Read tula Afisam 4 Bible Online

Afisam 4 - tula bible

Afisam 4

¹Di̱ne yiko, m mi̱n wu mang le di̱bi̱nti̱lu di̱ne bunti̱ki̱ Tewuduwe, mi̱n wana chi̱nu, ti̱ma fiswe wu a daka naba bunti̱ke, di̱ne n Kwama a yal chi̱ne.

²Kanang wuwule diye, ti̱kau ni̱bu ki̱ni ni̱ri bubbuki̱m, bi̱bu a kukkubi̱ dutu chiiti̱mu. N kawure a ma fatemi̱n bwanu, kasi no ni̱r fatenu a lebu ti̱kekan di̱ne mi̱lake.

³Ti̱funti̱ bwi ti̱kabbi wiin we kunkaki̱ku yo Fi̱ki̱m Kwamamu a yo ta kabbi wiine, ti̱bwa̱u yichiyu a fiwiine ti̱naang ma fiswe li̱mange.

⁴N chi̱ni ki̱ni kwang ni kau kwa̱li diin yinang bwi wiin, ki̱ni Fi̱ki̱m bi̱biini̱m. Yinangu a sutu chi̱ni ki̱ni kwangangu, ni yo ni̱ru ni chau ta̱ma̱ng di̱yal ki̱nu.

⁵Tewuduwe wiin, keku bi̱yili̱mangi kiin, yinu batisma chire wiin ti̱n.

⁶Ti̱nti̱ne Kwama wiin, n nang Te ki̱ni kwang, wu ki̱ma mati̱n chi̱reti kwange, nang wu ki̱ma nangangu we bwi chireyu n ti bwiti chireyi kwang.

⁷Aya n ki̱n a ni ka nang wuwule chire wuko yili̱n ki̱ti̱me, ki̱ti̱me wu n Masiya ki̱nidu yinangu n ki̱n a ku a daangu.

⁸Nang chi a yo ya̱m Kwamamu a fwa ko, “Yo n ki̱n a yika kutane, a yikan ki̱ni ki̱tu ka̱biye nabwen, yinu a nika ni̱bu ki̱mu ki̱ti̱nti.”

⁹Ya̱m Kwamam bi̱bu a fwa ko, “A fi̱l diim bi̱bu” ki̱yung wureni? Ti̱tu ki̱yungdu m Masiya a bete ti̱ti̱ni ti̱tu a ne dwiyen wetu.

¹⁰N ki̱n wu a suwe ti̱ti̱ni ti̱te, nang wu wiine wu kutan bwana fi̱le a sutu ti̱kantu ti̱ti̱ni dii kwange, ko ke ki̱yung dwiyen kitu we tanti̱lange ti̱ti̱niye kwang.

¹¹N ki̱n nang wu a nika ni̱bu bunti̱ki̱mu ki̱ti̱ntiye. Kanang chikiye, fandubi̱bu, n ti Fa̱kubu Kwamamu, n ti ni̱bu mwaramu, n ti fansetiyu n ti ni̱bu yungki̱mu.

¹²Nangang kawurengu n nang chi ka do ni̱bu bunti̱ki̱mu ke a ma nangang Kwamangu, ke bi̱bu ki̱bunti̱n Masiya Yesunmu, a dwiyen we fi̱ki̱mu.

¹³A mwintuwe kunkaki̱ ki̱ku ka chakakku we keku bi̱yili̱mang chirengu n ti yingku Bwe Kwamangu yinu ni kau bi̱bu ki̱ni ki̱kwim, ni dwiyedu we Tewuduwe. Yinu ni kadu yinang Masiya we yile.

¹⁴N chi̱ni neni ki̱ladu ni kaddi bubbuku we fi̱ki̱mu yinang bwesi̱mu a ruburubem, bi̱bu ki̱sute keku bi̱yili̱mang chiyangu yinang yayu ki̱fi̱bemu, a ne ni du bi̱bu a me fwaku ti̱kwani yinangu ki̱fwa bi̱yili̱mange ka chakakku.

¹⁵N ti ki̱ku ka kaddi yikongu, ni tidu we fwaku bi̱yili̱mangu di̱ne mi̱laki̱, niyang funti̱bwi ni ya suteku kwakwadang, ni kau yinang Masiya wu n ki̱n nang duru we ni̱bu bunti̱ki̱me.

¹⁶N ki̱n a ya bwiyu ki̱ni kwang a di̱katuwe a fiwiine yi medmed. Yo fantiyu ki̱man nangi̱ntu a daka kawurete, ki̱maka yikayu fanti we bwiyu ki̱dwiyedu. Ti̱tu ki̱ni bwiyu li̱mang, ki̱dwiyedu ki̱laan fiko, ki̱ni mi̱laku.

¹⁷Di̱ne yiko mi̱n wu chimi̱n ki̱teliyu a di̱n Tewuduwe, aya mi̱n fwa chimi̱nu, a dakabi̱ ta chakakku ki̱ni da wu a kuuti, wu a ri ki̱ni ti̱kuran ti̱tu ditiye.

¹⁸Ti̱kuran chitu a tibebu, di̱ne n chi a mwatanbuwe chi a leetu n ti ti̱tu a lebitu, n chi a yabu we yiiku Kwamangu, di̱ne kwalan swaangke a di̱chiye, n ti ni̱tu chiti ki̱ngki̱ngitu.

¹⁹Kangu a fwerabangu, n chi a ni dutu chitu ki̱ya yayu wu a ti̱kuliye n ti duum dati yikusiyi kwang.

²⁰Aya ti̱tu n ke chi a no ta miyan a yingku Masiyange.

²¹We bi̱yili̱mu ti̱ nwe ya̱m Yesumu, ti̱ya miyaku we bi̱yili̱mu a di̱ki̱nemu yinangu ni ya yayu wu a dakanengu.

²²Ti̱du da bwiye n ti wa̱ri yika̱ri chiyu, yiyu a fwi swi a ri ki̱ni kana ti̱kwani n ti kubekiyu.

²³N ti ki̱ki yikongu, ti̱du fi̱ki̱m Kwamamu a sute ti̱kuran chi̱ntu ke ti̱ya yayu wu fwiye.

²⁴Ti̱da̱u ni̱r di̱fwin, di̱du yinang Kwamanu di̱du a yile n ti wauwade Kwamanu.

²⁵Di̱ne ka nang wuwule niye a du ti̱kwanitu a fwa bi̱yili̱m n ti keko, di̱ne n chi̱ni kwang a bwi wiin.

²⁶Ti̱madu ki̱lewe ki̱ni ki̱fwini di̱ne kaiyan ni̱re, ti̱dudu di a leduwe n ti̱n we ki̱ni ki̱fwini.

²⁷Ti̱nidu Setan da we ko bayim ki̱dangu ti̱ma ki̱fwiniyangu.

²⁸Nii ki̱ma kuute a lwaduwe, aya n kawure a funti̱bwi a ma nangangu ki̱ni fa̱li ki, wu ka ya chitu nabwene, a makati̱ bi̱bu a yabi̱mu.

²⁹Ti̱fwadu ya̱mi yi bwilayu we, ti̱tudu ni we, chitu ta fwaditi kwang a sudu bi̱bu ka kadu ki̱ni makaki̱mu we, di̱ne ke ya̱m chimu a kau bi̱bu ka maka ni̱bi̱m.

³⁰Aya ti̱yo Fi̱ki̱m Kwamamu mi̱nu kaiyan ni̱re we dati chiyu a lebiyu. Ti̱tabbi̱du we, n ki̱n nang wu ki̱yungdu n ti̱n n bi̱u ki̱ne. Kanang chikiye ki̱ni da ta ya yuku we di swan kute.

³¹Ti̱chaku muti̱ne ni̱re n ti chi kaiyan ni̱re n ti ki̱fwini n ti swa̱ba ku n ti rabi̱ki̱ya̱ma̱ngu ti̱turan n ti kanang wuwule ki̱duum bwilame n ti kasi no di̱di̱le muli̱n.

³²N ti ki̱ki yikongu, ti̱nwe ki̱bune yichiye, ti̱du ni̱bu mi̱n ki̱leti chiyu yinangu n Kwama a du nimi̱n a di̱Masiyangu.