Read tula Ka̱la̱tiyam 3 Bible Online

Ka̱la̱tiyam 3 - tula bible

Ka̱la̱tiyam 3

¹N ti̱n ni̱bu bunti̱ki̱m a Ka̱latiyam, wule yo ti̱madu yinangu ta kubu diyange? Ta kurbu yinangu mang fwa chimi̱ni tas mi n Yesu Masiya a bwa di̱ne chi̱n a ki̱tiyang bwanga?

²Mi̱n baddu mang ma chimi̱n di̱bi̱di̱di diin, ti̱yiu Fi̱ki̱m Kwamamu di̱ne ti̱bunti̱ yili̱na, ka di̱ne ta nwe ya̱m bi̱yili̱mu ta ke ki̱ni ma?

³N ti̱n di̱bba? Ti̱mweti̱ chiti ram ki̱ni fi̱ki̱m yinangu a dakanang, ki̱la ki̱ka̱ngu da bwiye a ti kakku, ti̱ma nangang bwiyang.

⁴Da̱ng nabwe riye ta nwe we nangang ya̱m bi̱li̱mi̱me? Yoye ka kau ti̱kusiya?

⁵Yoye n Kwama a ni chi̱n Fi̱ki̱m ki̱mu, a ma nangi̱n chi ka̱ta̱kitu we tibe chi̱n di̱ne ti̱bunti̱ yili̱na? Ka di̱ne ta ke bi̱yili̱mu we chi ta nwenga?

⁶A wa̱re wiine, n Yibrayim a ke bi̱yili̱mu we di̱Kwama, n Kwama a yiu ki̱n a mar ki̱n naba yile

⁷Di̱ne yiko a dakan ta swaanu tiko, bwesi̱m Yibrayim i siini̱mu n nang bi̱bu a bunti̱ki̱n we keku bi̱yili̱mangu a di̱Kwamamu.

⁸Ya̱m Kwamam bi̱mwali̱li̱mu a fwako, wuka kuu bi̱bu n ke ni̱bu Yafudame ka medu ka ya yile we kakku Kwamangu di̱ne keku bi̱yili̱m chiyangu. N Kwama a fwa Yibrayim mi̱n ya̱m bi̱li̱m bi̱bu feredi yoko yiko, “Kutiyi kwang ka ya delaku a di̱mune.”[3]

⁹Yibrayim a ke bi̱yili̱m a di̱Kwama a yati̱ delaki̱ku. We yiko, ni wu a ke bi̱yili̱m a di̱Kwama, ka yati̱ delaku yinang Yibrayim.

¹⁰Nangki̱n, ni̱bu bi̱bu ki̱kuradu ko Kwama ka yiu chidu di̱ne n chi ki̱bunti̱ miyaku yili̱n Musayimu, n chi ka kaiyadu ki̱ni yiko. Di̱ne ya̱m Kwamamu a fwa ko, “Kanang wuwule niye wu a bunti̱bu chi yilangu a fwange, ka bwila ki̱mi̱nu.”

¹¹Ya̱m bi̱bu yi kwa̱rikwa̱ri, a ne ni ka kau naba yile we kakku Kwamangu di̱ne ki̱bunti̱ yili̱ne, di̱ne ya̱m Kwamamu a mwal ko, “N Kwama ki̱yiu ni̱bu yilemu di̱ne keku bi̱yili̱mang chiyangu.”

¹²Wu wa̱re keku bi̱yili̱mange a lakan n ti wu a yili̱n Musante. Yinangu ya̱m Kwamam bi̱mwali̱li̱mu a fwangu ko, “Nii ka tum chitu kwang we chi yilangu a fwaate, nang chi ka yuti̱ ki̱ne.”

¹³Aya n Yesu a tu ni we bwila wu a bunti̱ki̱ yili̱nange. Yo ni̱bu a kuka ki̱n a ki̱tiyang bwange, n ki̱n a da̱u bwila a no ya nidu di̱ne ki̱letiye a dur ki̱n. Di̱ne a mwal ko, “Kanang wuwule niye wu ni̱bu a kukan a ki̱tiyange, a yung a bwila ni wuko mi̱n.”[4]

¹⁴Yo n Yesu a tu niye, delaki̱ku a ma Yibrayim mi̱nangu a ma bi̱bu n ke kuu ni̱bu Yafudamu mi̱n ti̱n, ke a yo chi mi̱n delaku a di̱n Yesu Masiyan. We yiko ti̱nti̱n, ni ya Fi̱ki̱m Kwamam di̱ne keku bi̱yili̱mang.

¹⁵Kebu mi̱m, mang swe chimi̱nu ki̱ni chi we da chire kwade. Ka ni̱bu a ma bwa̱ki̱ a kekan a di̱ka fa̱liyu we chi yaka made, wuka ni a ne kwiradu, a ne ni ka sute chiye we.

¹⁶N Kwama a bwa̱u n ti Yibrayim n ti wuka nii we ki̱kuwang kangu, [5] a dakabu ni da̱du ko ki̱fwadu n ti ni̱bu, n ki̱n ki̱fwadu n ti Nii wiin, Nii wuko n nang Yesu Masiya.

¹⁷Chi mi̱n fwaditu nang ti̱tu: Bwa̱ki̱ku n Kwama a bwa̱u n ti Yibrayimangu a ne kwiradu we swa̱ti̱tu 430 yo Kwama a ni Musa yili̱nte. Ti̱tu ka yungdu n Kwama ki̱kwira bwa̱ki̱mangu.

¹⁸Nangki̱n ka delaku Kwamangu ki̱bunti̱nu a yilange, a no neka bunti̱ni a bwa̱ke. N Kwama a ni Yibrayim delaki̱ku di̱ne bwa̱ki̱ku n Kwama a mangu.

¹⁹Ka yiko, wureni a yo n Kwama a ni yilange? N Kwama a ma yiko ko ke ki̱yung ni̱bu ki̱letiyu ditiyu ki̱da̱ng. Ti̱chitu wu a fwe ko ke a lami̱nti̱ ki̱dangu bukebu ki̱kuti̱ri̱be wu ni̱bu a bwa̱u ya̱m a dur ki̱ne ka bedangu. N Kwama a tume ni̱bu ti̱tumbi̱ri ki̱mu ki̱ni yilangu ko a ya ni Musa n ki̱n wu a le tibe Kwama n ti ni̱be.

²⁰Ka ni̱bi burau a kekan a ya̱me, a dakan kano fware we. Aya n Kwama wu n ki̱kune, a mabu nanganu ki̱ni fware yo a bwa̱u n ti Yibrayime.

²¹Yoye ti̱tu ki̱yungdu yilangu ki̱katadu n ti bwa̱ki̱ Kwamanga? Ko bayim! Ka no kaang yilang ka ni chi̱ni ti̱kuriye, a no n Kwama ka yiu chi̱ni di̱ne bunti̱ki̱ yilang kangu.

²²Aya ya̱m Kwamamu a fwa ko, “Ti̱ti̱nitu kwang ni kau ka̱bi we ki̱letiyu, di̱ne ke bwa̱ki̱ Kwamangu a kau di̱ne ka nang wuwule niye, wu ki̱ni keku bi̱yili̱mang a di̱n Yesu Masiyange.”

²³Yo no ya̱m keku bi̱yili̱mu a tibu bede, a no yilangu a tal ni yinang ni̱bu a le di̱bi̱nti̱li̱m. A no a ne da niin chire we ka n ke wa̱re keku bi̱yili̱mang a di̱n Yesunu a be chire.

²⁴We wuka ki̱swi, yilangu a maka ni a lami̱nti̱ yo n Yesu a be ti̱ti̱nite. A to niye a lami̱nti̱ ki̱dangu niyang ya yile di̱ne keku bi̱yili̱mang a di̱n Yesun Masiya, ni kau ni̱bu yilem we kakku Kwamangu.

²⁵Aya we ki̱ka̱ngu keku bi̱yili̱mangu a ya fiswengu, niyang babu yilangu a no ki̱ma makakangu.

²⁶Ki̱ka̱ngu di̱ne keku bi̱yili̱mangu n chi̱ni kwang kana bwesi̱m Kwamam.

²⁷Aya yoko ni a ma batisma, a kau tiyangu ni a le Masiyangu, kanang chikiye, yinangu ni a yau luke wufwiyeng.

²⁸Di̱ne yiko, ki̱ka̱ngu a ne ti̱kan chi we ko, naba ni̱bu Yafudame ka naba Yelena, bwe ka ka̱be, kwarta ka naye, n ti̱ni ki̱ni kwang ti̱kabbi wiin a di̱Yesu Masiya.

²⁹Ka a kabi ying n ti̱n m bi̱u Masiya, a yung n ti̱n ki̱kuwang Yibrayim, ta chau kula wu n kwama bwa̱be.