Read tula Ka̱la̱tiyam 6 Bible Online

Ka̱la̱tiyam 6 - tula bible

Ka̱la̱tiyam 6

¹Kebi̱mi̱m, ka ni ya nii ki̱ma ki̱lege, n ti̱n bi̱bu ki̱ni fi̱ki̱m Kwamamu, ti̱marti̱ nii wu we wa̱re. Ti̱ma dandan ke ki̱la yo ti̱funti̱ bwi ti ta ki̱ladu ki̱ni nii a wa̱re, di̱ne ke ti yaruwe sweki̱ku.

²Ti̱yita riye we bwiti chiyu. Ka ti̱madi yiko, ti̱bunti̱ yilang Masiyangu.

³Ka wuka nii ki̱kamadu n ki̱n ki̱la chiye, n ki̱n n ke ti̱kan chi, ki̱ma ka ti̱kusi.

⁴N kawure a swe nangang kangu didiin a da̱ng, ka a lenge, yinu n ki̱n ka medu ka wer yikiyu we chi n ki̱n a ma ki̱fwane, a swedu yikiyu we n ti wuka ni.

⁵Nangki̱n, n kawure ki̱li̱ngta ti̱ki chi.

⁶Kanang wuwule niye wu a ya miyaku ya̱m Kwamame, a maka ni̱bu yungku chimu, a kera kasi no ti̱ti̱le chi ti̱tu a leletu ware.

⁷Ti̱buti̱du yichiyu we, di̱ne a ne ni ka ful Kwama we. Kanang wuwule bwila ni a tume, ka ya ki̱ti̱me bwila ko we di swa̱n kute.

⁸Wu a fi dum bi̱bu a da bwiye, ka yati̱ ki̱ti̱me da bwiye. Ti̱tu ka yo ki̱nu a bwa. Aya ka ni a tum chitu a Fi̱ki̱m Kwamamite, ka ya ti̱kuri ki̱diya kwadi.

⁹Di̱ne yiko, ni twidu bwi we nangang ki̱yilangu. Ka niyang twibu bwiye, ki̱swi ki̱bedu wu ni ya ki̱ti̱me wuyile wu a nangang ki̱ke.

¹⁰Di̱ne yiko, nabwe ki̱swi mwang yange, ni maka ni̱bu, ni ni dukanu a ni̱bu bunti̱ki̱ Masiya a la chi.

¹¹Ti̱da̱ng we duum ti̱mwalani̱mu mang mwal ki̱ni fa̱la̱ng mangu n ti ki̱kuti yiduiyu mang ma nanga ki̱niyu.

¹²Ni̱bu bi̱bu ki̱baddu ta bilaari̱nmu, n chi ki̱baddu ni̱bu ka kudu ko n chi ti̱kan chi. N chi ki̱madi ying di̱ne ki̱wul riye n chi ka nwedu di̱ne ya̱m ki̱tiyang bwang Masiyange.

¹³Kasi no nang bi̱bu a bi̱laari̱mu, a tumbu yilangu. Aya n chi ki̱baddu ni̱bu ka bi chimi̱n laaru ko ke chiyang kukku durang ko ti̱ma nangangu ki̱ni ya̱m chimu.

¹⁴Aya m mi̱n a ne mang kukku duru ko bayim. Ka a mwintuwe mang madi yiko, mang madu di̱ne ya̱m ki̱tiyang bwang Tewuduwe Yesu Masiya. Nangki̱n, a di̱ne bwako a ki̱tiyang bwange, da ti̱ti̱niye a bwa we bwimi, n min ti̱n n bwatuwe da ti̱ti̱niye, m mi̱n we da ti̱ti̱niye n kau wu a bwa.

¹⁵Biku laarangu n ti kwalan biki̱ laarange n ke ti̱kan chi, chi a la chiye, ni a sute yayu wu da bwiye, a ya yayu wu fwiye.

¹⁶Li̱mangu n ti ki̱bune Kwama a swe ware n ti ni̱bu ki̱bunti̱ yilang ki̱fwiyangi̱mu, ka nang chikiye, ni̱bu Yisrela bi̱bi siini̱mu.

¹⁷Mang swan ya̱mi ying. Wuka ni a Kwa̱mai ti̱nuwe ki̱da, di̱ne kono nang di̱mwal bumbitu a bwiminu, a yung m min naba ka̱be Yesuwe.

¹⁸Yam li̱me Tewuduwe Yesu Masiya a swe ware n ti chi̱n kebu mi̱m. Amin.