Read tula 2 Koronti 9 Bible Online

2 Koronti 9 - tula bible

2 Koronti 9

¹A Kabi ki̱ng mang mwal chimi̱n lwangi̱n we ya̱m makaku ni̱bu bunti̱ki̱mangi̱mu a ti̱m Yafuda.

²Di̱ne n yim ti̱yo ni̱r makaki̱n, nang chi a yo mi̱n ngau kwiye ki̱ni chi̱n we ni̱bu Makadoniya, mi̱n yi chidu mi n ti̱n ni̱bu Akayamu ti̱do bwi we swa̱ru a sunu. Duum yo ni̱remu n ti̱ni ki̱ni̱mu, a yo n chi a kun a titiye.

³Ki̱kangu, mi̱n tum kebu bi̱bu di̱ne ke ki̱la ngaddu kwiye wu kuse we dur chi̱nu. Aya ti̱swe ki̱ni doku bwiyang, kangu no mang fa mi ta madangu.

⁴Di̱ne ka n be ki̱ni bi̱kam ni̱bu bunti̱ki̱m we Makadoniya, mang kebu be mang yadu ta dobu bwi chiyu. Ka a fwe yiko, ka kau chi dibwi di̱ne nabwe ngakku kwiyengu mang ma a dur chi̱nangu, kasi ki̱ku n ke ka mi̱n n ti chi̱ni kwangangu.

⁵Di̱ne yiko, n ku a la chi, mang wana kebu bi̱bu ka bedu ka tu mi̱nu, ke a mur kuli̱nitu ta bwa̱u ta niditu, ke a be a ya di̱mbi̱li̱m. Ti̱tu ka yungdu ti̱ma ki̱li̱mang ki̱ni ki̱ke chi̱n, ni̱bu a yobu chi̱n yo.

⁶Ti̱tabi̱duwe, nii wu a fi dum chami bayi̱me, ka kau ti̱ni bayim, ni wu a fi dumu nabwen ne, ka yati̱ delaku di̱kabanu nabwe.

⁷Ka wuwule niye, a ni chitu n ki̱ni ki̱n a ni̱ritu, a newe ki̱ni kaiyan ni̱re ka ni kwa̱su nii wu kwa̱se. Di̱ne n Kwama ki̱mi̱la nii ki̱ma niku ki̱ni ni̱ri di̱ne.

⁸N Kwama ka medu ka yo delaki̱ku a su ki̱nati̱ngang, di̱ne ke kasi no fere ti̱kwaladu ti̱kan chi we. Ka medu ka lati̱ fiko, ke ti̱ma nangang li̱mengu.

⁹Yinangu bi̱mwali̱li̱mu ya̱m Kwamam a fwangu, “N Kwama ki̱fwal ti̱lusanitu mi̱nedi kuuu yinangu n ki̱n a ku diyang. Yile ko a swe ki̱diya kwadu a ne ridu riye.”

¹⁰N Kwama ki̱ni wu ki̱fi chiye duum fi̱ki̱mu, ki̱niti̱ chabti̱tu. Di̱ne yiko n Kwama ka ni chi̱n dumu ke ti̱fi, n ki̱n nang wu ka du dumu ka dwiye ti̱ne, nang ki̱swi niku changu ki̱ku a ni̱ri dinangu ka su chimi̱n li̱me delake.

¹¹Kasi no fere ka yo chimi̱n delaku we ka ti̱ti̱le chiye, di̱ne ke ti̱nang ma ni ki̱ku ki̱ni ni̱ri diin ka nang wuwule diye. Nang ki̱swi ni̱bu nabwen ka wana Kwama di̱ne nabwe ki̱li̱mange yata tun chimi̱nangu a fa̱la̱ng nangangu.

¹²Di̱ne nangang ki̱yilang ki̱ku ti̱madangu a titi̱buwe kana ni̱bu bunti̱ki̱m, ti̱nti̱ne ki̱bedu ki̱ni ti̱kwa̱li ti̱tu a wanaku Kwamatu nabwen.

¹³N Kwama ki̱ya delaku we nabwe niku changu, ni̱bu ka dela Kwama di̱ne ti̱bunti̱ ya̱m bi̱li̱m Masiyamu, ti̱nti̱ne di̱ne nabwe makake ti̱ma ni̱bu mi̱nu n ti kanang wuwule niye.

¹⁴N chi ka twa̱ba̱ chimi̱n buni fal, ka ni̱n kuru ki̱ni chi̱n we ni̱ttu chi̱ntu di̱ne li̱me wu a su ki̱nati̱n n Kwama a maatu.

¹⁵Ni wana Kwama di̱ne ki̱li̱mang ki̱ku a ma ni mi̱nangu, ki̱li̱mang ki̱ku a su ki̱nati̱ngang.