Read tula Afisam 2 Bible Online

Afisam 2 - tula bible

Afisam 2

¹We di̱chine, n ti̱n a no yinang bi̱bwari̱m di̱ne ta bunti̱bu Kwama ti̱ma ki̱leti.

²A no ti̱bunti̱ da bwiye wu a ki̱letiye, a lakanbu n ti bi̱kamu ni̱bu we ti̱ti̱nitu bi̱bu ki̱bunti̱ Setan wu n ki̱n nang tikake yo ni̱bu bi̱bwilamu a ki̱liye we ti̱ti̱ni ti̱tu niyang kubitu. N ki̱n nang ki̱fi̱bti ki̱ma nangang a bwiti ni̱bu bi̱bu a bunti̱bu Kwamamu.

³N chi̱ni ki̱ni kwang a no da chire yiko, ni tau dutu chi̱reti chiku we ki̱letiyu niyang kunni ki̱niyu. Diti ki̱dang ni ma ki̱letiyu a no ni madiyu yinangu ni̱r chi̱renu ki̱ badangu. We kunku chirengu a da bwiyengu n chi̱ni yinang ka wure, n Kwama ki̱ni ki̱fwini chire.

⁴Aya di̱ne n Kwama a ri bwiyu ki̱ni ki̱bune, a mi̱lani nabwe nabwen.

⁵Kasi ki̱ku n chi̱ni a no yinang bi̱bwari̱m we ki̱letiyu di̱ne niyang ko Kwamangu. A ye ni, ni kau bi̱kuri̱m di̱ne kunku Masiya Yesuwangu we furu. N Kwama a yuni ki̱ni li̱meko.

⁶N Kwama a kukki̱ ni ware n ti Yesu, yinu we ti̱ti̱ni bwaditu a yo ni swedu ware n ti ki̱n a di̱n Yesun.

⁷N Kwama a ma yiko ko ke bwa kake ki̱yung nabwe li̱me ko a la ka nang ti̱ti̱le chiye. N ki̱n a yung dwiyen li̱me kotu we ki̱swi n ki̱n a makan chi̱ni, a kwarka ni n ti Yesu Masiya.

⁸N chi̱ni ni ya yuku di̱ne li̱me Kwama we bi̱bu a ke bi̱yili̱mu, ti̱tu li̱mang Kwamang, n ke di̱ne funti̱ku bwiyang niyang.

⁹Yuki̱ku a bunti̱bu a nangi̱n ti̱yili ti̱tu ni ki̱madi, di̱ne yiko ni a ngadu kwiye we.

¹⁰N Kwama nang wu a yo niyang kau chi niyang kabite, n Kwama a yo ni kau ni̱bu bi̱fwim di̱ne niyang kwarkan n ti Yesu we keku bi̱yili̱mang chi̱renge, ti̱tu nang chi n ki̱n a do nimi̱ne.

¹¹Ti̱tabi̱duwe tiko yo ferediye a no ta kunkabu n ti ni̱bu Yafudam. N chi a no ki̱yal chi̱nu ko kuu ni̱be bi̱bu a bibu laari̱m, ki̱kukku dutu chitu ko n chi, aya n chi ki̱bi ka chumbi̱r a nurabu mure ni̱ritu.

¹²We ki̱dang kangu a no ta kunkabu n ti Masiya. Ni̱bu a no kiti̱bu chi̱n we ni̱bu Kwamamu ka nang chikiye Yisrela. A no ta yinti̱bu ya̱mu Kwama a ma bwa̱ki̱ n ti chimu. Ti̱ma fi swe chi̱n we ti̱ti̱ni ti̱tu a ne chi yo ni̱ritu we, a ma chimi̱nti̱bu yinangu n ti̱ni ki̱ni Kwamang.

¹³Aya n ti̱n bi̱bu a no ta ma kutan n ti Kwamamu, ti̱kau ni̱bu Yesu Masiya ki̱ka̱ngu, ki̱tuum Masiyamu a ki̱bbe chi̱n ki̱dwan n ti ki̱n.

¹⁴M Masiya nang wu a yo li̱mang ki̱ku niyang kabi wiinangu we tibe yikayu kuuti n ti ni̱bu Yafudam. N ki̱n a be tung ya kwale a no yo yaram we tibe ni̱be.

¹⁵We a bwa ko, a da̱u yili̱ntu n ti ya̱miyu a no yo yaram we yikayu kuuti n ti ni̱bu Yafudam. N ki̱n a sute ni̱bu we ka nang ki̱ki̱le ba̱la̱nge we ni̱bu Yafudam n ti yikayu kuuti a yo chi a kau kal di̱fwin bi̱bu ki̱yalu a di̱n ki̱ni̱m.

¹⁶We bwako m Masiya a kwarka kuuti yiyu a kabbi wiin. Ti̱tu a chaku yaramu a no a tibe chire n ti Kwamamu.

¹⁷N ti̱n bi̱bu a no ta ma kutani̱mu, n ki̱n a be chimi̱ne ki̱ni ya̱m bi̱li̱m bi̱bu a yo li̱mang changu n ti ni̱bu Yafudam a no ta kwakabu ware.

¹⁸Ki̱ka̱ngu n chi̱ni ki̱ni kwang, ni̱bu Yafudam n ti yikayu kuuti ni medu ni ya bwa di̱Kwama ki̱ni Fi̱ki̱m Kwamam bi̱biini̱m di̱ne chi n Yesu a ma nimi̱nitu.

¹⁹Di̱ne yiko, yikayu kuuti ki̱ka̱ngu n ke ni̱bu kuum ka rungko. N ti̱n ka ni̱bu lom n ti ni̱bu ni̱ri diini̱m Kwamam. N ti̱n ka bi̱bu a di̱kur lon Kwamam.

²⁰Di̱ne yiko, yikayu kuuti n ti̱n n ke ni̱bu kuum n ti rungko, ti̱kau kuu wiin ware n ti bi̱kamu ni̱bu Kwamam bi̱bu tamme chire wiin wu a fandubu n ti Fa̱kube. Aya Yesu Masiya nang kale wuduwe a tau tamme.

²¹N ki̱n a mur chi̱ni bi̱bu niyang ke bi̱yili̱mi̱mu a fi wiine yinangu kale tamme wuduwe ki̱yiu tureng kanangu, ni kau kan Kwaman, ka nang chikiye fi dwiyen Tewuduwe mi̱ne.

²²Di̱ne niyang kabi wiin we di̱Masiya, m Masiya a yo chi̱ni a fi wiine n ti bi̱kamu ni̱bu Kwamam ki̱ni dukan Fi̱ki̱m Kwamam.