kaku we di̱Masiya.

²⁴Ti̱yung ni̱bu bi̱bu duum mi̱laki̱mu ti̱yung chimu. Ki̱tuu ni̱bu bunti̱ki̱me a tume chi, ka nwe chi we di̱tumbi̱ritu, ti̱tu ka yung chidu, ka ri̱ka nangang ki̱yilangu.