Read tula Filibiyam 1 Bible Online

Filibiyam 1 - tula bible

Filibiyam 1

¹Lwangi̱n di̱du a chire a di̱Bulus n ti Timoti, ni̱bu nangam Masiya Yesu, di̱ne ni̱bu bunti̱ki̱ Masiya Yesu a Filibimu, n ti seli̱bu ni̱bu bunti̱ki̱mu n ti bi̱bu ki̱maka chi nangangi̱mu.

²Li̱me n ti li̱mang Kwama Te chirengu n ti Tewuduwe Yesu Masiyangu a swe ware n ti chi̱n.

³Mi̱n wana Kwama we ka nang ki̱ki̱le ki̱dangu mi̱n kur chi̱nengu.

⁴Ka nang ki̱ki̱le ki̱dangu mi̱n twa̱ba̱ chimi̱n bunitange, mi̱n twa̱badi kwadu ki̱ni furi mwen,

⁵mi̱n ni di̱wan di̱ne ta makai niwu mang ma di̱mwar ya̱m bi̱li̱mi̱nu ware, a mwetuwe di fange lanta ki̱ka̱ng.

⁶Bi̱yili̱m n yim n Kwama wu a mwe nanga Ki̱yilang ki̱ku we dutu chinte, a ne du chi̱nu, se ka swanu, a di m Masiya Yesu ka ki̱lade.

⁷A dakami kangu mi̱n kura chi̱nu yinangu, di̱ne n ti̱n we ni̱r mi̱nu. We ti̱kunkayu we li̱me Kwama we ki̱dangu mi̱n a di̱bi̱nti̱langu, we ki̱dangu mi̱n so ya̱m bi̱li̱m yinu mi̱n yungti̱ kasi bi̱yili̱m we ya̱m bi̱li̱mitu.

⁸N Kwama nang wu a timituwe, a yim kangu mang mi̱la chi̱nangu. M mi̱la chi̱n yinangu m Masiya Yesu a mi̱la chi̱nangu.

⁹Mi̱n twa̱ba̱ bunitu mi ke ti̱chakakku ki̱ni mi̱laku yichiyangu nabwen. Ti̱nti̱ne mi ke ti̱yim Kwama ti̱swaan ti̱ni kwang,

¹⁰yinu ta medu ta sutu chi a datu, ke ti̱kau ni̱bi wa̱la̱k bi̱bu a ne di̱tuur wem ka lami̱nti̱ yo Masiya ka ki̱lade.

¹¹Yinu we da chi̱n ti̱ yung da wuyile wu ni yadu a di̱Yesu Masiya, di̱ne ke di̱n Kwamanu a ya dwiyen n ti ri̱kaku.

¹²Kebu mi̱m, mi̱n baddu ta yindu tiko chitu a fwe n ti mi̱nitu, a yo ya̱m bi̱li̱mu ka chakakku,

¹³kasi no nang ni̱bu ki̱rangmu ki̱to lo maiyemu n ti bi̱kamu ni̱bi kwang a yim ko n le di̱bi̱nti̱lu di̱ne Masiya.

¹⁴Di̱ne ni̱bu a kwai a di̱bi̱nti̱le, a kau wa̱re wu n Tewuduwe a yo kebu ni̱bu bunti̱ki̱mu nabwen a ya ruku ki̱ma di̱mwar ya̱m Kwamamu a ne tayi we.

¹⁵Bi̱yili̱m bi̱kamu ni̱bu bunti̱ki̱m ki̱ma di̱mwaru ki̱yoti̱ muli̱nu we n ti kati̱n, aya bi̱kamu ki̱ma di̱mwar Masiya ki̱ni ni̱ri diin.

¹⁶Ni̱bu bi̱bu ki̱ma di̱mwari̱mu, ki̱madu di̱ne n chi a mi̱laye, a yim ko ni̱bu a kwai we di̱bi̱nti̱lu di̱ne mi̱n so ya̱m bi̱li̱me.

¹⁷Bi̱kamu ki̱ma di̱mwar Masiya ki̱yoti̱ da bwiye we, a ne bi̱yili̱m we. N chi ki̱baddu mang leti̱ wuka riye we di̱bi̱nti̱lu.

¹⁸Aya kasi a no yire, ka ti̱kuran ti̱kwaniye ka ti̱kuran ti̱yiliye, ya̱mu nang bi̱bu: di̱mwar Masiya a kwiyabu. Ti̱tu a yo mi̱n nwe ta̱ma̱ng. Ki̱kumang, nwe ta̱me miki̱ chakakku.

¹⁹N yim twa̱ba̱ bune chi̱n di̱ne mi̱nangu, yinu ti̱nti̱ne Fi̱ki̱m Yesu Masiyamu ki̱makayu, ti̱tu nang chi ka yo chirku mangitu.[1]

²⁰M bau ki̱ni ki̱ke, n yoti̱ ni̱ru we mi ne mang ma chi ka yoyu a dibwi we nangang Tewuduwe, aya n fwa ya̱m Masiyamu a ne tayi we, we chitu mang maditi kwang, m Masiya ka ya ri̱kaku we di̱ mi̱ne ki̱ka̱ngu n ti ka wuwule ki̱swiye, kasi mi̱ni ki̱ni ti̱kuri, kasi no a kutengu mang bwadang.

²¹We di̱ mi̱ne, ka n kau ki̱ni ti̱kuriye m mi̱n n wu Masiya, ka m bwange ka lami chi.

²²Aya ka mang chakakku ki̱ni ti̱kuritu mang ma Masiya mi̱n nangang ki̱yilange, n kwala ti̱tu mang swaditu.

²³Ti̱me chi yurabe a le ni̱r mi̱nu. Mi̱n baddu mang ki̱la bwa di̱Masiya mang swedu ware. Ti̱kitu a mwan a la chi,

²⁴aya we di̱chi̱ne a la chi ka m mi̱n we ki̱ni ti̱kuriye.

²⁵Yo kwer mang swaaniye, n yim mang swedu ware n ti chi̱ni kwang, ke ti̱chakakku ki̱ni furi mwenu we keku bi̱yili̱mang changu,

²⁶ka yiko, ka n ki̱la chi mi̱nte di̱siiru wenge, ta ngau kwiye, we chi Yesu Masiya a ma a di̱minetu.

²⁷We chitu ta maditi kwang, ti̱ma fiswe wu ka yung da wa ya̱m bi̱li̱m Masiyame, di̱ne kasi no m be n ku chi̱n, kasi no mang bebu, mang nwe ya̱mu we dur chi̱nu. Yinu mang yindu mi ti̱ti ware ki̱ri̱ng, ti̱ni bobu, ti̱kuran chi̱ntu a fiwiine di̱ne keku bi̱yili̱mangu we ya̱m bi̱li̱mu.

²⁸Ti̱nwedu tayi fakwarbu chimu we ko bayim, ti̱tu ka kau chi mi̱n di̱mwal di̱du n chi ka swaanu ko ya chi twiyadu, aya we di̱ chi̱ne, ta ya yuku a fa̱la̱ng Kwamang n ki̱fwan.

²⁹Di̱ne li̱me a ma chimi̱ne n ke kana di̱ne ta kedu ki̱ni Masiya, aya ti̱nti̱n ta nwe riye di̱ne ki̱ne,

³⁰yo ti̱n ti̱ nwe riye yinangu ta ku mi̱n nwe dangu, yinu ta nwe ti̱n we mi̱n nwe riye chiku.