Read tula Afisam 5 Bible Online

Afisam 5 - tula bible

Afisam 5

¹Ti̱kau yinang Kwama we nangi̱n chi̱ntu, di̱ne n ti̱n bwesi̱m ni̱ri̱m ki̱m.

²Ti̱mi̱la yichiyu we fiswe chi̱n, yinangu m Masiya a mi̱la chi̱n we niku ti̱kuri kitu di̱ne chi̱ne, ti̱tu a li̱ma ni̱r Kwamanu.

³A dakabu ya̱m ti̱kulimu n ti ti̱bwitantu n ti mi̱kakwiye ka fwedu we tibe chi̱n. Di̱ne ki̱chitu wu a dakabu we ni̱bu Kwamamu.

⁴Yinu n ti ya̱mi yiyu a lebiyu n ti ya̱mi yi kusiyu n ti ti̱kali ti̱tu a lebitu. N ti ki̱ki yikongu, ti̱nang wana Kwama.

⁵A dakan ta swaanu ko a ne naba yariye we, ka naba danduriye, ka naba mi̱kakwiye ka le yaa Masiya n ti Kwama. Ki̱kumang naba mi̱kakwiye ki̱si di̱yor ka nang chikiye, kuli̱n ti̱ti̱ni̱n.

⁶Wuka a bunti̱du chi̱n we ki̱ni ya̱mi yi kusiyu ki̱fwadiyu. A ne ti ke, n Kwama ka mwata ni̱bu bi̱bu mi̱nu di̱ne nangi̱n ti̱kusitu n chi ki̱maditu.

⁷Di̱ne yiko, ti̱madu ti̱bwitant ti̱tu we ware.

⁸Di̱ne n ti̱n a no a ki̱liye, aya ki̱ka̱ngu n ti̱n bwesi̱m Tewuduwe. Ti̱ya yayu bwesi̱m bi̱bu a ya yiiki̱me.

⁹Yiiki̱ku a swe a bwi chiyangu, ki̱chake chi ti̱yilitu n ti yile n ti bi̱yili̱mu ki̱yodu a fi̱lang.

¹⁰Di̱ne yiko, ti̱funbwi ti̱ma chi n Tewuduwe ka nwe ta̱ma̱ngi ki̱ne.

¹¹Ti̱chir mi̱n we datiyu a ki̱liye yiyu a ne makaku weyu. N ti ki̱ku ta madi yikongu, ti̱yo ni̱bu a swaan ko ti̱chitu wu a lebu.

¹²Bi̱yili̱m ti̱tu a lwe chi dibwitu ka ni̱bu ka fwa ti̱lairitu ni̱bu ki̱madu bi̱kamu a kubite.

¹³Aya ka ki̱yiiye a yii ki̱liye, nangi̱n ti̱bwilatu ki̱kadi kwa̱rikwa̱ri.

¹⁴Ti̱tu nang chi a yo ya̱mu we ko, “Ti̱kaban, n ti̱n bi̱bu duum a la bwimu, ti̱ kun we bi̱bwari̱mu, M Masiya ka ni chi̱n yiiki̱ku.”

¹⁵Di̱ne yiko, ti̱ma daan ki̱ni yayu ti̱yade, ti̱ya yinang ni̱bu kasani̱m.

¹⁶Ti̱funbwi ti̱ma nangang ki̱yilang ki̱ni ba ki̱swi ta ya, di̱ne n chi̱ni a diti yibwilai.

¹⁷Di̱ne yiko, ti kadu di̱bu ni̱bi̱m we, aya ti̱swaan chi n Tewuduwe ki̱baddu ta maditu.

¹⁸Ti̱kedu yimu a ladu dukan chi̱nu we. Di̱ne ni ki̱ no yime ki̱chi̱u ti̱kuriki. N ti ki̱ki yikongu, ti̱ni Fi̱ki̱m Kwamamu fi a to chi̱n.

¹⁹Ti̱nang kaba teniyu ti̱kunka yichiyi ki̱n, ti̱kaba teniyu ti̱dela Tewuduwe ki̱ni ni̱ri diin,

²⁰ka nang wuwule yonge ti̱wana Kwama Tewuduwe Masiya, we kasi no ti̱ti̱le chi ti̱tu a ma chimi̱nitu.

²¹N kawure a bunti̱ ya̱m fatemu ke ti̱ni Masiya dwiyentu.

²²Nati̱bu, ti̱bunti̱ kwartabu chimu yinangu ti̱bunti̱ Tewuduwe.

²³Di̱ne kwarta n nang tikakke naye yinangu m Masiya nang tikakke ni̱bu bunti̱ki̱mangu, Kanang chikiye ni̱bu nang bwiki, n ki̱n nang naba yuke.

²⁴Di̱ne yiko, yinangu ni̱bu bunti̱nki̱mu, ki̱bunti̱ Masiyangu, a fiwiine nati̱bu a bunti̱ kwartabu chimu we kasi no a ti̱ti̱le chi kwang.

²⁵Kwartabu ti̱mi̱la nati̱bu chimu yinangu m Masiya a mi̱la ni̱bu bunti̱ki̱mangu, a ni yikiyu di̱ne chi.

²⁶Di̱ne n ki̱n a bwa ko ke ki̱nura ni̱bu ki̱mu a kau bi̱u Kwamam. N ki̱n a nura chi ki̱ni mwe n ti ya̱m ki̱mu.

²⁷N ki̱n ki̱baddu ni̱bu bunti̱ki̱mu ka kau ni̱bu yilem we nuyi kiyu, n ki̱n a babu ti̱bwitantu ka ti̱kan chi yinang muli̱ne. Aya n ki̱n a ke ni̱bu ki̱mu a kau ni̱bu Kwamam bi̱bu a yilem.

²⁸A fi wiine kwartabu ti̱mi̱la nati̱bu chimu yinangu ta mi̱la bwiti chiyangu, di̱ne nii ki̱mi̱la naye ko, ki̱mi̱la dur ki̱n.

²⁹We bi̱yili̱mu, a ne nii ka ko bwiyi kiye we, aya n kawure ki̱chadu ki̱ni bwiyu ki̱toti̱ bwi kiyu. Yinangu n Yesu Masiya ki̱kuru ki̱ni ni̱bu bunti̱ki̱mangu.

³⁰Nangki̱n, n chi̱ni kwang ka fantiya bwiki.

³¹Yinangu ya̱m Kwamamu a fwangu, nii ka du teki̱n n ti ne ki̱n ka kwarkadu n ti naye ko, n chi ki̱ni burako, a kau yinang nii wiin.

³²Bi̱bu ya̱m ki̱ni bwar swaanki̱n. Aya mi̱n kamadu ya̱m bi̱bu ki̱fwadu a dur Masiya n ti ni̱bu ki̱mu.

³³Aya mi̱n fwati̱nu ki̱da, ka nang wuwule chi̱ne, a mi̱la naye ko yinang dur ki̱n, naye ti̱n a bunti̱ kwarta ko yinangu a dakanang.