Read tula Filibiyam 2 Bible Online

Filibiyam 2 - tula bible

Filibiyam 2

¹Ka da chi̱n a bunti̱ki̱ Masiya ki̱yodu ti̱ya ru ni̱re, ka ki̱ke ko ki̱kum chimi̱n ni̱re, ka kunkaku we Fi̱ki̱m Kwamame, ka ni̱r chi̱ni buk ki̱ni ti̱mi̱lantu ti̱nweti̱ ki̱bune,

²ti̱yo ti̱mi̱lan mitu a kabi di̱mbi̱ri̱m. Ti̱kuran chi̱ntu a be a fi wiine, ti̱nang mi̱la yichiyu, ti̱nang kunkati̱nu ware.

³Ti̱madu chitu we ki̱ni da bwiye ka kukki̱ku durange, aya ti̱si̱kku dutu chi̱ntu, n kawure a ke ko wukani a la ki̱n.

⁴Ti̱kuru ka chi a dur chi̱ne we, aya ti̱nang kurti̱ bi̱kamu ti̱nti̱n.

⁵Da ti̱chiyu a kau tiyang da wu a di̱Masiya Yesuwe.

⁶Kasi ki̱ku n ki̱n Kwamangu, a dabbu fi̱raki̱ kangu n ti Kwama ke ti̱kan chi ti̱tu n ki̱n ka tadi ki̱ri̱ngi.

⁷N ki̱n a mar dur ki̱nu n ke ti̱kan chi; a mar yikiyu yinang ka̱be, A be ki̱ni di̱ten bwi niin.

⁸A di̱ten bwi niin, a siiku dur ki̱nu a kwa̱mbi̱r di̱du a yo ki̱n a bwa, kasi no bwa wu a ki̱tiyang bwange.

⁹Di̱ne yiko n Kwama a ni ki̱n dwiyentu a la ka ti̱ti̱le chiye kwang. A ni ki̱n di̱n di̱du a la ti̱kantu di̱mbi ki̱ni ri̱kaku,

¹⁰di̱ne yiko ka nang wuwule niye, ka diye ka a ti̱me, ka ni̱r di̱ti̱ne, ka sungdu kani̱n ni Yesu dwiyentu.

¹¹Ti̱nti̱ne ka nang wuwule yiiye ka mwadu ko, Yesu Masiya nang Tewuduwe, ki̱ni Kwama Te dwiyentu.

¹²Di̱ne yiko, n ti̱n bi̱bu mi̱n mi̱ladi̱mu, kangu ti̱mami kwa̱mbi̱ri kwadangu kasi mi̱n newe, ki̱ka̱ngu m mi̱n mang newe n ti chi̱nangu, ti̱su kwa̱mbi̱ru. Ki̱kangu ta ya yukangu, ti̱chakakku ki̱ni da wu yile n ti tayi Kwamai.

¹³N Kwama nang wu ki̱ma nangang a ni̱tu chi̱ne, ki̱yo chi̱nu ti̱kedu yinu ta ma chi ka li̱ma ki̱n ni̱re.

¹⁴Ti̱madu chiwe ki̱ni ti̱luran kebi̱ ka ti̱kwilane,

¹⁵di̱ne ke ti̱kau ni̱bu bi̱bu a ne di̱tuur wem, bi̱bi wa̱la̱k, tiyang bwesi̱m Kwamam bi̱bu a ne ki̱le wem we di̱kalan di̱bwilan di̱kusi̱nu, tani̱n yiidu we tibe chi yinang fiti̱ti̱lai we ti̱ti̱nitu,

¹⁶ka ti̱fwa chimi̱n ya̱m ki̱ni ti̱kurime, ka ti̱mange, ka yodu mang ri̱ka bwi we di ki̱lake Masiya, ke a kaduwe m mi̱ni bobu, n ti riye mi a kadu wu kuse we.

¹⁷Keku bi̱yili̱mang changu n ti nangang chi̱ntu wadwadu we kakku Tewuduwe. Kasi no a kur ki̱tuum mi̱mu we niku ki̱tuumang ki̱ku, mang nwe ta̱ma̱ng mang ma ti̱mi̱lantu n ti chi̱ni kwang.

¹⁸We yiko, ta ma furi mwemwe, ta ma ti̱mi̱lantu n ti mi̱n.

¹⁹N yo ni̱ru ka Tewuduwe Yesu a kenge, mang tum chimi̱n Timoti a ne da̱u ki̱swi, di̱ne ke a ru ni̱r mi̱nu ka n nwe ya̱m chime.

²⁰M mi̱n n newe ki̱ni wuka ni yinang ki̱n wu a yo ti̱kuran chi̱ntu a kake.

²¹Bi̱kamu ni̱bu ki̱bau kana chi n chi ki̱badde, a bwin ti̱tu n ti̱ Yesu Masiyangitu.

²²A tayim tiyangu n Timoti we mi̱nangu, tiyangu nang ma nangan ya̱m bi̱li̱mu ware tiyang bwe n ti teki̱nang.

²³Di̱ne yiko, mi̱n yo ni̱ru mang tum chimi̱n ki̱nu, ka n yim chi ka fwedu n ti mi̱ne,

²⁴ti̱nti̱ne m mi̱ni ki̱ni runi ka Tewuduwe a kenge, m mi̱n mang bete bwa di̱chine a ne ti ke.

²⁵N da̱ng a le mang tum chimi̱n kemi n Abafaraditu. N ki̱n fate wu mi̱n ma nanga fandu ware, fate mi̱n funti̱bwi ware, wu ta tume ki̱mami nangange.

²⁶N ki̱n a yo ni̱ru ka ku chi̱nu ki̱ni kwang, a li̱m ki̱mi̱nbu yinangu a nwe ko ti̱yim n ki̱n a bubuwengu.

²⁷We yiko a bubuwe, a no mwa̱tan ka bwadu. Aya n Kwama a nwe ki̱bune ko, n ke ka ki̱n ki̱kun, n Kwama a nweti̱ ki̱bune mi, ka no newe yiko, furi ki̱linu a no lamidu la.

²⁸Nang chi a yo mang yo ni̱ru mang tum chimi̱nti̱ ki̱nu we ki̱da, ke ti̱ nwe ta̱ma̱ng ti̱kuti̱ ki̱n we ki̱da, kaiyan ni̱re mi ka bungdu.

²⁹Ti̱yiu ki̱n kaniyi yurau di̱ne Tewuduwe, ti̱ni duum bi̱bu dwiyentu yinangu a dakanang.

³⁰Di̱ne a no mwatan ka bwadu di̱ne nangang Masiyangu, a ni ti̱kuri kitu ke ki̱mami makaki̱ku n ti̱n ne ta medangu.