Read tula Filibiyam 3 Bible Online

Filibiyam 3 - tula bible

Filibiyam 3

¹We kuteng ki̱ku, kebi̱mi̱m, ti̱ma ti̱mi̱lan we di̱Tewuduwe. A ne buyi ni̱r kasi no m mwal chimi̱nti̱ ti̱tu we. M ma ying ke a maka chi̱n we keku bi̱yili̱mang changu.

²Ti̱ma daan ki̱ni ni̱bu bi̱bwilamu bi̱bu yinang kadatimu, bi̱bu ki̱yidu ko biku laarangu a mwintuwe.

³Di̱ne n ni̱n nang ni̱bu nang bii laari siinmu, n ni̱n bi̱bu ni̱n sii Kwama a Fi̱ki̱m ki̱me, bi̱bu ki̱ngau kwiye ki̱ni Masiya Yesuwe. Nang yoti̱bu ni̱r we nangi̱n ti̱tu ni̱bu ki̱madu a di̱ten bwi niintu,

⁴kasi ki̱ku m mi̱n, mi̱n medu mi̱n yoti̱ ni̱r we nangi̱n ti̱ti a di̱ten bwi niintu. Ka wuka nii we wu ki̱kamadu ko, n ki̱n ki̱ni chi a yo n ki̱n ki̱ni yo ni̱re we nangi̱n ti̱ti a di̱ten bwi niinte, m mi̱n n la ki̱n.

⁵Ni̱bu a bii mi laaru yo mang lam diti nari̱be, m mi̱n naba Yisrela siin, a ki̱kuwang Benyami, bwe Yibraniya siin. We ya̱m kwa̱mbi̱ri̱mu mi̱n bunti̱ yili̱n ni̱bu Yafudamitu, m mi̱n naba Farisa siin.

⁶We funti̱ku bwiyang mangu mi̱n ni ni̱bu bunti̱ki̱mu riye, we ya̱m yilemu bi̱bu a bunti̱ku yili̱nte, m mi̱n a ne ki̱le we.

⁷Aya ferediye ki̱chitu wu no mi̱n kudu mi kano mang ya ki̱ti̱me we, ki̱kangu a kau mi yare di̱ne Masiya.

⁸A ne chi ki̱ni ki̱siyange we yinang yingku Masiya Yesu Tewuduwe mi. M mar ka ti̱ti̱le chiye a kau mi yare, di̱ne ke n yim ki̱n. N yar we chiti kwang di̱ne ki̱ne. M mar kwali̱n chiin di̱du kwang n ku a kau chi ti̱kusi, di̱ne ke n ya Masiya,

⁹ti̱nti̱ne n swe ti̱n a di̱ki̱ne. Ti̱tu n ke di̱ne yile mi̱n tundu we bunti̱ku yili̱nte, aya di̱ne yile ki̱chiredu a keku bi̱yili̱mang a di̱Masiya, ka nang chikiye nang yile wu ni yadu a di̱Kwama we keku bi̱yili̱mange.

¹⁰Chi mi̱n badditi kwang ke n yim Masiya n ti dukan kunki̱ kangu we kwa̱miyu. Mi̱n baddu mang lwekadu n ti ki̱n we riye n ti bwa yinangu n ki̱n a mangu,

¹¹we yo ni̱re ke m mi̱n n kuntuwe bwa n kab ki̱ni ti̱kuri.

¹²A yungbu ko n tu n kau tiyangu mi̱n baddu mang kaddangu ka mang tu mang kabi di̱mbi̱ri̱m, aya m mi̱n we bobu ke n chau ki̱la, di̱ne m Masiya Yesu a tu a yo mi̱n n kau wuko.

¹³Kebu mi̱m, mang yibu mi n tu n ya didin, aya ti̱me chi wiin wu mi̱n made, mi̱n tabi̱du ki̱ni chita suutu. Mi̱n funti̱ bwi a chita kakkitu.

¹⁴Mi̱n funti̱ bwi mang chau ki̱la ke n ya ki̱ti̱me di̱yale wu n Kwama ka niyu a bwadiye we chitu m Masiya Yesuwe a mantu.

¹⁵Di̱ne yiko, n chi̱ni kwang bi̱bu niyang dwiyen a Fi̱ki̱me, ni kau ki̱ni da wu. Aya ka bi̱kam chimu ki̱ni ti̱kan ti̱kuran da̱nge, n Kwama ka yung chi̱n ti̱tu ti̱n.

¹⁶Kasi chitu nang ti̱tu, fi niyang lame, ni chakakku we fiko.

¹⁷Kebu mi̱mu, mi̱n baddu ta bunti̱ nanimiyu, ti̱ miyan we bi̱bu da chi a da yinangi̱mu, n ti kangu nang miya chimi̱nangu.

¹⁸Tiyangu mang me mi̱n fwa chimi̱nangu, mi̱n fwa chimi̱n ti̱nu ki̱da ki̱ka̱ngu ki̱ni ti̱mweni mi bi̱kamu ni̱bu da chi wa kati̱ne n ti chi m Masiya a ma a ki̱tiyang bwange.

¹⁹Ni̱bu bi̱bu a tau wa̱re wa twiyake, chi bwi chi ki̱badde nang chi ki̱bu chi ni̱re, ki̱ ngau kwiye we chi a no dakan ka nweng dibwiye. Ti̱kuran chitu a kana kuli̱n ti̱ti̱ni̱n.

²⁰N chi̱ni m bi̱u Yaa diye, yinu ni̱n yam Naba Yuke wu ka bedu we bwako, Tewuduwe Yesu Masiya.

²¹N ki̱n nang naba dukane, ka yo chiti kwang a yaa ko. N ki̱n ka sute bwiti chire yiyu a ti̱bwitaniyu, ka maru yinang yikiyu a dwiyeniyu.