Read tula Afisam 6 Bible Online

Afisam 6 - tula bible

Afisam 6

¹Bwesi̱mu ti̱bunti̱ seli̱bi̱ chimu di̱ne n ti̱n m bi̱u Tewuduwe. Ti̱tu nang chi a daka makitu.

²We tati̱ki̱dai yika̱ri a mwal ko, “Ni temun n ti ne mun dwiyentu.” Ki̱ku nang yilangu a mwemi̱nangu, ki̱ku n Kwama a fwangu ki̱ni bwa̱kangu.

³Ka m bunti̱ ya̱m temun n ti ya̱m nemuni̱me, a ne chi ka mane we, ti̱kuri mwitu ka yikadu kutan.

⁴N ti̱n tebi̱bu, ti̱yodu bwesi̱m chimu mi̱nu furi ki̱linu we ki̱ni ti̱welan ti̱tu a mabu ki̱kwitu. Aya ti̱bwa̱u chi ki̱ni ti̱welan ti̱tu a dakani ti̱nang ngau chimi̱nti̱ ki̱kure a tau wa̱re Tewuduwe.

⁵N ti̱n ka̱biyu, ti̱bunti̱ Tewuduwe chimu a ti̱ti̱nimu, ti̱ni chi dwiyentu, ti̱ma chimi̱n kwa̱mbi̱r ki̱ni ni̱ri diin. Ti̱bunti̱ chi yinangu ti̱bunti̱ Masiyangu.

⁶Ti̱ma nangangu n ke kana yo n chi we ki̱da̱ng chi̱ne, tiko ke a wer chi̱n. Aya ti̱ma nangangu ki̱ni ni̱r chi̱ni diin yinangu n Kwama ki̱badangu, di̱ne n ti̱n ka̱bi Masiya.

⁷Ti̱ma nangang changu ki̱ni ni̱ri diin, yinangu ti̱ma Tewuduwe mi̱nu n ke niyang.

⁸Kasi no m mun ka̱be ka n ke ka̱be, yim mwi n Tewuduwe ka swe kawure mi̱n ki̱ti̱me ko we nangangu n ki̱n a tu mangu.

⁹A fiwiine, n ti̱n Tebi̱lomu, ti̱tau ka̱bi chiyu yinanga yo n chi ki̱ma chimi̱n nangange. Ti̱yidu we tiko ta ni chi riye. A dakan ta yindu tiko n ti̱n n ti chi a fa̱la̱ng Tewuduwe kwange.

¹⁰Mang swan ya̱m mi̱mi ying, ti̱ti we dukan Tewuduwe ke ti̱kabi ki̱ri̱ng, di̱ne dukan ki̱nu nabwenabwen.

¹¹Ti̱sa bwi chiyu ki̱ni kuli̱n kunni̱n Kwaman di̱du a Fi̱ki̱mu, ke ti̱la Setan ki̱ni furali kitu yo beka swe chi̱ne.

¹²Nangki̱n, kun di̱du niyang mabu n ti ni aya n ti ki̱fi̱bti yibwilayu n ti bi̱duum chimu ki̱ma mati̱n ti̱ti̱ni ti̱tu yinang kumite n ti ki̱fi̱btiyu a ti̱ra twiye kasi bwaleyu.

¹³Di̱ne yiko, ti̱yau kuli̱n kuni̱n Kwamanu, ke ti̱yim tiko wubwila yo a chire ki̱ni bwila ko, yinu a kuteng kunangu, ta chakakku, ti̱ti ki̱ri̱ng.

¹⁴Ti̱ti ki̱ri̱n ki̱kumang, bi̱yili̱m chimu a kau yinang di̱ki̱ri̱n, yile chi̱n a kau yinang rasi.

¹⁵Chau kakku ki̱ni di̱mwar ya̱m bi̱li̱mi̱nu. Ka kadu yinangu m muni ki̱ni ki̱wami we naniyang. Mwang tidi ki̱ni ki̱ri̱ng.

¹⁶Suki̱ku we fi ki̱ni kwang, marru Yesu we, keku bi̱yili̱mang mwangu ka kau mi̱n kusa wu ka tone.

¹⁷Yim n Kwama a yunu, ti̱tu ka kadu yinangu mwang do di̱sumbi̱r di̱du ka swe mi̱n duri̱n. Tau ya̱m Kwamamu, ka kadu yinang kul di̱du Fi̱ki̱m Kwamamu a ni̱nni̱n.

¹⁸Twa̱ba̱ bunitu ka nang ki̱ki̱le ki̱dange yinangu Fi̱ki̱m Kwamamu a yungi̱nangu ka nang wuwule ki̱swiye. Swengi sobu, chakakku ki̱ni twa̱ba̱ku buniyangu di̱ne ni̱bu bunti̱ki̱mu kasi no bwa̱le.

¹⁹Ti̱nti̱ne, twa̱ba̱ bunitu di̱ne mi̱n, ke Kwama a ni mi̱n ti̱kwa̱liyitu mang medu mang fwa ya̱mu ki̱ni runni we ti̱lairi ti̱tu Kwama a do fereditu, kanang chikiye ya̱m bi̱li̱mu bi̱bu di̱ne ni̱bu Yafudam n ti bi̱bu n ke ni̱bu Yafudamu.

²⁰N Yesu a sutumi̱n n kau wakili ko, a yo mi̱n ma di̱mwar ya̱m Bi̱yili̱m bi̱bu a yo mi̱n a di̱bi̱nti̱l ki̱ka̱ngi̱mu. Di̱ne yiko ti̱twa̱ba̱ bunitu a ni dukanu mang fwa ya̱mi deri̱nu.

²¹N Tikiku ke chire wu niyang mi̱lane, wu ki̱si Tewuduwe yinange, ka fwa chimi̱n ya̱m mi̱mi kwang. Ke ti̱yim yinangu m mi̱n wemi̱nangu n ti chi mi̱n maditu.

²²N tum chimi̱n ke a fwa chimi̱n chi ki̱fwedu n ti ni̱nnitu. Ti̱nti̱ne ke a kumti̱ ni̱r chi̱nu.

²³Kebu mi̱m, li̱me a swe ware n ti chi̱n. Mi̱n twa̱ba̱ Kwama Te chire n ti Tewuduwe Yesu a ni ni̱bu bunti̱ki̱mu li̱mangu, a yo ti̱chakakku ki̱ni mi̱laku yichiyangu n ti keku bi̱yili̱mangu we di̱Masiya.

²⁴Yam li̱me Kwama a swe ware n ti chi̱n bi̱bu ta mi̱la Tewuduwe Yesu Masiya ki̱ni mi̱laki̱ku a ne riku weng.