Read tula Ka̱la̱tiyam 4 Bible Online

Ka̱la̱tiyam 4 - tula bible

Ka̱la̱tiyam 4

¹Ka bwe wu ka chau kula we yo n ki̱n we bwe ti̱re, n ki̱n n ti ka̱be a fi wiine, kasi ki̱ku kuli̱n tewuduwe kwanginu di̱ki̱nengu.

²N chi kani̱n bunti̱ tebu bi̱robi̱ chimu n ti wakili a tau chimu ka lami̱nti̱ ki̱swi te a yi ko n chi a lwe ni̱be.

³A fiwiine n ti chi̱ni, yo n Yesu a no tibu bede, n chi̱ni a no yinang bwesi̱m, dati ti̱ti̱niyu a no kwaba chi̱ni ni kau yinang ka̱bi.

⁴Aya yo ki̱swi siine a lame, n Kwama a tume wuko Bwe, fwan a bi̱u yinangu ni̱bu ki̱bi̱u bwesi̱mangu. N ki̱n a dwiyen we daati ni̱bu Yafudamu a bunti̱ yili̱n chitu.

⁵N Kwama a tum ki̱ne ko ke a bau chi̱nimi̱n da, n chi̱ni bi̱bu a no niyang le ka̱bi a yili̱n ni̱bu Yafudamu, ko ke ni kau kasi bwesi̱m Kwamami bi̱yili̱m.

⁶Di̱ne n chi̱ni bwesi̱m ki̱me, n Kwama a tume Fi̱ki̱m Bwekomu we ni̱tu chi̱retu, bi̱bu ki̱yalu ko, “Tete, temi.”

⁷Di̱ne yiko, n ti̱n n ke ka̱bi, aya n mun bwe, n Kwama yo m mun bweko, n Ki̱n ka ni chi̱n chi n ki̱n a yo bwesi̱m ki̱m mi̱ne.

⁸Yo ferediye a no ta yimbu Kwama, a no n ti̱n ka̱bi kwamati yiyu a dakabu ta siidi.

⁹Aya ki̱ka̱ngu ta yim Kwamangu, a mayire ti̱badu ta ki̱la ti̱nu we siiku ti̱yobitu n ti ki̱fi̱btiyu a ne ka maka chiniye? Yoye ta ki̱lati̱ kabi ti̱tu a dati chiyu wenga?

¹⁰Da̱ng yinangu ti̱funti̱bwi ti̱ma yeni ni̱bu Yafudamu, ka nang wuwule wandi n ti swang n ti swa̱re ti ke n Kwama a nwe ta̱ma̱ng changu.

¹¹Mi̱n ka̱ta̱ chi ti̱maditu. Ki̱yungdu nangi̱n mitu mang ma a di̱chi̱netu a kau ti̱kusi.

¹²Mi̱n wana chi̱nu kebu mi̱m ti̱chaku yichiyu we yilangu yinangu mang chaku yimiyangu. Ta ma mibu wuka ki̱le.

¹³Ki̱kumang ta kuru tiko ki̱dangu mang nwebu ta̱ma̱ngangu, nang ki̱dangu mang ya ki̱swi ya mang ma chimi̱ne di̱mwarangu.

¹⁴Kasi ki̱ku burang mangu, a bu chi̱n ni̱rangu, ta kobu mi̱n di̱ne bura mange, ti̱tai kani yurabu. Ti̱yiu mi̱n yinang naba di̱tumbi̱re Kwama a lakabu n ti yinangu ta yiu Yesu Masiyangu.

¹⁵A no ti̱ri ki̱ni ti̱mi̱lan ki̱dang kangu, a bwa̱le ti̱mi̱lan ti̱kitu. Mi̱n fwa bi̱yili̱m a no ne chi neta madu ke ti̱makaye we, kono nui chi no ta chaki̱du ta niyu ka ka kadi yiko.

¹⁶Ki̱ka̱ngu n kau chimi̱n fakware, di̱ne mang tau mi̱n fwa chimi̱n bi̱yili̱ma?

¹⁷Ni̱bu yungku ti̱kwanim bi̱bu ki̱baddu ta kau bi̱chimi̱mu, a mabu di̱ne ke ti̱ya li̱mang, n chi ki̱funti̱ bwi ka kera chi̱nu n ti mi̱n ko ke ti̱kau bi̱chiim.

¹⁸Kanang wuwule ni ta bunti̱de, a no dakan chi we ti̱tu a yo ti̱bunti̱ ki̱nitu, ti̱nang madi yiko kwadu n ke ka yo m mi̱n we n ti chi̱ne.

¹⁹N ti̱n bwesi̱m mi̱m, mi̱n nwedi bud we ni̱r mi̱nu yinang yo lur ki̱bu naye yaka bi̱dde, burang ki̱ku ka lami̱nti̱ yo n Yesu Masiya ka swe mati̱ntu we bwi chiye.

²⁰Ka no ka kadi yiko, no n ke manodu n ti chi̱n, ke n fwa chimi̱n ti̱kwa̱li yii mitu yinangu ta swanangu. Di̱ne mi̱n ka̱ta̱ nangi̱n chi̱ntu.

²¹Ti̱nwei n ti̱n bi̱bu ti̱badu ta bunti̱ yili̱ni̱mu, ti̱yim chi yilangu ki̱fwadita?

²²Ya̱m Kwamamu a fwa ko, “M Yibrayim ki̱ni bwesi̱mi burau. Wuka n wu ka̱be naye ko, wuka n wu neloko.”

²³Ka̱be naye Yibrayime a bi̱u bwe a wa̱re da bwiye, aya neloko, a bi̱u a wa̱re wu n Kwama a bwa̱umi̱n n ti ki̱ne.

²⁴Nati̱m bi̱bu ki̱ni burako, a kau wa̱re wu a bwa̱ki̱ Kwamangu a ri mi̱ne. N Aka̱r ka̱be naye a ti we Kun Sinayine fi ni̱bu a mwe a kau ka̱biye we yilange.

²⁵Ki̱ka̱ngu n Aka̱r a tiwe Kun Sinayine di̱du a ti̱m Wurchalimamu a Larabawam, n ki̱n n ti bwesi̱m ki̱mu a kau ka̱bi.

²⁶Aya n Saratu neloko a ti we Wurchalima wu a diye, we bwako n ki̱n nang ne chire.

²⁷Ti̱tu nang chi fa̱ku Yichaya a fwa ko, “Ma ti̱mi̱lan m mun naye wu a ne bwe we, ki̱kangu ta ngau yalte wa ti̱mi̱lane, m mun wu mwang bi̱nbuwenge, ki̱kangu mwang ma ti̱mi̱lan. Di̱ne bwesi̱m naye wu kwarta a du ki̱ne a ma ki̱mi̱n nabwen a la bwesi̱m naye wu ki̱ni kwartamu.”

²⁸Ki̱ka̱ngu kebu, ni kau yinang bwesi̱m Kwamam we bwa̱ki̱ku yinang Yichaku.

²⁹We ki̱dang ki̱ku, n chi bi̱bu ni ma nangangu ki̱ni Fi̱ki̱m Kwamamu, ni nwe riye a fa̱li bi̱bu ki̱baddu ni bunti̱ yili̱ni̱mu yinangu n Yichaku bwe ni̱bu a bwa̱u ya̱me, a nwe riye we Yismel bwe ka̱be naye.

³⁰Aya ya̱m Kwamamu a fwa ko, “Ti̱chaku ka̱be naye n ti bwe ko, di̱ne bwe ka̱be naye a ne chau kula n ti bwe neelo.”

³¹Di̱ne yiko kebi̱mi̱m, kwartabu n ti nati̱bu, n chi̱ni n ke bwesi̱m ka̱be nayemu aya n chi̱ni bwesi̱m ne lo, bi̱bu n Kwama a yiu di̱ne keku bi̱yili̱mang.